Tagua

Ginpanugda nga mga Presentasyon para sa Pag-alagad sa Latagon

Kon Paano Gamiton Ining Suplemento

Ang kalabanan sang masunod nga mga presentasyon makit-an sa nagliligad nga mga guwa sang Ang Aton Ministeryo sa Ginharian. Gamita ini pirme sa imo pagpanaksi nga hilikuton, kag tan-awa kon ano nga mga resulta ang imo matigayon. Tagua ining suplemento, kag gamita ini kon nagahanda ka para sa ministeryo.

Mapukaw mo ang interes sang isa ka tawo sa Pulong sang Dios kon direkta ka gilayon sa punto. Magpautwas sing isa ka espesipiko nga pamangkot, nian basaha ang malip-ot nga sabat gikan sa Kasulatan. Mahimo mo tilawan ining mga panugda:

“Kon ginahunahuna mo ang palaabuton, nagabatyag ka bala sing paglaum ukon pagduhaduha? [Tuguti sia sa pagsabat.] Gintagna na sang Biblia ang makatulublag nga mga hitabo nga makita naton karon kag kon ano ang mangin resulta sini.”​—2 Tim. 3:​1, 2, 5; Hulu. 2:​21, 22.

“Kadamo gid sing nagakabalaka karon tuhoy sa pagtatap sa ila panglawas. Nakahibalo ka bala nga nagsaad ang Dios nga lubaron niya sing permanente ang tanan nga problema sa panglawas?”​—Isa. 33:24; Bug. 21:3, 4.

“Nakahibalo ka bala nga gintagna sang Biblia nga sa ulihi isa na lamang ka panguluhan ang magagahom sa bug-os nga kalibutan?”​—Dan. 2:​44; Mat. 6:​9, 10.

“Ano sa banta mo ang mangin kahimtangan kon si Jesucristo ang magagahom sa duta?”​—Sal. 72:​7, 8.

“Madamo nga tawo ang nagaantos sang diskriminasyon bangod lamang sang ila sekso, relihion, ukon rasa. Ano sa banta mo ang ginabatyag sang Dios tuhoy sining mga pagpasulabi?”​—Binu. 10:​34, 35.

“Nakahibalo kita nga madamo sing ginhimo nga milagro si Jesucristo sang iya adlaw. Kon makapangabay ka sa iya sing isa pa ka milagro, ano nga milagro ang luyag mo?”​—Sal. 72:12-​14, 16.

“Ang kalabanan nga tawo nakapoy na mamati sing mga problema. Solusyon naman ang luyag nila mabatian. Apang diin bala kita makakita sing matuod nga mga solusyon sa aton mga problema?”​—2 Tim. 3:​16, 17.

“Nakahibalo ka bala kon ano ang Ginharian nga ginapangamuyo mo sa Pangamuyo sang Ginuo (ukon, Amay Namon)?”​—Bug. 11:​15.

Mga Bulig sa Pag-umpisa sang Paghambalanay

Ang listahan sang mga pamangkot sa idalom, nga gintipon gikan sa mga topiko sang Reasoning nga libro, nagapakita sang numero sang pahina sa libro diin masapwan ang kada sabat:

Ngaa nagatigulang kita kag nagakapatay? (98)

Ano ang kahimtangan sang mga patay? (100)

May makatarunganon bala nga mga rason ang pagpati sa Dios? (145)

Nagaulikid gid bala ang Dios sa nagakatabo sa aton nga mga tawo? (147)

Isa gid bala ka matuod nga persona ang Dios? (147)

Ang tanan bala nga maayo nga tawo nagakadto sa langit? (162)

Dapat gid bala magkadto ang tawo sa langit agod makatigayon sing matuod kag malipayon nga palaabuton? (163)

Ngaa bala importante nga hibaluon kag gamiton ang personal nga ngalan sang Dios? (196)

Dios gid bala si Jesucristo? (212)

Ano ang pagahimuon sang Ginharian sang Dios? (227)

Ano ang katuyuan sang kabuhi sang tawo? (243)

Ano ang makabulig agod mapauswag ang pag-asawahay? (253)

Ginakahamut-an bala sang Dios ang tanan nga relihion? (322)

Paano mahibaluan sang tawo kon ano nga relihion ang husto? (328)

Daw ano ka gamhanan ang impluwensia ni Satanas sa kalibutan sa karon? (364)

Ngaa ginatugutan sang Dios ang pag-antos? (393)

