Ang Mangin Simple Amo ang Pinakamaayo
1 Ngaa masunson nga naganyat sang lamharon nga mga manugbantala ang igtalupangod sadtong ginapaambitan nila sang mensahe sang Ginharian? Ang isa ka rason amo nga ang ila ginasiling simple lamang. Ang iban nga mga manugbantala mahimo nagahunahuna nga agod makapanaksi sing epektibo, kinahanglan ang isa ka tumalagsahon nga presentasyon. Apang, ginapakita sang eksperiensia nga ang isa ka simple kag maathag nga presentasyon amo ang pinakamaayo.
2 Ginwali ni Jesus ang Ginharian sang Dios sa isa ka simple kag talangkod nga paagi kag ginhanas ang iya mga disipulo nga himuon man ini. (Mat. 4:17; 10:5-7; Luc. 10:1, 9) Gingamit niya ang simple nga mga introduksion, mga pamangkot, kag mga ilustrasyon agod maganyat ang igtalupangod sang iya mga tagpalamati kag malab-ot ang ila tagipusuon. (Juan 4:7-14) Dapat naton ilugon ang iya halimbawa kag maghatag sang mga presentasyon nga madali mahangpan.
3 Ang “maayong balita sang ginharian” amo ang mensahe nga aton ginawali. (Mat. 24:14) Ang paggamit sa Ginharian subong ang imo sadsaran nga tema magabulig agod mahuptan mo ang imo presentasyon nga simple. Maghambal sang mga butang nga nagadalahig sa imo mga tagpalamati. Ang mga kababayin-an masunson nga mas interesado sa ila pamilya sangsa politika. Ang panguna nga ginakabalak-an sang isa ka amay amo ang iya palamugnan kag ang kaayuhan sang iya pamilya. Ang mga pamatan-on interesado sa ila palaabuton; ang mga mas gulang-gulang, sa mas maayo nga panglawas kag sa ila kalig-unan. Ang mga tawo masunson nga mas interesado sa mga nagakatabo sa ila lugar sangsa mga nagakatabo sa malayo nga kadutaan. Sa tapos mahambalan ang mga butang nga lunsay kamo interesado, ipatuhoy ang igtalupangod sa mga pagpakamaayo nga tigayunon sang matinumanon nga katawhan sa idalom sang paggahom sang Ginharian sang Dios. Ang simple kag pinili-sing-maayo nga mga pulong lakip ang isa ka kasulatan mahimo nga amo ang pinakamaayo nga paagi agod mapukaw ang interes sang imo tagpalamati.
4 Mahimo mo sugdan ang isa ka paghambalanay paagi sa pagsiling:
◼ “Pat-od gid nga magaugyon ka nga ang katawhan ginasit-an sing madamong di-mabulong nga mga balatian. Apang nakahibalo ka bala nga nagsaad ang Dios nga dulaon niya sa ulihi ang tanan nga sahi sang balatian, subong man ang kamatayon?” Pasabta sia, kag nian basaha ang Bugna 21:3, 4.
5 Paagi sa maathag kag simple nga mga presentasyon, kabay nga malab-ot mo ang hunahuna kag tagipusuon sang mas madamo nga tawo sa inyo teritoryo, nga nagabulig sa ila nga matun-an ang tuhoy kay Jehova kag sa paglaum nga maagom ang kabuhi nga walay katapusan.—Juan 17:3.