Magpanaksi Subong Maayo nga Kaingod
1 Si Jesus nagsiling nga ‘higugmaon mo ang imo isigkatawo subong sang imo kaugalingon.’ (Mat. 22:39) Sa walay duhaduha, ‘ginabuhat mo ang maayo’ sa mga masigkatumuluo, apang mapasangkad mo bala ang imo gugma sa imo mga kaingod? (Gal. 6:10) Sa anong mga paagi?
2 Paagi sa Pagpakilala sa Imo Kaugalingon: Nahibaluan bala sang imo mga kaingod nga Saksi ka? Kon indi, ngaa indi sila pagduawon sa pag-alagad sa latagon? Mahimo ka makibot sa mga resulta! Ukon kon luyag mo nga mangin mas komportable ang imo balatyagon, tilawi nga panaksihan sila sa di-pormal nga paagi. Kon sa guwa sang balay, mahimo makita mo sila nga nagapangabudlay sa ugsaran ukon nagadayandayan sa dalan. Palapiti sila nga may mainabyanon nga yuhum. Panikasugi nga maghambal tuhoy sa imo mga pagtuluuhan, sa nahamtangan sang Kingdom Hall, kag kon ano ang nagakatabo didto, kag sugiri sila kon sin-o pa sa kasilingan ang nagatambong. Agdaha sia sa mga miting. Mangin determinado sa pagpanaksi sing maid-id tuhoy sa maayong balita sa tanan nga kilala mo.—Binu. 10:42; 28:23.
3 Paagi sa Imo Huwaran nga Paggawi: Ang imo mainabyanon nga paggawi magahambal sing madamo tuhoy sa imo kag mahimo magbukas sang dalan agod makapanaksi. Ini man ‘nagapuni sang panudlo sang Dios.’ (Tito 2:7, 10) Magpakita sing matuod nga interes sa imo mga isigkatawo. Mangin mainabyanon kag mahinangpanon. Tahura ang ila kinamatarong sa pagkinaugalingon kag malinong nga mga palibot. Kon ang isa sa ila magmasakit, mangin mapatugsilingon kag magtan-ay sing bulig. Kon ang isa ka bag-ong pamilya magsaylo sa kasilingan, maghapit agod abiabihon sila. Ining mainayuhon nga mga buhat magahatag sing paborable nga impresyon kag kalahamut-an kay Jehova.—Heb. 13:16.
4 Paagi sa Dagway sang Imo Propiedad: Agod mangin maayo nga kaingod, dapat mo atipanon ang imo puluy-an agod mangin matahom ini. Ang puluy-an kag ugsaran nga matinlo kag matahom isa mismo ka panaksi. Apang ang puluy-an nga mahigko ukon may nagalinapta nga mga basura mahimo magpasipala sa mensahe sang Ginharian. Busa, importante gid nga huptan ang imo puluy-an, ugsaran, kag mga salakyan nga matinlo kag maayo ang kahimtangan.
5 Ang pagpakita sing pag-ulikid para sa mga tawo sa guwa sang Cristianong kongregasyon nagapasundayag sang gugma para sa imo mga isigkatawo. Ano ang mahimo nga mangin resulta? Mahimo nga “subong resulta sang inyo maayong binuhatan nga ila nasaksihan,” ang iban sa ila “magahimaya sa Dios.”—1 Ped. 2:12.