Himayaa si Jehova Paagi sa Maayong mga Buhat
1 Kon maabtan ka sang mabaskog nga bagyo, daw ano nga kaumpawan kon makakita ka sing mapasilungan! Kon mainit-init kag malayo sa katalagman sa sulod kag kon ang mga pumuluyo maabiabihon, malipay ka sa pagtener didto. Ang hilikuton nga pagbantala sang Ginharian nagatudlo sa katawhan sa sini nga pasilungan gikan sa sistema ni Satanas. Ang aton adlaw-adlaw nga paggawi nagabulig bala sa iban nga makita kon daw ano ka makagalanyat ining malayo-sa-katalagman nga dalangpan? Huo, bangod nagsiling si Jesus nga ‘makita sang mga tawo ang aton maayong mga buhat kag himayaon ang aton Amay nga yara sa mga langit.’—Mat. 5:16.
2 Paano kita mahimo maggawi agod ang aton mga buhat magaganyat sa iban kay Jehova kag sa iya organisasyon? Paagi sa pagdihon sang aton kabuhi kada adlaw suno sa mga pulong ni Jesus nga narekord sa Lucas 6:31 kag 10:27. Magapahulag ini sa aton nga ipakita ang mahigugmaon nga pag-ulikid sa mga isigkatawo, nagahimo sa aton nga tuhay gikan sa sining di-masinapakon kag di-mainulikdon nga kalibutan.
3 Samtang sakay sa isa ka barko, nakita sang utod nga babayi ang isa ka lamharon nga babayi nga ginadagat kaayo amo nga indi niya maatipan ang iya bata. Ang utod naghingyo nga atipanon ang bata. Sang namangkot ang babayi kon paano niya sia mapasalamatan, ang utod nagsiling: ‘Palihug pamatii ang mga Saksi ni Jehova sa masunod nga tion nga magduaw sila.’ Ginhimo ini sang babayi, kag karon sila sang iya bana mga Saksi na. Ang maayo nga mga buhat nakabulig sing daku sa nangin reaksion nila sa mensahe sang Ginharian.
4 Ang Aton Bug-os nga Kabuhi Nadalahig: Ang aton paggawi sa kasilingan, samtang sa trabaho ukon sa eskwelahan, kag sa tion sang paglingawlingaw nagahatag sa iban sing rason agod makahimo sing opinyon tuhoy sa aton kag sa aton relihion. Gani, dapat naton pamangkuton ang aton kaugalingon: ‘Paano ako kag ang akon pamilya ginatamod sang mga tagpanilag? Ginatamod bala sang mga kaingod ang amon balay kag ugsaran nga matinlo kag naatipan sing maayo? Ginatamod bala kami sang amon mga katrabaho kag mga kabutho subong temprano nagaabot kag makugi? Nakita bala sang iban ang amon hitsura subong maugdang kag talahuron?’ Paagi sa aton maayong mga buhat, ang pagsimba kay Jehova mahimo nga mangin mas makagalanyat sa iban.
5 Nagpaandam si Pedro nga ang mga Cristiano yagutaon. (1 Ped. 4:4) Dapat naton pat-uron nga ang aton paggawi indi tunaan sang negatibo nga hambalanon. (1 Ped. 2:12) Kon ang aton adlaw-adlaw nga paggawi nagahimaya sa Dios nga aton ginasimba, nian mangin kaangay kita sang mga suga nga ginabayaw, nagaganyat sa iban sa pasilungan nga malayo sa katalagman nga ginaaman ni Jehova.—Mat. 5:14-16.