Pagpakilala sang Balaan nga Ngalan
1. Ano ang epekto sa mga tawo kon mahibaluan nila ang ngalan sang Dios?
1 Ano ang imo reaksion sang una mo nga nahibaluan ang ngalan sang Dios? Ang reaksion sang madamo kaanggid sa ginsiling sang isa ka babayi: “Naghibi ako sang una ko nga makita ang ngalan sang Dios sa Biblia. Natandog gid ako sang mahibaluan ko nga sarang ko gali makilala kag magamit ang ngalan sang Dios.” Para sa iya, ang paghibalo sa balaan nga ngalan isa ka importante nga tikang agod makilala si Jehova subong isa ka persona kag makatukod sing kaangtanan sa iya.
2. Ngaa hilingagawon para sa aton nga itudlo sa iban ang tuhoy kay Jehova?
2 Ngaa Dapat Ini Ipakilala? Ang ngalan sang Dios naangot sa iya mga kinaiya, mga katuyuan, kag mga buhat. Naangot man ini sa kaluwasan. “Ang tagsatagsa nga nagatawag sa ngalan ni Jehova maluwas,” sulat ni apostol Pablo. Apang “paano sila magatawag sa iya,” pangatarungan ni Pablo, kon indi anay nila makilala si Jehova kag magtuo sa iya? Busa, hilingagawon para sa mga Cristiano nga ipakilala sa iban ang ngalan sang Dios kag kon ano ang ginarepresentar sini. (Roma 10:13, 14) Apang, may mas daku pa nga rason kon ngaa ang ngalan sang Dios dapat ipakilala.
3. Ano ang aton panguna nga rason sa pagbantala?
3 Sang dekada 1920, nahantop sang katawhan sang Dios gikan sa Kasulatan ang tuhoy sa unibersal nga hulusayon may kaangtanan sa pagbindikar sa pagkasoberano sang Dios kag ang pagpakabalaan sa iya ngalan. Antes laglagon ni Jehova ang mga malauton agod madula ang pagpakahuya nga ginbutang sa iya ngalan, ang kamatuoran tuhoy sa iya dapat “ipahibalo sa bug-os nga duta.” (Isa. 12:4, 5; Ezeq. 38:23) Busa, ang panguna naton nga rason sa pagbantala amo ang pagdayaw sing dayag kay Jehova kag pagpakabalaan sa iya ngalan sa atubangan sang tanan nga katawhan. (Heb. 13:15) Ang gugma sa Dios kag sa isigkatawo magapahulag sa aton nga makigbahin sing bug-os sa sining gintangdo sang Dios nga hilikuton.
4. Paano nakilala ang mga Saksi ni Jehova paagi sa ngalan sang Dios?
4 “Isa ka Katawhan Para sa Iya Ngalan”: Sang 1931 gin-adoptar naton ang ngalan nga mga Saksi ni Jehova. (Isa. 43:10) Sugod sadto, ginpakilala sang katawhan sang Dios ang balaan nga ngalan tubtob sa kasangkaron nga ang Proclaimers nga libro, pahina 124, nagsiling: “Sa bug-os nga kalibutan, ang bisan sin-o nga pirme nagagamit sang ngalan ni Jehova makilala dayon subong isa sang mga Saksi ni Jehova.” Nakilala ka bala sa sining paagi? Ang pagpasalamat sa kaayo ni Jehova dapat magpahulag sa aton nga ‘pakamaayuhon ang iya ngalan,’ nagahambal tuhoy sa iya sa tagsa ka nagakaigo nga okasyon.—Sal. 20:7; 145:1, 2, 7.
5. Paano nadalahig ang aton paggawi sa pagdala sang ngalan sang Dios?
5 Subong “isa ka katawhan para sa iya ngalan,” dapat naton sakdagon ang iya mga talaksan. (Binu. 15:14; 2 Tim. 2:19) Ang masami nga matalupangdan sang mga tawo sa mga Saksi ni Jehova amo ang ila maayo nga paggawi. (1 Ped. 2:12) Indi gid naton luyag nga pakahuy-an ang iya ngalan paagi sa pagpasapayan sa diosnon nga mga prinsipio ukon paghimo nga ikaduha lamang ang pagsimba sa iya sa aton kabuhi. (Lev. 22:31, 32; Mal. 1:6-8, 12-14) Sa baylo, kabay nga ipakita naton sa aton pagkabuhi nga ginapakabahandi naton ang pribilehiyo nga magdala sang balaan nga ngalan.
6. Ano nga pribilehiyo ang matigayon naton karon kag sing dayon?
6 Sa karon, makita naton nga nagakatuman ang ginsiling ni Jehova: “Kutob sa pagsubang sang adlaw tubtob gid sa pagtunod sini ang akon ngalan mangin daku sa tunga sang mga pungsod.” (Mal. 1:11) Padayon naton nga ipahibalo ang kamatuoran tuhoy kay Jehova kag “pakamaayuhon ang iya balaan nga ngalan sa gihapon, bisan sing dayon.”—Sal. 145:21.