Dayawa si Jehova Paagi sa Pagpanaksi Sing Di-pormal

¹ Nagapangita sing mga kahigayunan ang matutom nga mga alagad ni Jehova agod dayawon sia kada adlaw. (Sal. 96:2, 3; Heb. 13:15) Ang isa ka paagi nga mahimo naton ini amo ang pagpanaksi sing di-pormal. Madamo nga sumilimba ni Jehova karon ang mapinasalamaton bangod may nagpahibalo sa ila sang mensahe sang Ginharian paagi sa di-pormal nga pagpanaksi.

² Masami nga bangod sang pagpanaksi sing di-pormal sa isa ka tawo, mabatian sang iban ang mensahe sang Ginharian. Halimbawa, bangod sang pagpakigsugilanon ni Jesus sa isa ka Samaritana sa bubon ni Jacob, madamo pa ang nangin interesado sa maayong balita. (Juan 4:6-30, 39-42) Sang napriso sanday Pablo kag Silas sa Filipos, ginpanaksihan nila ang bantay sang bilangguan, kag ang bug-os nga panimalay sini nagbaton sang kamatuoran.​—Binu. 16:25-34.

³ Mga Kahigayunan: Ano ang mga kahigayunan nga sarang ka makapanaksi sing di-pormal? Ang pila nagahimo sini kon nagapamalaklon, nagasakay sa publiko nga mga salakyan, ukon nagahulat sa doktor. Ang iban sarang makapanaksi sa tion sang pagpahuway sa trabaho ukon sa eskwelahan. Bisan gani ang pagbutang lang sang isa naton ka publikasyon sa Biblia sa duog nga madali makita mahimo magpahulag sa iban nga mamangkot tuhoy sa aton mga ginapatihan.​—1 Ped. 3:15.

⁴ Pagsugod: Ang isa ka siete-anyos nga mahuluy-on nga bata nga babayi nakabati sa miting nga importante gid nga magpanaksi ang tanan. Gani sang nagpamalaklon upod sa iya iloy, nagbutang sia sing duha ka brosyur sa iya bag. Samtang nagabayad ang iya iloy, gintanyag sang bata nga babayi ang brosyur sa isa ka babayi, nga naluyag sa pagbaton sini. Sang ginpamangkot kon paano sia nakatigayon sing kaisog sa pagpalapit sa babayi, ining mahuluy-on nga bata nga babayi nagsabat: “Nag-isip lamang ako sing, isa, duha, tatlo! Kag ginhimo ko ini!”

⁵ Agod makapanaksi sing di-pormal, kinahanglan naton tanan ang panimuot kaangay sadtong bata nga babayi. Ano ang makabulig sa aton? Mangamuyo sing kaisog agod makapanaksi. (1 Tes. 2:2) Maghanda sing isa ka pamangkot ukon isa ka komento sa isa ka makawiwili nga topiko nga sarang mo magamit sa pagsugod sang paghambalanay. Nian saligi nga pakamaayuhon ni Jehova ang imo mga panikasog.​—Luc. 12:11, 12.

⁶ Ang pagpanaksi sing di-pormal sa mga tawo nga aton masugata kada adlaw nagadala sing kadayawan kay Jehova kag nagahatag sa aton sing kalipay. Mahimo ini makabulig sa isa nga makalakat sa dalan padulong sa kabuhi nga wala sing katapusan.