Makaalagad Ka Bala Kon Diin Daku Pa ang Kinahanglanon?

¹ Nabinagbinag mo na bala nga magsaylo kon diin kinahanglan ang dugang pa nga mga manugbantala sang Ginharian? Kon ginaagda sa ‘pagtabok . . . kag sa pagtabang,’ batunon mo bala ini subong sang ginhimo anay ni apostol Pablo? (Binu. 16:​9, 10) Sa madamo nga kongregasyon, kinahanglan ang hamtong sa espirituwal nga mga pamilya, ang mga payunir agod magbulig sa pagtuptop sa teritoryo, ukon ang kalipikado nga mga gulang kag ministeryal nga mga alagad agod magbulig sa pagpanguna. Handa ka bala nga pun-an ini nga kinahanglanon? Ano ang himuon agod magmadinalag-on sa sini?

² Kinahanglan ang Pagtuo kag Pagsalig: Sa panuytoy sang Dios, ginbiyaan ni Abram ang iya tumandok nga banwa sang Ur kag naglakbay sing 1,000 kilometros pakadto sa Haran upod sa iya asawa, hinablos, kag tigulang nga amay, nga si Tera. (Gen. 11:​31, 32; Neh. 9:7) Sang napatay si Tera, ginsugo ni Jehova si Abram, nga 75 anyos na, nga bayaan ang Haran kag ang iya mga himata kag maglakbay sa isa ka pungsod nga ipakita ni Jehova sa iya. Sanday Abram, Sarai, kag Lot ‘naglakat.’ (Gen. 12;1, 4, 5) Siempre pa, wala magsaylo si Abram agod mag-alagad kon diin daku pa ang kinahanglanon nga mga ministro. Apang ang iya pagsaylo nagkinahanglan sing isa ka butang. Ano?

³ Kinahanglan ang pagtuo kag pagsalig agod mahimo ini ni Abram. Ang iya panghunahuna kag pagkabuhi dapat bag-uhon. Bayaan niya ang kalig-unan sang iya mga himata. Apang nagsalig sia kay Jehova nga atipanon sia kag ang iya panimalay. Madamo karon ang nagpakita sing pagsalig kay Jehova sa sini man nga paagi.

⁴ Pagsaylo sa mga Kongregasyon nga Nagakinahanglan Sing Bulig: Madamo pa nga kongregasyon sa Pilipinas ang kulang sing mga gulang kag ministeryal nga mga alagad. Kon nagapakig-upod ka sa kongregasyon nga may madamong hamtong nga utod nga lalaki kag luyag mo nga buligan ang iban nga kongregasyon sa inyo sirkito, nian maayo nga palapitan mo ang inyo manugtatap sa sirkito. Sunado niya ang bug-os nga sirkito kag ang mga kinahanglanon sini kag masugiran niya ikaw kon diin ka makabulig. Masami nga ginapalapitan sang nagalakbay nga mga manugtatap ang mga utod nga lalaki kon may nahibaluan sila nga nagakinahanglan kag kon palapitan ka, magaboluntaryo ka bala sa pagbulig?

⁵ Indi Madugay nga mga Asaynment: Naagom mo na bala ang bugana nga mga pagpakamaayo bangod sang pagpangabudlay sa wala matangdo nga teritoryo, bisan sa malip-ot lamang nga tion? Sining karon lang, gingamit sang duha sang aton manugtatap sa sirkito ang ila semana sang pagpayunir sa paghimo sing kahimusan agod ang mga grupo sang mga kauturan nga handa sa pagbulig makapanaksi sa nabaw-ing nga mga teritoryo sa ila sirkito nga madamong tinuig na nga wala mapangabudlayan. Takus bala ini sa panikasog?

⁶ Gin-upod sang isa sining mga manugtatap sa sirkito ang 35 ka kauturan agod duawon ang nabaw-ing nga mga minuro sa kabukiran. Nagbalon sila sing pagkaon kag nagdayon kon diin sila mahimo makadayon sa sulod sang isa-ka-semana nga paglakbay. Ang resulta? Naduaw nila ang mga tawo nga wala makasugilanon sa mga Saksi sa halos 30 ka tuig. Nakapahamtang sila sing kabug-usan nga 60 ka libro, 186 ka magasin, 50 ka brosyur, kag 287 ka tract. Nakasugod man sila sing 74 ka pagtuon sa Biblia. Ano ang balatyagon sang mga kauturan? Ang manugtatap sa sirkito nagsiling: “Ining talagsahon nga hilikuton sa pagbantala wala lamang magpabakod sang amon utudnon nga gugma kundi sang amon pagtuo man kay Jehova.” Tatlo sa grupo ang nalipay gid sa sini amo nga napahulag sila nga magregular payunir.

⁷ Ang pagbaton sing isa ka temporaryo nga asaynment agod mag-alagad kon diin daku pa ang kinahanglan may yara isa pa ka katuyuan. Ang mga nagahimo sini makatigayon sing mapuslanon nga impormasyon nga makabulig sa ila sa ‘pagbulubanta sang kabilihanan’ sang pagsaylo sa iban nga bahin sang pungsod.​—⁠Luc. 14:28.

⁸ Pagsaylo Kon Diin Daku Pa ang Kinahanglanon: Determinado si Jehova nga ibantala ang maayong balita sa “bug-os napuy-an nga duta” antes mag-abot ang katapusan. (Mat. 24:14) Bangod nakahibalo sini, handa ka bala sa pagsaylo bisan sa guwa sang inyo sirkito diin daku pa ang kinahanglanon?

⁹ Nagretiro ka na bala? May yara ka bala masaligan nga kinitaan? Kon wala, makahimo ka bala sing kaugalingon nga trabaho? Kon indi ka makasaylo sa iban nga lugar, mabuligan mo bala ang isa ka katapo sang pamilya sa pag-alagad sa iban nga lugar?

¹⁰ Kon pagkatapos sang mapangamuyuon nga pagbinagbinag nabatyagan mo nga masarangan mo ang hangkat sa pagsaylo kon diin daku pa ang kinahanglanon, ipakighambal ini sa imo pamilya kag sa mga gulang sa inyo kongregasyon. Nagakaigo man nga ipakighambal ini sa inyo manugtatap sa sirkito, kay mahimo nga may nahibaluan sia nga malapit nga mga lugar nga nagakinahanglan sing bulig. Kon luyag mo magsaylo sa mas malayo nga mga lugar, mahimo mo sulatan ang Service Department sa sanga talatapan. Ihatag ang imo sulat sa mga gulang agod malakip nila ang ila mga obserbasyon kag mga rekomendasyon antes ini ipadala sa Sosiedad.

¹¹ Ano ang dapat mo ilakip sa imo sulat? Ang imo edad, petsa sang bawtismo, mga responsabilidad sa kongregasyon, minyo ukon indi minyo, kag kon bala may yara ka menor-de-edad nga mga kabataan. Importante sambiton nga masuportahan mo sa pinansial ang imo kaugalingon. Ihatag ang mga probinsia nga luyag mo alagaran, suno sa imo personal nga mga kinahanglanon.

¹² Ginatugot bala sang imo mga kahimtangan nga makaalagad ka kon diin daku pa ang kinahanglanon? Kon amo, nian, talupangda kon paano dalayon nga ginabubo ni Jehova ang bugana nga mga pagpakamaayo sa mga nagasalig sa iya samtang ginapakita nila ang espiritu sang pagsakripisyo sa kaugalingon!​—⁠Sal. 34:⁠8; Mal. 3:10.