Isa ka Mapagsik nga Reaksion!
1 Ang Cristianong mga pamilya sa nagkalainlain nga lugar nagpabutyag sang ila mapagsik nga pagpasalamat para sa video nga Young People Ask—How Can I Make Real Friends? Ang isa ka amay sa Estados Unidos nagsiling nga pagkatapos nila ini matan-aw, mahipos nga nagpulungko ang iya mga anak nga lalaki—nahangpan nila kag nanamian gid sila sang video! Ang isa ka report sa Malawi nagsiling nga nahangpan ini sang lamharon nga mga kauturan bangod naeksperiensiahan nila ang amo man nga mga pag-ipit gikan sa ila mga katubotubo sa eskwelahan. Ang isa ka amay sa Alemanya nagsiling tuhoy sa video: “Ginakabig ko ini nga sabat sa akon mga pangamuyo.” Ang isa ka pamatan-on nagsiling: “Salamat gid sa inyo pagpahanumdom sa akon nga nagaulikid gid gali si Jehova sa akon.” Ang isa ka gulang sa New Zealand nagreport: “Nagbulig ini sa isa sang amon mga tin-edyer nga makapanumbalik.” Isa ka may bana na nga utod ang nagtan-aw sini kag nagsiling: “Mas maayo kuntani nga ining video matan-aw sang tanan nga pamatan-on nga yara sa kamatuoran agod mapahulag nga himuon ang kamatuoran nga mangin ila!” Mga pamilya, ngaa indi ninyo tan-awon ini liwat? Pagkatapos, binagbinaga sing ululupod ang masunod nga mga pamangkot.
2 Introduksion: Ano bala ang isa ka matuod nga abyan?—Hulu. 18:24.
3 Mga Balagbag sa Pag-abyanay: Paano mo malandas ang balatyagon nga ginalikawan ka sang iban? (Filip. 2:4) Ngaa dapat ka mangin handa sa pagpauswag sang imo personalidad, kag sin-o ang makabulig sa imo sa paghimo sini? Ano ang himuon mo agod magdamo ang imo abyan, kag sa diin mo sila masapwan?—2 Cor. 6:13.
4 Pagpakig-abyan sa Dios: Paano mo mangin abyan si Jehova, kag ngaa takus ini panikasugan? (Sal. 34:8) Sin-o ang makapabakod sang imo pagpakig-abyan sa Dios?
5 Ang Sayop nga mga Abyan: Sin-o ang indi maayo nga mga kaupdanan? (1 Cor. 15:33) Paano ang sayop nga mga abyan makadul-ong sa imo sa espirituwal nga kalaglagan? Paano makatudlo sa imo ang kasaysayan sa Biblia tuhoy kay Dina?—Gen. 34:1, 2, 7, 19.
6 Isa ka Modernong-Adlaw nga Drama: Paano nakaapektar ang kasubo kay Tara? Paano niya ginpakamatarong ang iya pagpakig-upod sa kalibutanon nga mga pamatan-on? Sa anong mga katalagman nila sia gindala? Ngaa napaslawan ang iya mga ginikanan nga makita ang katalagman nga iya nasudlan, kag sa anong panimuot nila sia ginbuligan nga makabangon sa espirituwal? Paano nangin matuod nga abyan ang isa ka payunir nga utod nga babayi kay Tara? Ngaa dapat tumanon sang mga Cristiano ang Hulubaton 13:20 kag Jeremias 17:9? Anong importante nga leksion ang natun-an ni Tara?
7 Konklusion: Anong mga leksion ang imo natun-an sa sini nga video? Paano mo ini magamit sa pagbulig sa iban?—Sal. 71:17.