Pamangkot

◼ San-o nagakaigo nga magtukod sing isa ka dumuluong-sing-lenguahe nga grupo?

Kon ang teritoryo sang isa ka kongregasyon may madamodamo nga mga tawo nga nagahambal sing dumuluong nga lenguahe, dapat tinguhaan sang mga gulang nga organisahon ang pagbantala nga hilikuton agod buligan ang mga tawo nga nagagamit sini nga lenguahe. (km 7/02 p. 1) Mahimo nga ang komunidad nga nagagamit sing dumuluong nga lenguahe nagalapta sa teritoryo sang duha ukon kapin pa nga magkaingod nga mga kongregasyon. Sa sini nga kaso, magahatag sing nagakaigo nga panuytoy ang (mga) manugtatap sa sirkito, sa amo ginabuligan ang mga kongregasyon nga nadalahig nga magkooperar sa pagbantala nga hilikuton. Sa pulupanag-on, ang isa ka pamulongpulong publiko ukon Pagtinuon sa Lalantawan mahimo hiwaton agod mahibaluan kon daw ano kadamo ang magatambong sa mga miting sang dumuluong nga lenguahe.

Ang isa ka dumuluong-sing-lenguahe nga grupo sarang maporma kon matuman ang masunod nga mga kinahanglanon: (1) May mga manugbantala ukon mga interesado nga nakahangop gid sing maayo sang maayong balita sa dumuluong nga lenguahe. (2) May yara isa ka kalipikado nga gulang ukon isa ka ministeryal nga alagad nga magapanguna kag magadumala sing bisan isa lang ka miting kada semana. (3) May isa ka hubon sang mga gulang nga handa magsakdag sa grupo. Kon natigayon ining mga kinahanglanon, dapat pahibaluon sang mga gulang ang sanga talatapan agod ang grupo opisyal nga kilalahon kag mahatagan sang dugang nga mga instruksion.

Nagasugod ang kalabanan nga grupo paagi sa paghiwat sang Pagtinuon Sang Kongregasyon sa Libro kada semana. Sa ulihi, mahimo aprobahan sang mga gulang nga idugang ang iban nga mga miting, subong sang Miting Publiko kag ang Pagtinuon sa Lalantawan. Ang mga asaynment Num. 2, 3, kag 4 sa Teokratikong Eskwelahan Para sa Ministeryo mahimo mahatag sa isa pa ka hulot kon may isa ka kalipikado nga gulang ukon ministeryal nga alagad nga mangin manuglaygay nga makahambal sang lenguahe. Apang, ang grupo dapat mag-upod sa kongregasyon para sa pamulongpulong sa pagtudlo, talalupangdon nga mga punto sa Biblia, kag Miting sa Serbisyo. Sarang man mahiwat ang mga miting sa pag-alagad sa latagon para sa grupo.

Ang tanan sa grupo napaidalom sa pagdumala sang hubon sang mga gulang. Dapat mag-aman sing balanse nga panuytoy ang mga gulang kag magpakita sing inisyatibo sa pag-atipan sang mga kinahanglanon sang grupo. Kon magduaw ang manugtatap sa sirkito sa kongregasyon nga nagasakdag sa grupo, dapat manghikot sia upod sa grupo agod mapalig-on sila sa espirituwal. Paagi sa pagpakamaayo ni Jehova, sa ulihi mahimo nga mangin isa na ka kongregasyon ang dumuluong-sing-lenguahe nga grupo.