Si Jehova Nagahatag sing Gahom
1 Ano ang masiling mo tuhoy kay apostol Pablo? Samtang ginabasa naton ang tulun-an sang Mga Binuhatan, nagadayaw kita sa kon daw ano sia kapisan sa pag-alagad kay Jehova. Paano ini tanan nahimo ni Pablo? Sia nagsiling: “Sa tanan nga butang may kusog ako bangod sa iya nga nagahatag sing gahom sa akon.” (Filip. 4:13) Makabenepisyo man kita gikan sa gahom nga ginahatag ni Jehova. Paano? Paagi sa paghimulos sa anom ka aman nga ginhatag niya sa aton agod mangin mapagsik kag mabakod sa espirituwal.
2 Pulong Sang Dios: Subong nga dapat kita magkaon agod huptan ang aton pisikal nga kusog, dapat man naton pakaunon ang aton kaugalingon paagi sa Pulong sang Dios agod magpabilin nga buhi sa espirituwal. (Mat. 4:4) Ang Biblia nagahatag sing gahom agod sakdagon kita. Agod huptan ang aton kakugi kag kapagsik sa kamatuoran, dapat naton himuon ang mapuslanon nga personal nga pagtuon kag pagpamalandong, sa adlaw-adlaw kon mahimo.—Sal. 1:2, 3.
3 Pangamuyo: Importante nga makigsuod kay Jehova, ilabi na sa mga tion sang di-kinaandan nga kinahanglanon. Paagi sa iya espiritu, nagahatag sia sing makapabakod nga gahom sa mga nagapangabay sini sa pangamuyo. (Luc. 11:13; Efe. 3:16) Ang Kasulatan nagapalig-on sa aton nga ‘magpadayon sa pagpangamuyo.’ (Roma 12:12) Ginahimo mo bala ina?
4 Ang Kongregasyon: Nagakuha man kita sing kusog kag pagpalig-on gikan sa mga miting sa kongregasyon kag gikan sa aton mainit nga pagpakig-upod sa aton mga kauturan didto. (Heb. 10:24, 25) Kon may problema kita, nagatabang sila sa pagbangon sa aton kag mahigugmaon nga nagabulig sa aton.—Hulu. 17:17; Manugw. 4:10.
5 Ang Ministeryo sa Latagon: Ang tayuyon nga pagpakigbahin sa ministeryo nagabulig sa aton nga magpabilin nga nagakonsentrar sa Ginharian kag sa mga pagpakamaayo sini. Ang aton mga balatyagon ginapahalipay kon ginabuligan naton ang iban sa pagtuon tuhoy kay Jehova. (Binu. 20:35) Indi tanan sa aton ang makasaylo sa mga lugar diin mas daku ang kinahanglanon sa pag-alagad ukon makapakigbahin sa bug-os tion nga pag-alagad, apang sa iban nga mga paagi, mahimo kita makapakigbahin sing mapuslanon sa ministeryo.—Heb. 6:10-12.
6 Cristianong mga Manugtatap: Makapanginpulos kita gikan sa pagpalig-on kag bulig nga ginahatag sang mga gulang. Si Jehova nagsugo sa ila nga tatapon ang panong sang Dios nga ginaatipan nila. (1 Ped. 5:2) Ang nagalakbay nga mga manugtatap nagapalig-on sa mga kongregasyon nga ginaalagaran nila, kaangay sa ginhimo anay ni Pablo sang panahon niya.—Roma 1:11, 12.
7 Mga Halimbawa Sang mga Matutom: Makapapagsik binagbinagon ang makapalig-on nga mga halimbawa sang matutom nga mga masigkamanugpangabudlay, sadto kag karon. (Heb. 12:1) Kon kinahanglan mo nga dapat papagsikon, ngaa indi magbasa sing isa sang makapalig-on nga mga sugilanon sa kabuhi sa aton mga magasin, sing makapabakod nga report sa Yearbook, ukon sing pila sang makakulunyag nga mga kasaysayan tuhoy sa modernong-adlaw nga maragtas sang mga Saksi ni Jehova sa Proclaimers nga libro?
8 Isa ka utod nga lalaki, mga nobentahon na karon, ang nagbaton sang kamatuoran sang bata pa. Sang bata pa sia, ang iya pagtuo gintilawan. Una sa tanan, ang pila nga aktibo anay nga nagapakig-upod sa kongregasyon nagbiya sang organisasyon ni Jehova. Nian yara ang pamalaybalay nga hilikuton, nga mabudlay para sa iya. Walay sapayan sini, pirme sia nagsalig kay Jehova. Sang ulihi naluyagan na niya ang ministeryo. Kag karon? Walay sapayan sang mapigaw nga panglawas, katapo gihapon sia sang panimalay Bethel sa Brooklyn, nagaalagad sa Nagadumala nga Hubon. Wala sia naghinulsol nga nagpabilin sia sa organisasyon ni Jehova.
9 Isa ka utod nga babayi nga katapo sang panimalay Bethel sa Britanya ang ginbawtismuhan sang 13 anyos sia. Nagpayunir sila sang iya magulang nga lalaki sang masunod nga tuig, kag pagligad sang isa pa ka tuig, ang iya amay ginbilanggo bangod sang iya pagkawalay nadampigan sadtong Bug-os Kalibutan nga Inaway II. Pirme sia nagsalig kay Jehova sa paghatag sa iya sing gahom, kag padayon sia nga nag-alagad sa matuod nga Dios. Sang ulihi, nakapamana sia sang isa ka matutom nga utod, kag pirme nila ginhimo ang kabubut-on ni Jehova. Pagkatapos sang 35 ka tuig sang pag-asawahay, ang iya bana hinali nga napatay. Sa liwat nakatigayon sia sing kusog gikan kay Jehova, kag padayon sia nga nag-alagad kay Jehova tubtob karon, nagalaum sa pag-alagad sing dayon subong katapo sang dutan-on nga panimalay ni Jehova.
10 Si Jehova nagabulig kag nagapapagsik sang iya matutom nga mga alagad. “Nagahatag sia sing gahom sa ginakapoy; kag sa isa nga wala sing dinamiko nga kusog ginapabugana niya sa bug-os nga kusog.” Matigayon naton ining walay latid nga ginhalinan sang gahom paagi sa paghimulos sa anom ka aman nga ginsambit sa ibabaw. Dumduma: “Ang mga nagalaum kay Jehova maulian sing kusog. . . . Magadalagan sila kag indi magluya; magalakat sila kag indi paglapyuon.” (Isa. 40:29-31) Si Pablo nagsalig sing daku kay Jehova sa paghatag sa iya sing kusog, kag dapat nga kita man.