Ipakita ang Cristianong Pagkamainunungon Kon ang Isa ka Paryente Gindisfellowship
1. Ano nga sitwasyon ang mahimo magtilaw sa pagkamainunungon sang isa ka Cristiano?
1 Ang higot sa ulot sang mga katapo sang pamilya mahimo mangin mabaskog katama. Mangin isa ini ka pagtilaw sa isa ka Cristiano kon ang iya tiayon, bata, ginikanan, ukon suod nga paryente gindisfellowship ukon nagdisassociate sa kongregasyon. (Mat. 10:37) Paano dapat pakig-angutan sang mainunungon nga mga Cristiano ini nga paryente? May kinatuhayan bala kon ang gindisfellowship nagapuyo sa inyo balay? Una, repasuhon naton kon ano ang ginasiling sang Biblia sa sini nga tema. Ang prinsipio sini pareho nga naaplikar sa mga gindisfellowship ukon nagdisassociate sang ila kaugalingon.
2. Suno sa Biblia, paano dapat pakig-angutan sang mga Cristiano ang mga ginsikway sa kongregasyon?
2 Kon Paano Pakig-angutan ang mga Ginsikway: Ginsugo sang Pulong sang Dios ang mga Cristiano nga indi makig-upod sa isa ka tawo nga ginsikway sa kongregasyon: “Mag-untat sa pagpakig-upod kay bisan sin-o nga ginatawag nga utod nga isa ka makihilawason ukon isa ka tawo nga mahamkunon ukon isa ka sumilimba sang idolo ukon isa ka mapasipalahon ukon isa ka palahubog, ukon isa ka manugpangwarta, bisan sa pagkaon dili kamo magpakig-upod sa sining tawo. . . . Kuhaa ang tawo nga malaut gikan sa tunga ninyo.” (1 Cor. 5:11, 13) Ang mga pinamulong ni Jesus nga narekord sa Mateo 18:17 may labot man sa sini: “Bilangon mo [ang ginsikway nga tawo] nga subong sang tawo sang mga pungsod kag subong manugsukot sang buhis.” Nakahibalo gid sadto ang mga tagpalamati ni Jesus nga wala nagapakig-abyan ang mga Judiyo sa mga Gentil kag ginakabig nila ang mga manugsukot sang buhis subong mga ginsikway. Busa ginatudluan ni Jesus ang iya mga sumulunod nga indi makig-upod sa ginsikway nga mga tawo.—Tan-awa Ang Lalantawan sang Marso 15, 1982, pahina 12-13 (Septiembre 15, 1981, p. 18-20 sa Ingles).
3, 4. Ano nga sahi sang pagpakig-upod sa gindisfellowship kag sa nagdisassociate nga mga tawo ang ginadumili?
3 Buot silingon sini nga ang mainunungon nga mga Cristiano indi dapat makigsugilanon tuhoy sa espirituwal sa kay bisan sin-o nga ginsikway sa kongregasyon. Apang kapin pa ang nadalahig sa sini. Ang Pulong sang Dios nagasiling nga “bisan sa pagkaon dili [kita dapat] magpakig-upod sa sining tawo.” (1 Cor. 5:11) Busa, nagalikaw man kita sa sosyal nga pagpakig-upod sa ginsikway nga tawo. Dapat likawan naton ang pagpakig-upod sa iya sa isa ka piknik, sinalusalo, paghampang sang bola, ukon sa pagpamakal ukon sa sinehan ukon ang pagkaon upod sa iya sa balay man ukon sa isa ka restawran.
4 Paano naman ang pagpakighambal nga wala labot sa espirituwal sa isa ka gindisfellowship nga tawo? Bisan pa wala ginsambit sang Biblia ang tanan nga posible nga sitwasyon, ang 2 Juan 10 nagabulig sa aton nga mahibaluan ang pagtamod ni Jehova sa sini: “Kon ang bisan sin-o magkadto sa inyo kag wala nagadala sining panudlo, indi sia pagbatuna sa inyo puluy-an ukon maghambal sing isa ka panamyaw sa iya.” Nagkomento sa sini, Ang Lalantawan sang Marso 15, 1981, pahina 17 (Septiembre 15, 1981, p. 25 sa Ingles), nagasiling: “Ang isa ka simple nga ‘kamusta’ sa isa mahimo mangin una nga tikang nga maglambo sa pagpakigsugilanon kag mahimo pa gani sa pagpakig-abyan. Luyag bala naton maghimo sining una nga tikang sa gindisfellowship nga tawo?”
5. Kon madisfellowship ang isa ka tawo, ano ang iya mawasi?
5 Sa pagkamatuod, kaangay sa ginasiling sa pahina 23 (p. 31 sa Ingles) sang amo gihapon nga guwa sang Ang Lalantawan: “Ang katunayan amo nga kon ang isa ka Cristiano magpadala sa sala kag dapat i-disfellowship, madamo ang iya nawasi: ang iya nahamut-an nga tindog sa Dios; . . . matam-is nga pagpakig-upod sa mga kauturan, lakip sa madamo nga pagpakig-upod niya sa Cristianong mga himata.”
