“Sa Dios ang Tanan nga Butang Posible”

¹ Ang panguna nga hilikuton sang Cristianong kongregasyon amo ang pagbantala sing mensahe sang Ginharian sa bug-os nga kalibutan. (Mat. 24:14) Isa ina ka daku nga hilikuton. Para sa madamo nga tagpanilag, daw nagakinahanglan ini sang mga butang nga labaw sa aton ginapanag-iyahan. Para sa iban, halos indi gid mahanduraw ang pagtuman sa sini nga hilikuton bangod napaidalom kita sa pagyaguta, pagpamatok, kag paghingabot. (Mat. 24:​9; 2 Tim. 3:12) Kumbinsido ang mga maduhaduhaon nga ini nga hilikuton imposible matuman. Apang, si Jesus nagsiling: “Sa Dios ang tanan nga butang posible.”​—⁠Mat. 19:⁠26.

² Positibo nga mga Halimbawa nga Mailog: Ginsugdan ni Jesus ang iya ministeryo subong isa ka tawo nga ginapamatukan sang kalibutan. Agod indi sia magmadinalag-on, ginpakahuy-an gid sia sang mga nagapamatok sa iya, sang ulihi ginpaantos sing masakit nga kamatayon. Apang, sa katapusan, si Jesus masinaligon nga nagsiling: “Nadaug ko ang kalibutan.” (Juan 16:33) Isa gid ka tumalagsahon nga hinimuan!

³ Ang mga disipulo ni Jesus nagpakita sing amo man ka maisugon nga espiritu kag kakugi sa Cristianong ministeryo. Madamo ang ginbunal, ginsakit, ginbilanggo, kag ginpatay pa gani. Apang, sila ‘nagkasadya bangod naisipan sila nga takus nga pakahuy-an tungod sa iya ngalan.’ (Binu. 5:41) Walay sapayan nga mahimo mahanabo sa ila ang bisan diin sini, gintuman nila ang daw imposible nga hilikuton sang pagbantala sing maayong balita “tubtob sa ukbong sang duta.”​—⁠Binu. 1:​8; Col. 1:⁠23.

⁴ Kon Paano Magmadinalag-on sa Aton Adlaw: Ginahimo man naton sing makugi ang hilikuton nga pagbantala sing Ginharian walay sapayan sang daw imposible nga mga kahimtangan. Walay sapayan sang mga pagdumili, paghingabot, pagbilanggo, kag iban pa masingki nga mga panikasog agod padulugon kita, nagamadinalag-on kita. Paano ini nangin posible? “‘Indi paagi sa kusog militar, ni paagi man sa gahom, kundi paagi sa akon espiritu,’ siling ni Jehova sang mga kasuldadusan.” (Zac. 4:6) Bangod ginasakdag kita ni Jehova, wala sing butang nga mahimo makapadulog sang aton hilikuton!​—⁠Roma 8:⁠31.

⁵ Kon kita nagabantala, wala kita sing rason agod mahuya ukon mahadlok ukon magbatyag nga indi sangkol. (2 Cor. 2:​16, 17) May daku gid kita nga rason agod magpadayon sa pagpalapnag sing maayong balita sang Ginharian. Sa bulig ni Jehova, mahimo naton ang “imposible”!​—⁠Luc. 18:⁠27.