Mga Kombension—Tion sa Pagkasadya!

¹ Ang mga kombension sang mga Saksi ni Jehova mga okasyon sang daku nga pagkasadya. Sa kapin sa isa ka gatos ka tuig, ini nga pagtinipon nakaamot sa pag-uswag sa aton organisasyon. Halin sa diutay nga ginsuguran, nakita naton ang bugana nga pagpakamaayo ni Jehova sa aton bug-os kalibutan nga hilikuton. Sa aton nahauna nga kombension sa moderno nga tion, sa Chicago, Illinois, sang 1893, may kabug-usan nga 70 sa 360 nga nagtambong ang ginbawtismuhan bilang simbulo sang ila dedikasyon kay Jehova. Ang serye sang “Mga Manugtuman Sang Pulong Sang Dios” nga Distrito nga mga Kombension sining nagligad nga tuig may yara kabug-usan nga tumalambong sa bug-os kalibutan nga 9,454,055, kag 129,367 ang nabawtismuhan. Daw ano gid nga rason sa pagkasadya!

² Sugod sang panahon sang Biblia, ang mga pagtinipon sang katawhan sang Dios nangin talalupangdon nga paagi sa pagpaalinton sing panudlo gikan kay Jehova. Sang panahon ni Esdras kag ni Nehemias, ang mga tawo nagpamati sa pagbasa sing Kasuguan “kutob sa pamanagbanag tubtob sa udto.” (Neh. 8:​2, 3) Bangod sa pagtigayon sing mas maayo nga paghangop sa Kasuguan sadto nga tion, ang mga tawo ‘nagkasadya sing daku.’ (Neh. 8:​8, 12) Nagakasadya man kita nga ang mga kombension nagahatag sa aton sing maayo nga kahigayunan agod makabaton sing maayo nga panudlo kag espirituwal nga pagkaon “sa nagakaigo nga tion” gikan kay Jehova paagi sa “matutom kag mainandamon nga ulipon.” (Mat. 24:45) Sanglit nagsiling si Jesus nga ang tawo dapat mabuhi sa “tagsa ka pulong nga nagaguwa sa baba ni Jehova,” ang mga kombension importante gid sa aton espirituwal nga kaayuhan.​—⁠Mat. 4:4.

³ Takus Gid sa Tanan nga Panikasog nga Makatambong: Dapat personal nga tulumuron naton tanan nga makatambong sa bug-os nga “Mga Manunudlo Sang Pulong Sang Dios” nga Distrito nga mga Kombension sini nga tuig. Dapat kita magplano sa pag-abot sing temprano kada adlaw kag magpabilin tubtob makabuylog kita sa pagsiling sing “Amen!” sa nagatakop nga pangamuyo. Agod matuman ini, mahimo bag-uhon naton ang aton iskedyul. Ang pagkuha sing bakasyon gikan sa aton trabaho agod makatambong sa kombension mahimo nga may pila ka kabudlayan. Dapat kita manindugan sing malig-on, nga wala nagahulat sa kon ano na lang ang mahanabo. Kon nagakinahanglan kita sing dalayunan kag/ukon transportasyon, dapat kita maghimo sing mga kahimusan sing temprano. Ang bisan ano man nga panikasog nga dapat naton himuon mangin takus gid sa sini!

⁴ Wala ginatakus sang katawhan ni Jehova ang mga pagpakamaayo sang pagtambong sa kombension paagi sa kuwarta. Talupangda ang halimbawa sang pila nga determinado anay sa pagtambong sa 1958 Divine Will International Assembly of Jehovah’s Witnesses sa New York City. Ginsira sang isa ka utod nga lalaki ang iya negosyo sa konstruksion sa sulod sang duha ka semana agod makaboluntaryo sa pagbulig kag makatambong sa asambleya. Ginbaligya sang isa ka utod nga lalaki sa Virgin Islands ang iya duha ka ektarya nga duta agod makatambong ang iya bug-os nga pamilya nga may anom ka katapo. Ginbaligya sang isa ka mag-asawa ang ila de-motor nga bangka agod mapaupod nila ang ila tanan nga tatlo ka kabataan, nga nagaedad sing duha ka bulan tubtob pito ka tuig, sa asambleya. Ginsilingan ang tatlo ka mag-utod nga lalaki gikan sa California nga kon mag-absent sila sa ila mga trabaho, wala na sila sing mga trabaho sa pagbalik nila. Apang, wala ini magpugong sa ila sa pagtambong sa sadtong di-malipatan nga asambleya.

⁵ Ginapadyaan ni Jehova ang Aton Hanuot nga Panikasog: Makita kag ginapakamaayo ni Jehova ang mga panikasog sang iya katawhan. (Heb. 6:10) Subong halimbawa, sa 1950 Theocracy’s Increase Assembly, ang mga nagtambong nakapamati sa importante gid nga pamulongpulong nga “Bag-ong Sistema Sang mga Butang.” Napukaw ni Utod Frederick Franz ang interes sang tanan paagi sa pagpamangkot: “Malipay bala ining internasyonal nga asambleya sa paghibalo nga diri, karon nga gab-i, sa tunga naton, may yara pila ka palaabuton nga mga prinsipe sang bag-ong duta?” Paglipas sang kapin sa 50 ka tuig, nagakasadya gihapon kita sa sining maathag nga paghangop sa Salmo 45:16.

⁶ Sa tapos makatambong sa distrito nga kombension sang nagligad nga tuig, ang isa ka mapasalamaton nga ulo sang pamilya nagsulat sang masunod: “Mga utod, wala gid kamo makahibalo kon daw ano gid nga nagaluwas-kabuhi ini nga kombension. Ang akon pamilya nagsaylo sa siudad bangod sa trabaho, apang nagluya ang amon espirituwalidad. . . . Napatumbayaan namon ang amon Cristianong mga obligasyon. Nag-untat na gani kami sa pagtambong sa mga miting kag sa pagpakigbahin sa pag-alagad. . . . Ginpapagsik kami sini nga kombension, kag sa liwat nagatalana kami sing espirituwal nga mga tulumuron kag nagahimo sing mga kahimusan agod matuman ini.”

⁷ Si Jehova nagaaman sa aton sing espirituwal nga pagkaon nga ginakinahanglan naton. Nagahanda sia sing dagaya nga pagkaon sa aton mga kombension. Ang aton apresasyon sa sini nga aman magatugot sa aton sa pagpautwas sang ginsiling ni Cornelio sang ginduaw sia ni apostol Pedro: “Sini nga tion yari kami tanan sa atubangan sang Dios agod magpamati sa tanan nga butang nga ginsugo sa imo ni Jehova nga ihambal.” (Binuhatan 10:33) Himuon naton nga aton tulumuron nga mangin “sa atubangan sang Dios” sa tagsa ka sesyon sang “Mga Manunudlo Sang Pulong Sang Dios” nga Distrito nga Kombension sini nga tuig kag magkasadya!