Ngaa kadamo gid sing kalautan? (427)

Sin-o ang nagagahom sining kalibutan​—ang Dios ukon si Satanas? (436)

Mga Panugda sa Pagtanyag sang Ginapatuman nga Brosyur

“Walay duhaduha nga magaugyon ka nga madamo nga tawo ang nagapati sa Dios. Ang tanan nga nagapati sa iya nagaugyon nga may ginapatuman ang Dios sa aton. Ang ginabaisan sang mga tawo amo ang, Ano bala ang ginapatuman sang Dios sa aton?” Nian ipresentar ang Ginapatuman nga brosyur, buksi ang leksion 1, kag hinun-anunan ini.

“Bangod sang madamo nga problema sa kabuhi sang pamilya karon, nahunahuna mo bala kon ano ang yabi para matigayon ang kalipay sa pamilya?” Pagkatapos makasabat, ipaathag nga sa Biblia, ginpahayag sang Dios ang matuod nga sekreto sang kalipay sa pamilya. Basaha ang Isaias 48:​17. Nian buksi ang leksion 8 sa Ginapatuman nga brosyur, kag ipatalupangod ang pila ka ginkutlo nga bersikulo sa Biblia nga nagahatag sing masaligan nga panuytoy para sa kada katapo sang pamilya. Basaha ang mga pamangkot sa umpisa sang leksion. Pamangkuta sia kon luyag niya basahon ang mga sabat.

“Ining brosyur nagaunod sing masangkad nga kurso sang pagtuon nga nagakobre sang mga sadsaran nga mga panudlo sang Biblia. Sa kada pahina, masapwan mo ang mga sabat sa mga pamangkot nga ginapaligban sang mga tawo sing siniglo. Halimbawa, Ano ang katuyuan sang Dios para sa duta?” Buksi ang leksion 5, kag basaha ang mga pamangkot sa umpisa sang leksion. Pamangkuta ang tagbalay kon diin ang nagpainteres gid sa iya, nian basaha ang katumbas nga (mga) parapo, nga nagapatalupangod sa nagakaigo nga mga kasulatan. Ipaathag nga ang makaalayaw nga mga sabat madali lang makita kaangay sining bag-o lang mabinagbinag. Ipanugda nga magbalik ka liwat agod binagbinagon ang iban naman nga pamangkot.

“Ano sa banta mo ang kabangdanan sang masingki nga mga krimen nga ginahimo sang mga pamatan-on karon? Resulta bala ini sang kakulangan sing paghanas sang ginikanan? Ukon mahimo iban pa ang kabangdanan sini, subong sang impluwensia sang Yawa?” Tuguti sia sa pagsabat. Kon magsiling ang tawo nga bangod ini sang impluwensia sang Yawa, basaha ang Bugna 12:9, 12. Ipatalupangod ang papel sang Yawa sa pagsugyot sang kagamo sa kalibutan. Nian buksi ang Ginapatuman nga brosyur sa leksion 4, kag mamangkot kon ginapaligban bala niya kon diin naghalin ang Yawa. Nian basaha kag binagbinaga ang parapo uno kag dos. Kon ang tawo magsiling nga ang “kakulangan sing paghanas sang ginikanan” amo ang kabangdanan sang kasingki sang mga pamatan-on, basaha ang 2 Timoteo 3:​1-3 kag ipatalupangod ang mga kinaiya nga nagapadugang sa sining problema. Nian buksi ang Ginapatuman nga brosyur sa leksion 8, basaha ang parapo 5, kag padayuna ang paghinun-anon.

“Sa banta mo makatarunganon bala nga paabuton nga ang Manunuga magahatag sa aton sing ihibalo nga kinahanglanon naton agod matukod ang isa ka madinalag-on nga kabuhi sang pamilya?” Pagkatapos sia makasabat, ipakita ang Ginapatuman nga brosyur. Buksi sa leksion 8, kag ipaathag nga nagaunod ini sang mga prinsipio gikan sa Biblia para sa tagsa ka katapo sang pamilya. Mangabay nga ipasundayag sa iya kon paano gamiton ang brosyur upod sa Biblia agod mapanginpuslan gid ini.

