Bag-o nga Programa sang Sirkito nga Asambleya
1 Agod mangin malig-on sa pagtuo sa isa ka indi malig-on nga kalibutan, dapat kita magsalig kay Jehova. Paano naton mapakita ini nga pagsalig sa aton matag-adlaw nga pagkabuhi? Paano ang pagsalig kay Jehova nagaapektar sa aton personal nga pagkabuhi kag sa aton pamilya? Paano ini nagabulig agod mabatuan naton ang impluwensia sang kalibutan ni Satanas? Ang programa sa sirkito nga asambleya para sa 2003 nagasabat sining mga pamangkot. Ang tema sini amo ang: “Magsalig kay Jehova kag Maghimo Sing Maayo.”—Sal. 37:3.
2 Ang aton pagsalig kay Jehova wala lamang ginapakita sa pinasahi nga mga okasyon ukon sa ital-ital nga mga tion. Nagaapektar ini sa tanan nga aspekto sang aton matag-adlaw nga pagkabuhi. Ginapadaku ini sa nagabukas nga pamulongpulong, “Magsalig kay Jehova sa Tanan nga Tion.” (Sal. 62:8) Ipakita sa aton sang apat-sing-bahin nga simposium nga “Pagpakita Sing Pagsalig kay Jehova” kon paano masapwan kag maaplikar ang pasad sa Biblia nga impormasyon nga makabulig sa aton nga mangin madinalag-on ang pag-asawahay, maatubang ang mga problema nga nagautwas sa sulod sang pamilya, kag matigayon ang aton materyal nga mga kinahanglanon.
3 Ginatinguhaan sang kalibutan ni Satanas nga ipilit sa aton ang tiko nga pagtamod sa kon ano ang husto kag sayop kag gumunon kon ano dapat ang aton mga prioridad. (Isa. 5:20) Ang mga pamulongpulong nga “Magbantay Batok sa Walay Pulos nga mga Butang sa Kabuhi” kag “Isikway ang Malain—Mangin Manughimo Sang Maayo” magapalig-on sang aton determinasyon nga sakdagon ang mataas nga mga talaksan ni Jehova.—Amos 5:14.
4 Kon tapuson na ni Jehova ang malaut nga sistema sang mga butang karon, ang mga alagad sang Dios dapat magsalig sa iya sing bug-os. Ginapadaku ini sa pamulongpulong publiko, “Ang Kaluwasan Gikan sa Kalisdanan Sang Kalibutan Malapit Na.” Pagkatapos sini, pangabayon kita nga binagbinagon ang aton kaugalingon sa bahin nga “Mangin Takus Ka Bala sa Ginharian Sang Dios?” Ang programa magahinakop sa isa ka pagpalig-on nga “Magsalig sa mga Saad ni Jehova.”
5 Ang talalupangdon nga bahin sang tagsa ka asambleya amo ang pamulongpulong sa bawtismo. Ang bisan sin-o nga luyag magpabawtismo dapat magpahibalo sing abanse sa nagadumala nga manugtatap agod mahimo ang kinahanglanon nga mga kahimusan.
6 Sa sining walay kapat-uran nga mga tion, si Jehova lamang ang matuod nga tuburan sang pagsalig kag kalig-unan. (Sal. 118:8, 9) Kabay nga pabakuron naton tanan ang aton pagsalig sa iya paagi sa pagtambong sa bug-os nga programa sang sirkito nga asambleya.