Magpakita sing Mahigugmaon nga Interes sa “mga Ilo nga Bata nga Lalaki”
1 Si Jehova “amay sang mga ilo nga bata nga lalaki.” (Sal. 68:5) Ang iya kabalaka sa ila kaayuhan ginapabanaag sa sining sugo nga iya ginhatag sa dumaan nga pungsod sang Israel: “Dili ninyo pagpapiutan ang bisan sin-o nga balo nga babayi ukon ilo nga bata nga lalaki. Kon papiutan gid ninyo sila, nian kon magtuaw sila sa akon, sa pagkamatuod pamatian ko ang ila pagtuaw.” (Ex. 22:22, 23) Ang Kasuguan sang Dios nagalakip man sing mga kahimusan nga buligan sila sa ila materyal nga mga kinahanglanon. (Deut. 24:19-21) Sa idalom sang Cristianong kahimusan, ang matuod nga mga sumilimba ginalaygayan nga ‘atipanon ang mga ilo kag balo nga mga babayi sa ila kapipit-an.’ (Sant. 1:27) Paano naton mailog ang mahigugmaon nga interes ni Jehova sa mga nagdaku nga nagasolo ang ginikanan ukon nabahinbahin sa relihion ang pamilya?
2 Espirituwal nga Paghanas: Kon nagasolo ka nga ginikanan ukon may di-tumuluo nga tiayon, ang pagdumala sing isa ka regular nga pagtuon sa Biblia sa puluy-an upod sa imo kabataan mahimo mangin isa ka hangkat. Apang ang isa ka regular kag mapuslanon nga pagtuon sa Biblia importante agod magdaku sila nga balanse kag hamtong nga mga adulto. (Hulu. 22:6) Importante man ang adlaw-adlaw nga pagpakigsugilanon sa ila tuhoy sa espirituwal nga mga butang. (Deut. 6:6-9) Kon kaisa, mahimo maluyahan ka, apang indi mangampo. Magpalapit kay Jehova para sa kusog kag panuytoy samtang imo ‘ginapadaku ang imo kabataan sa disiplina kag sa nagatadlong nga panghunahuna ni Jehova.’—Efe. 6:4.
3 Kon nagakinahanglan ka sing bulig sa pagpas-an sang imo Makasulatanhon nga responsabilidad, ipahibalo sa mga gulang ang imo mga kinahanglanon. Mahimo nga makahatag sila sing praktikal nga mga panugda ukon bulig sa imo agod matukod ang isa ka maayo nga rutina sa espirituwal para sa imo panimalay.
4 Kon Paano Makabulig ang Iban: Sang unang siglo, nangin makugi nga alagad ni Jehova si Timoteo walay sapayan nga nagdaku sia sa isa ka nabahinbahin sa relihion nga panimalay. Ang mapisan nga mga panikasog sang iya iloy kag lola nga tudluan sia sang balaan nga mga sinulatan sa iya pagkapamatan-on wala sing duhaduha nga may importante nga papel. (Bin. 16:1, 2; 2 Tim. 1:5; 3:15) Apang, nakabenepisyo man sia gikan sa pagpakig-upod sa iban nga mga Cristiano, lakip kay apostol Pablo, nga nagpatuhoy kay Timoteo subong iya “hinigugma kag matutom nga anak sa Ginuo.”—1 Cor. 4:17.
5 Sa karon man, daw ano ka mapuslanon kon ang hamtong sa espirituwal nga mga kauturan magpakita sing mahigugmaon nga interes sa mga ilo sa kongregasyon! Nakilala mo bala ang ila ngalan? Nagapakighambal ka bala sa ila sa Cristianong mga miting kag sa iban nga mga okasyon? Agdaha sila nga updan ka sa ministeryo sa latagon. Ayhan sarang mo mapaupod sila kon kaisa, kaupod sang ila nagasolo ukon tumuluo nga ginikanan, sa pagtuon sang inyo pamilya ukon sa mga kahimusan para sa makapahalipay nga paglingawlingaw. Kon kabigon ka sining mga bata nga ila abyan, posible nga ilugon nila ang imo halimbawa kag batunon ang imo pagpalig-on.—Fil. 2:4.
6 Interesado gid si Jehova sa mga ilo, kag ginapakamaayo niya ang aton mahigugmaon nga mga panikasog nga buligan sila nga batunon ang kamatuoran. Madamo sang nagdaku sa nagasolo nga ginikanan ukon nabahinbahin sa relihion nga panimalay ang nakabaton sini nga pagpalig-on kag nagaalagad karon sing matutom subong mga payunir, ministeryal nga mga alagad, mga gulang, nagalakbay nga mga manugtatap, mga misyonero, ukon mga katapo sang pamilya Bethel. Kabay nga tanan kita mangita sing mga paagi nga ‘mapasangkad’ ang aton pagpalangga sa mga ilo, bilang pag-ilog sa aton langitnon nga Amay.—2 Cor. 6:11-13.