“Bangod sang madamo nga problema nga ginaatubang naton karon sa modernong pagkabuhi, sa banta mo may mabulig ayhan ang pangamuyo sa aton? [Tuguti sia sa pagsabat.] Madamo ang nagasiling nga ang pangamuyo nagahatag sa ila sing nasulod nga kusog. [Basaha ang Filipos 4:​6, 7.] Walay sapayan sina, mahimo gihapon batyagon sang isa nga wala ginasabat ang iya mga pangamuyo. [Buksi ang Ginapatuman nga brosyur sa leksion 7.] Ginapaathag sining brosyur kon paano kita makabenepisyo sing labi sa pangamuyo.”

“Nagapakigsugilanon kami sa amon mga kaingod tuhoy sa kon ngaa kadamo gid sang mga relihion sa kalibutan. Apang, isa lamang ang Biblia. Sa imo opinyon, ngaa ayhan nagluntad ining kinagumon sa relihion? [Tuguti sia sa pagsabat. Buksi ang Ginapatuman nga brosyur sa leksion 13, kag basaha ang mga pamangkot.] Makita mo ang makaalayaw nga mga sabat sa sining mga pamangkot paagi sa pagbasa sining leksion.”

Pagkatapos mabilin ang Lalantawan kag Magmata! nga mga magasin sa isa ka tawo, pamangkuta sia kon puwede mo sia mabasahan sing isa ka malip-ot nga parapo. Kon magpasugot sia, buksi ang Ginapatuman nga brosyur sa leksion 5. Ipatalupangod ang mga pamangkot nga nalista sa umpisa sang leksion, kag pangabaya sia nga pamatian ang sabat sa una nga pamangkot samtang ginabasa mo ang una nga parapo. Pagkatapos mabasa ang parapo, basaha ang pamangkot kag pamatii ang iya sabat. Itanyag ang brosyur, kag kon batunon, tinguhai nga magbalik agod makuha ang iya mga sabat sa masunod nga duha ka pamangkot sa listahan.

Mga Panugda sa Pagtanyag sang Ihibalo nga Libro

Samtang ginauyatan mo ang Biblia, mag-umpisa paagi sa pagsiling: “May ginapaambit kami nga isa ka kasulatan para sa tanan diri sa inyo lugar sini nga adlaw. Nagasiling ini . . .” Basaha ang Juan 17:3, kag nian mamangkot: “Natalupangdan mo bala kon ano ang ginasaad kon may husto kita nga sahi sang ihibalo? [Tuguti sia sa pagsabat.] Diin ayhan masapwan ining ihibalo?” Pagkatapos sia makasabat, ipakita ang Ihibalo nga libro, kag magsiling: “Ining libro nagapatalupangod sa ihibalo nga nagadul-ong sa kabuhi nga walay katapusan. Amo nga ginasabat sini ang kinaandan nga mga pamangkot sang mga tawo tuhoy sa Biblia.” Ipakita ang listahan sang kaundan, kag pamangkuta sia kon napaligban na bala niya ining mga tema.

“Sa banta mo nabalaka gid bala ang Dios tuhoy sa mga inhustisya kag pag-antos nga makita naton sa palibot ukon naeksperiensiahan naton mismo? [Tuguti sia sa pagsabat.] Ang Biblia nagapasalig sa aton nga ginahigugma kita sang Dios kag buligan niya kita sa tion sang kalisdanan.” Basaha ang mga bahin sang Salmo 72:12-​17. Buksi ang Ihibalo nga libro sa kapitulo 8, kag ipatalupangod nga nagahatag ini sing makalulugpay nga sabat sa isa ka pamangkot nga ginapautwas sang minilyon, Ngaa ginatugutan sang Dios ang pag-antos? Kon posible, binagbinaga ang mga panghunahuna gikan sa Kasulatan nga ginkobrehan sa parapo 3 tubtob 5, ukon himua ini sa pagduaw liwat.

“Kalabanan sa aton namatyan na sing hinigugma. Sa banta mo makita pa ayhan naton sila liwat? [Tuguti sia sa pagsabat.] Ginpamatud-an ni Jesus nga sarang pa mabanhaw ang aton mga hinigugma. [Basaha ang Juan 11:11, 25, 44.] Bisan pa natabo ini siniglo na ang nagligad, ginapakita sini kon ano ang ginsaad sang Dios nga pagahimuon para sa aton.” Buksi ang Ihibalo nga libro sa larawan sa pahina 85, kag basaha ang kapsion. Nian ipakita ang larawan sa pahina 86, kag komentuhi ini. Magbilin sing sarang mahambalan sa masunod nga pagduaw paagi sa pagpamangkot: “Luyag mo bala mahibaluan ang kabangdanan kon ngaa nagatigulang kag nagakapatay ang mga tawo?” Magbalik agod mabinagbinag ang kapitulo 6.