6. Kinahanglan bala utdon sang isa ka Cristiano ang tanan nga pagpakig-upod sa isa ka gindisfellowship nga paryente nga nagapuyo upod sa iya? Ipaathag.
6 Nagapuyo sa Isa Lamang ka Balay: Nagakahulugan bala ini nga ang mga Cristiano nga nagapuyo kaupod sa isa ka gindisfellowship nga katapo sang pamilya dapat maglikaw sa pagpakighambal, pag-upod sa pagkaon, kag sa pagpakig-upod sa sining isa kon nagahimo sila sa ila mga hilikuton sa adlaw-adlaw? Ang footnote sa pahina 22 sang Ang Lalantawan sang Abril 15, 1991, nagasiling: “Kon sa panimalay sang isa ka Cristiano may isa ka paryente nga nadisfellowship, mangin bahin gihapon sia sang normal kag matag-adlaw nga mga pagpakig-angot kag mga hilikuton sang panimalay.” Busa, ang mga katapo sang pamilya ang magadesisyon kon tubtob diin mahimo makaupod ang gindisfellowship nga katapo sang pamilya sa pagkaon ukon sa pagpakigbahin sa iban nga hilikuton sa balay. Apang, indi nila luyag nga maghatag sing impresyon sa mga kauturan sa ila kongregasyon nga amo man gihapon ang kahimtangan antes natabo ang pagdisfellowship.
7. Paano magabag-o ang espirituwal nga pagpakig-upod sa balay kon ang isa ka katapo sang pamilya gindisfellowship?
7 Apang, Ang Lalantawan sang Marso 15, 1982, pahina 21 (Septiembre 15, 1981, p. 28 sa Ingles), nagapatalupangod tuhoy sa gindisfellowship ukon nagdisassociate nga tawo: ‘Nabugto gid ang espirituwal nga higot anay. Matuod ini bisan kon tuhoy sa iya mga himata, lakip yadtong sa sulod sang iya panimalay. Magakahulugan ina sang mga pagbalhin sa espirituwal nga pagpakig-upod nga mahimo nagaluntad anay sa balay. Halimbawa, kon ang bana gindisfellowship, ang iya asawa kag kabataan indi mahim-os nga magahiwat sia sing pamilya nga pagtuon sang Biblia ukon manguna sa pagbasa sang Biblia kag pangamuyo. Kon luyag niya mangamuyo, subong sang sa tion sang pagkaon, kinamatarong niya nga himuon ina sa iya kaugalingon nga balay. Apang makapangamuyo sila sang ila kaugalingon nga pangamuyo sa Dios sing hipos. (Hulu. 28:9; Sal. 119:145, 146) Ano abi kon ang gindisfellowship nga tawo sa balay luyag mag-upod kon ang pamilya magabasa sing tingob sang Biblia ukon magatuon sang Biblia? Mahimo sia patambungon sang iban agod mamati kon indi sia magatinguha sa pagtudlo sa ila ukon sa pagpaambit sang iya relihioso nga mga ideya.’
8. Ano ang responsabilidad sang Cristianong mga ginikanan sa ila menor de edad nga bata nga gindisfellowship nga nagapuyo sa balay?
8 Kon isa ka menor de edad nga bata nga nagapuyo sa balay ang gindisfellowship, ang Cristianong mga ginikanan gihapon ang responsable sa pagpadaku sa iya. Ang Lalantawan sang Nobiembre 15, 1988, pahina 20, nagasiling: “Subong nga padayon sila nga magaaman sa iya sang pagkaon, panapton, kag pasilungan, dapat nila tudluan kag disiplinahon sia nahisuno sa Pulong sang Dios. (Hulu. 6:20-22; 29:17) Busa ang mahigugmaon nga mga ginikanan magahimos sing isa ka pagtuon sang Biblia sa balay upod sa iya, bisan pa nga gindisfellowship sia. Mahimo nga makatigayon sia sing nagatadlong nga benepisyo gikan sa ila pagtuon upod sa iya sing isahanon. Ukon mahimo sila mamat-od nga sarang sia makapadayon sa pagpakigbahin sa kahimusan sa pagtuon sang pamilya.”—Tan-awa man Ang Lalantawan sang Oktubre 1, 2001, pahina 16-17.
9. Paano dapat pakig-angutan sang isa ka Cristiano ang gindisfellowship nga paryente nga nagapuyo sa guwa sang puluy-an?
9 Mga Paryente nga Wala Nagapuyo sa Balay: “Tuhay ang kahimtangan kon ang nadisfellowship ukon nadisassociate isa ka himata nga nagaistar sa guwa sang pamilya kag puluy-an,” siling sang Ang Lalantawan sang Abril 15, 1988, pahina 28. “Ayhan posible nga indi na gid makig-angot sa himata. Bisan pa nga may pila ka bagay sa pamilya nga nagakinahanglan sing pagpakig-angot, dapat gid ini latiran,” nahisuno sa sugo sang Dios nga “mag-untat sa pagpakig-upod kay bisan sin-o” nga nagapakasala sing di-mahinulsulon. (1 Cor. 5:11) Dapat panikasugan sang mainunungon nga mga Cristiano nga likawan ang di-kinahanglanon nga pagpakig-upod sa sining paryente, pati ang transaksion sa mga negosyo dapat limitado gid katama.—Tan-awa man Ang Lalantawan sang Marso 15, 1982, pahina 22-3 (Septiembre 15, 1981, p. 29-30 sa Ingles).
