Ang Epekto sang mga Video nga Nagapanaksi
1 “Antes pa sia makatuon sa paglakat, ginatan-aw na sang amon anak nga lalaki ang video. Pirme niya ini ginatan-aw. Daw ano ka makalilipay nga may yara kasangkapan nga nagapatudok sang gugma kay Jehova sa amon mga kabataan!” Ano nga video ang ginapatuhuyan sining Cristianong ginikanan? Ang video nga natig-uluhan Noah—He Walked With God. Ang isa ka di-Saksi nga iloy nga ang iya anak nga lalaki nakatan-aw sing Noah nga video sa iban nga balay nagpadala sa opisina sang sanga sing $90 nga donasyon kag nangabay kon may iban pa kita nga video para sa mga kabataan. Ang mga video nga ginhimo sang organisasyon ni Jehova may daku gid nga epekto sa mga bata kag sa mga tigulang.
2 Sa Pamilya: Sa tapos matan-aw sang isa ka Saksi nga pamilya ang Jehovah’s Witnesses Stand Firm Against Nazi Assault, ang iloy nagsaysay: “Ginpamalandungan ko sa bug-os nga adlaw kon paano ginbuligan ni Jehova ang ordinaryo nga mga tawo nga mabatas ang tumalagsahon nga mga butang! Ang paghunahuna sa sini nagpahanumdom sa akon kon daw ano gid ka diutay ang akon mga problema. Ang pagtan-aw sa sini nga video upod sa akon mga kabataan nagbulig sa ila nga mahangpan sing labi pa ang kinahanglanon nga magsandig kay Jehova. Paagi sa pagbinagbinag sini sa ila pagkatapos, nabuligan namon ang amon mga anak nga babayi nga masangkapan sing labi pa nga atubangon ang bisan ano man nga mga pag-ipit kag mga paghingabot nga masumalang nila.”
3 Sa Eskwelahan: Subong bahin sa isa ka report, ginpatan-aw sang tin-edyer nga Saksi ang isa ka bahin sang video nga Stand Firm sa iya klase. Sang una, nagsiling ang maestra nga indi niya gusto ang mga Saksi. Sang matan-aw niya ang video, sia nagsiling: “Ginbag-o sini sing bug-os ang akon panan-aw sa mga Saksi ni Jehova. Nagapangako ako nga sa masunod nga magduaw sila sa akon balay, pamatian ko sila kag magtuon sing Biblia upod sa ila!” Ngaa nagbag-o ang iya panan-aw sa aton? Nagsiling sia nga bangod ini sa aton “matuod nga gugma kag katutom.”
4 Sa Ministeryo: Nasugilanon sang isa ka sister ang isa ka babayi nga nagapangalag-ag sa pagbaton sa literatura, bisan pa may mga pamangkot sia tuhoy sa aton kag sa aton mga pagtuluuhan. Nagbalik ang sister nga dala ang video nga Jehovah’s Witnesses—The Organization Behind the Name kag ginpatan-aw ini sa babayi kag sa iya bana. Nagdayaw gid sila kag nagpasugot sa pagtuon sa Biblia. Bangod sang maayo nga pagpanaksi sa ila, ginpahisanto nila ang ila kabuhi sa kabubut-on sang Dios.
5 Ginagamit mo bala ang video agod matigayon ang pinakamaayo nga posible nga epekto?