“Nakahibalo ka bala kon ngaa luyag sang mga tawo mabuhi sing malawig?” Pagkatapos makasabat, buksi ang Ihibalo nga libro sa kapitulo 6, kag basaha ang parapo 3. Mangatarungan sa ginkutlo nga mga kasulatan. Nagapatuhoy sa duha ka pamangkot sa katapusan sang parapo, pamangkuta sia kon luyag niya mahibaluan ang sabat. Kon paborable ang iya reaksion, binagbinaga ang masunod nga pila ka parapo.

“Ginapamangkot namon ang mga tawo kon nagapati sila sa sini . . .” Basaha ang Genesis 1:1, kag nian mamangkot: “Nagaugyon ka bala sa ginasiling sini?” Kon mag-ugyon sia, nian isiling: “Pareho kita. Apang, sa banta mo bangod gintuga sang Dios ang tanan nga butang, sia man bala ang responsable sa kalautan?” Pagkatapos mapamatian ang iya sabat, basaha ang Manugwali 7:​29. Buksi ang Ihibalo nga libro sa kapitulo 8, kag basaha ang parapo 2. Kon indi sia mag-ugyon sa Genesis 1:1, palig-una sia nga usisaon ang mga ebidensia nga may Manunuga nga nagaluntad.​—Tan-awa ang Reasoning nga libro, pahina 84-6.

“Nagaugyon ka bala nga bangod madasig katama ang pagbag-o sang mga prinsipio sa moral, kinahanglanon gid naton ang isa ka masaligan nga giya sa kabuhi? [Tuguti sia sa pagsabat.] Bisan pa amo ini ang pinakadaan nga libro, ang Biblia nagahatag sing praktikal nga laygay para sa moderno nga pagkabuhi kag sa malipayon nga kabuhi sang pamilya.” Nian buksi ang kapitulo 2 sa Ihibalo nga libro, kag basaha ang parapo 10 kag ang una nga dinalan sang parapo 11, lakip ang 2 Timoteo 3:​16, 17.

“Luyag mo bala mahibaluan ang buas-damlag naton kag sang duta? [Tuguti sia sa pagsabat.] Ginasumaryo sang Biblia ang palaabuton sa isa lamang ka tinaga​—Paraiso! Diri sini ginbutang sang Dios ang una nga mag-asawa sang gintuga niya sila. Talupangda ining paglaragway kon daw ano ini katahom.” Buksi ang Ihibalo nga libro sa pahina 8, kag basaha ang parapo 9, sa idalom sang subtitulo nga “Kabuhi sa Paraiso.” Nian binagbinaga ang mga punto sa parapo 10, kag basaha ang ginkutlo nga kasulatan, ang Isaias 55:10, 11. Pangabaya sia kon luyag niya padayunon ang paghinun-anon kon ano ang mangin kabuhi sa napasag-uli nga Paraiso, nga nagakobre sa parapo 11-16.

Kon nagaduaw liwat sa napahamtangan mo sang Lalantawan kag Magmata! nga magasin, mahimo mo ini isiling:

“Sang nagligad ko nga pagduaw, nalipay ako nga nakabilin sa imo sang Lalantawan nga magasin. Ayhan natalupangdan mo nga ang bug-os nga titulo sining magasin amo Ang Lalantawan Nagabantala Sang Ginharian ni Jehova. Luyag ko ipaathag sa imo karon kon ano ining Ginharian kag kon ano ang kahulugan sini para sa imo kag sa imo pamilya.” Nian buksi ang Ginapatuman nga brosyur sa leksion 6, kag basaha kag binagbinaga ini tubtob ginatugot sang iya tion.

“Naduaw ko na ikaw kasan-o lang kag nakabilin ako sang Lalantawan kag Magmata! nga mga magasin. Ining mga magasin nagadugang sang pagtahod sang mga tawo sa Biblia kag sa panuytoy sini sa moral. Bangod nabatyagan ko nga dapat mahangpan gid sang tagsatagsa ang Pulong sang Dios, nagbalik ako agod ipakita sa imo kon ano ang makabulig sa imo agod mahangpan ini.” Ipakita ang Ginapatuman nga brosyur ukon ang Ihibalo nga libro, kag magtanyag sing isa ka pagtuon sa Biblia.

