Balagbag Bala Ini sa Pagbantala?

¹ Madamo nga tawo ang masako. Ang mga Saksi ni Jehova nalakip sa pinakamasako​—⁠nagatuon sang Pulong sang Dios, nagatambong sa mga miting sang kongregasyon, kag nagapakigbahin sa pag-alagad sa latagon. Dugang pa, masako kita sa pag-atipan sa sekular nga palamugnan, sa hilikuton sa balay ukon sa eskwelahan, kag sa madamo pa nga responsabilidad, nga ang tanan nagakinahanglan sing tion. Mabudlay ini ilabi na sa mga ulo sang pamilya.

² Bangod sang indi maayo nga mga kahimtangan sang pangabuhi sa nagkalainlain nga mga lugar, ang mga ulo sang mga panimalay mahimo nga dapat magtrabaho sing malawig kag sing lakas agod may palangitan-an. Kon ang sekular nga palamugnan nagakinahanglan sing daku nga bahin sang ila tion kag kusog, diutay na lamang ang mabilin para sa ila pagbantala nga hilikuton. Sanglit obligasyon nila nga amanan sing materyal nga mga butang ang ila pamilya, ang iban mahimo magbatyag nga diutay lamang ang ila mapakigbahin sa ministeryo. (1 Tim. 5:8) Matuod, may madamo nga pag-ipit karon may kaangtanan sa pagtigayon sang mga kinahanglanon sa kabuhi. Apang ang sekular nga palamugnan sang isa indi dapat mangin balagbag sa pagbantala sing maayong balita. (Mar. 10:13) Gani, dapat naton usisaon ang aton matuod gid nga kahimtangan.

³ Bangod ang kahimtangan sa kalibutan pirme nagabalhin, ang ulo sang pamilya mahimo maghinguyang sing madamo nga oras sa trabaho, sa tuyo nga makasupot sing kuwarta para sa wala ginapaabot nga mga problema. (1 Cor. 7:31) Walay sapayan nga ang dugang pa nga sekular nga trabaho daw nagahatag sing dugang pa nga materyal nga mga butang ukon dugang pa nga mga kahigayunan para sa paglingawlingaw kag pagliwaliwa, mangin mas malipayon kag mas kontento bala ang pamilya kon ginahimo ini nga ginasakripisyo ang tion para sa espirituwal nga mga paghimud-os kag regular nga pagtambong sa mga miting? Luyag gid naton likawan ang bisan ano nga butang nga magabutang sa katalagman sang aton espirituwalidad. Ang pagtuman sa laygay ni Jesus nga ‘magtipon sing bahandi sa langit’ kag mangin “manggaranon sa Dios” amo ang maalamon nga dalanon.​—⁠Mat. 6:19-21; Luc. 12:15-21.

⁴ Pangitaa Anay ang mga Intereses sang Ginharian: Gintudluan ni Jesus ang iya mga sumulunod nga unahon ang espirituwal nga mga butang sangsa iban pa nga butang. Ginlaygayan niya sila: “Indi gid kamo magkabalaka kag magsiling, ‘Ano bala ang kaunon naton?’ ukon, ‘Ano bala ang imnon naton?’ ukon, ‘Ano bala ang ipanapot naton?’” Ngaa masiling niya ini? Sia nagpaathag: “Kay ang inyo langitnon nga Amay nakahibalo nga kinahanglan ninyo ini tanan nga butang.” Kon kumbinsido gid kita sa sini, wala sing balagbag nga makapugong sa aton sa paghimo sang masunod nga ginsiling ni Jesus: “Padayon, nian, nga pangitaa anay ang ginharian kag ang iya pagkamatarong, kag ining tanan [nga kinahanglanon nga materyal] nga mga butang idugang sa inyo.” Pat-uron sang Dios nga matigayon naton ining kinahanglanon nga mga butang! (Mat. 6:31-33) Indi gid ini ang tion nga mawili sa dinagakaigo nga pagkabalaka sa pangabuhi ukon sa paghandum sing kasulhayan sa isa ka sistema sang mga butang nga magataliwan sa dili madugay.​—⁠1 Ped. 5:⁠7; 1 Juan 2:15-17.

⁵ Ang panguna nga katuyuan sang sekular nga palamugnan amo ang pag-aman sang materyal nga mga kinahanglanon sang isa. Apang ano kadamo ang kinahanglan naton? Si apostol Pablo nagsulat: “Kon kita may pagkaon kag panapton, mangin kontento na kita sa sining mga butang.” Nagatinguha bala kita nga matigayon ang labi pa sa sini? Kon amo, mahimo naton anihon ang mga resulta sang ginpaandam ni Pablo: “Ang mga determinado nga magmanggaranon nagakahulog sa pagsulay kag sa siod kag sa madamong binuang kag makahalalit nga kailigbon, nga nagatugdang sang mga tawo sa kalaglagan kag kahapayan.” (1 Tim. 6:​8, 9; Mat. 6:24; Luc. 14:33) Paano naton mahibaluan kon ginabalabagan kita sang sobra nga mga handum?

⁶ Kon bangod sang aton sekular nga mga palamugnan nagapakigbahin kita sing diutay kaayo sa pag-alagad sa latagon ukon wala naton makita ang kinahanglanon sa paghimo sing mga sakripisyo para sa maayong balita, nian kinahanglan nga bag-uhon naton ang aton mga prioridad. (Heb. 13:​15, 16) Ang mas maugdang nga estilo sang kabuhi makabulig gid agod madula ining balagbag sa aton pagbantala. Ang mga intereses sang Ginharian amo pirme ang dapat unahon may kaangtanan sa paggamit sang aton tion kag enerhiya.

⁷ Ang Pagpangabudlay nga Indi Walay Pulos: Ang mga pulong ni Pablo nagapalig-on sa aton nga “madamo pirme sing ginahimo sa hilikuton sang Ginuo, kay nahibaluan [naton] nga ang [aton] pagpangabudlay may kaangtanan sa Ginuo indi walay pulos.” (1 Cor. 15:58) Ang una gid nga “hilikuton sang Ginuo” amo ang pagbantala sing Ginharian kag paghimo-disipulo nga hilikuton. (Mat. 24:14; 28:​19, 20) Agod makapakigbahin sing bug-os kon posible, dapat mag-iskedyul kita sing tion para sa pag-alagad sa latagon kada semana kag manikasog nga indi paggamiton ini nga tion sa iban pa nga hilikuton. (Efe. 5:15-17) Nian, ang sekular nga palamugnan ukon ang bisan ano pa nga butang indi mangin balagbag sa aton ministeryo.

⁸ Kon handa kita nga ipaambit ang mga kamatuoran sang Biblia sa iban, maeksperiensiahan naton ang daku gid nga kalipay bangod sang paghatag. (Binu. 20:35) Paagi sa pagpakigbahin sa hilikuton nga pagbantala sing Ginharian, makalaum kita sa palaabuton nga may pagsalig, “kay ang Dios indi dimatarong nga malimot sang [aton] binuhatan kag sang gugma nga ginpakita [naton] tungod sa iya ngalan.”​—⁠Heb. 6:10.