10, 11. Ano ang dapat binagbinagon sang isa ka Cristiano antes pahanugutan ang isa ka gindisfellowship nga paryente nga magpuyo sa balay?
10 Ginpatuhuyan sang Ang Lalantawan ang isa pa ka sitwasyon nga mahimo mag-utwas: ‘Apang ano kon ang suod nga himata, subong sang anak ukon ginikanan nga wala nagaistar sa balay, gindisfellowship kag sang ulihi maluyag nga mag-istar liwat sa balay? Ang pamilya makapamat-od kon ano ang himuon depende sa kahimtangan. Halimbawa, ang gindisfellowship nga ginikanan mahimo nga nagamasakit ukon indi na makasarang sa pag-atipan sang iya kaugalingon sa pinansyal ukon sa pisikal. Ang Cristianong kabataan may Makasulatanhon kag moral nga obligasyon sa pagbulig. (1 Tim. 5:8) Ang pagahimuon magadepende sa matuod nga mga kinahanglanon sang ginikanan, sa iya panimuot kag sa pag-ulikid sang ulo sang panimalay sa espirituwal nga kaayuhan sang panimalay.’—Ang Lalantawan sang Marso 15, 1982, pahina 21-2 (Septiembre 15, 1981, p. 28-9 sa Ingles).
11 Tuhoy sa isa ka bata, ang amo man nga artikulo nagapadayon: “Kon kaisa ginbaton liwat sang Cristianong mga ginikanan sa balay ang gindisfellowship nga bata nga nagamasakit sa pisikal ukon emosyonal. Apang sa kada kaso matimbang sang mga ginikanan ang indibiduwal nga mga sirkunstansia. Ang gindisfellowship bala nga bata nagkinaugalingon, kag indi na karon makasarang? Ukon nagbalik bala sia bangod mas mahapos ini nga pagkabuhi? Ano ang tuhoy sa iya moral kag panimuot? Magadala bala sia sing ‘lebadura’ sa balay?—Gal. 5:9.”
12. Ano ang pila ka mga benepisyo sang pagdisfellowship?
12 Mga Benepisyo sang Pagkamainunungon kay Jehova: Ang pagkooperar sa Makasulatanhon nga kahimusan sa pagdisfellowship kag paglikaw sa di-mahinulsulon nga mga makasasala mapuslanon. Ginatipigan sini ang katinlo sang kongregasyon kag ginapain kita subong nagasakdag sang mataas nga talaksan sa moral sang Biblia. (1 Ped. 1:14-16) Ginaamligan kita sini sa malain nga mga impluwensia. (Gal. 5:7-9) Ginahatagan man sini sing kahigayunan ang makasasala nga makapanginpulos sing bug-os sa nabaton nga disiplina, nga makabulig sa iya nga makapatubas sing “mahidaiton nga bunga, nga amo, ang pagkamatarong.”—Heb. 12:11.
13. Anong pagbag-o ang ginhimo sang isa ka pamilya, kag ano ang nangin resulta?
13 Pagkatapos makabati sing isa ka pamulongpulong sa isa ka sirkito nga asambleya, narealisar sang isa ka utod nga lalaki kag sang iya kapid nga babayi nga kinahanglan nila bag-uhon ang ila pagpakig-angot sa ila iloy, nga nagapuyo sa iban nga puluy-an kag nadisfellowship sa anom ka tuig. Sa gilayon pagkatapos sang asambleya, ginduaw sang utod nga lalaki ang iya iloy, kag pagkatapos niya sia pasaligon sang ila gugma, ginpaathag niya sa iya iloy nga indi na sila makigsugilanon sa iya luwas lamang kon may importante nga mga butang sang pamilya nga kinahanglan sing pagpakig-angot. Wala magdugay pagkatapos sadto, nagsugod na sa pagtambong ang iya iloy kag sang ulihi nakapanumbalik. Ang iya di-tumuluo nga bana nagsugod man sa pagtuon kag sang ulihi nabawtismuhan.
14. Ngaa dapat naton sakdagon sing mainunungon ang kahimusan sa pagdisfellowship?
14 Ang pagsunod sa kahimusan sa pagdisfellowship subong ginbalay sa Kasulatan nagapasundayag sang aton gugma kay Jehova kag nagasabat sa isa nga nagapakahuya sa Iya. (Hulu. 27:11) Sa amo, makasalig kita sa pagpakamaayo kag padya ni Jehova. Si Hari David nagsulat tuhoy kay Jehova: “Sa iya mga palatukuran, indi ako magbiya sa ila. Sa mainunungon ikaw magaunong.”—2 Sam. 22:23, 26.