Kon nagatanyag sing bisan ano nga daan nga 192-pahina nga libro, mahimo mo tilawan ini nga presentasyon:

“Ginahatagan gid sang importansia ang pagkuha sang de-kalidad nga edukasyon. Sa banta mo, ano nga sahi sang edukasyon ang dapat kuhaon sang isa agod mapat-od ang labing daku nga kalipay kag kadalag-an sa kabuhi? [Tuguti sia sa pagsabat. Nian basaha ang Hulubaton 9:​10, 11.] Ini nga libro [basaha ang titulo sang libro nga ginatanyag mo] ginpasad sa Biblia. Ginapatalupangod sini ang lamang nga tuburan sang ihibalo nga makadul-ong sa kabuhi nga walay katapusan.” Ipakita ang isa ka espesipiko nga halimbawa sa libro, kag palig-una sia nga basahon ini.

Iban Pa nga Publikasyon

Ginpanugda nga mga presentasyon para sa iban pa nga libro kag brosyur nga masapwan sa Watch Tower Publications Index sa idalom sang:

Presentations

List by Publication

Ang Direkta nga Pagpalapit

Agod makasugod sing isa ka pagtuon sa Biblia, tilawi ang isa sining direkta nga mga pagpalapit:

“Nakahibalo ka bala nga sa pila lamang ka minuto, makita mo ang sabat sa isa ka importante nga pamangkot sa Biblia? Halimbawa, . . .” Nian, ipautwas ang isa ka pamangkot nga makita sa umpisa sang isa sang mga leksion sa Ginapatuman nga brosyur kag nga sa banta mo makaganyat sa indibiduwal.

“Nagduaw ako agod ipakita sa imo ang amon programa tuhoy sa libre nga pagtuon sa Biblia. Mga lima lamang ini ka minuto. Puwede ka bala sa lima ka minuto?” Kon ang sabat huo, gamita ang leksion 1 sa Ginapatuman nga brosyur agod mapasundayag ang pagtuon, nga nagabasa sing isa ukon duha ka kasulatan. Pagkatapos, magpamangkot: “San-o ka may 15 minutos agod makobrehan naton ang masunod nga leksion?”

“Madamo nga tawo ang may Biblia, apang wala nila marealisar nga yari diri ang mga sabat sa tanan naton nga importante nga pamangkot tuhoy sa palaabuton. Nagagamit sining bulig sa pagtuon [ang Ginapatuman nga brosyur ukon ang Ihibalo nga libro] sa isa ka oras ukon kapin pa kada semana, sarang mo matigayon ang sadsaran nga paghangop sa Biblia sa sulod lamang sang pila ka bulan. Malipay ako nga ipakita sa imo kon paano ginahimo ining programa.”

“Nagduaw ako agod itanyag sa imo ang isa ka libre nga kurso sa Biblia sa puluy-an. Kon tugutan mo, luyag ko ipasundayag sa imo sa pila lamang ka minuto kon paano ginahinun-anunan sang mga tawo sa mga 200 ka kadutaan ang Biblia sa puluy-an subong mga pamilya. Mahimo naton magamit ang bisan diin sa sining mga topiko subong basihan sang aton paghinun-anon. [Ipakita ang listahan sang kaundan sang Ihibalo nga libro.] Diin sini ang ilabi nga nagpainteres sa imo?” Hulata sia nga makapili. Buksi ang kapitulo nga ginpili, kag sugdi ang pagtuon sa una nga parapo.

“Nagatanyag ako sing libre nga pagtudlo sa Biblia kag may bakante pa ako sa akon iskedyul para sa dugang nga mga estudyante. Amo ini ang amon ginagamit nga bulig sa pagtuon sang Biblia. [Ipakita ang Ihibalo nga libro.] Ining kurso nagalawig lamang sing pila ka bulan kag nagasabat ini sa mga pamangkot kaangay sang: Ngaa ginatugutan sang Dios ang pag-antos? Ngaa nagatigulang kita kag nagakapatay? Ano ang nagakatabo sa aton napatay nga mga hinigugma? Kag paano kita makapalapit sa Dios? Puwede ko bala mapasundayag ang isa ka leksion?”

Kon may makita ka nga epektibo nga presentasyon nga nagapalambo sing interes, dapat padayon mo ini nga gamiton! Ipasibu lang ini sa tanyag nga literatura kada bulan.