Pagpasalamat sa Kaluoy Sang Dios

¹ Antes mangin Cristiano, masingki nga namatok si apostol Pablo sa paglapnag sang Cristianismo. Apang, bangod nanghikot sia nga walay hinalung-ong, ginkaluuyan sia. Ginpakita ni Jehova ang di-bagay nga kaayo, kag ginhatagan si Pablo sing asaynment nga magbantala. Ginpakabahandi niya ini nga asaynment. (Binu. 26:​9-​18; 1 Tim. 1:​12-​14) Ang pagpasalamat sa kaluoy ni Jehova amo ang nagpahulag kay Pablo nga magsakripisyo sa pagtuman sang iya ministeryo.​​—⁠2 Cor. 12:15.

² Suno sa kaluoy sang Dios, ginhatagan man kita sing isa ka ministeryo. (2 Cor. 4:1) Kaangay ni Pablo, sarang naton mapakita ang aton apresasyon sa kaluoy nga ginpakita sa aton paagi sa pagpanikasog naton nga buligan ang iban nga mag-uswag sa espirituwal. Ang isa ka paagi nga mahimo naton ini amo ang pagsugod kag pagdumala sing mga pagtuon sa Biblia.

³ Pagsugod Sing mga Pagtuon sa Biblia: Ang isa ka paagi nga makasugod sing mga pagtuon sa Biblia amo ang pagtukod sing isa ka ruta sa magasin. Samtang regular nga ginaduaw naton ang mga tawo sa aton ruta, labi naton nga mahibaluan ang ila mga ginakabalak-an. Sa ulihi, ang isa ka artikulo sa mga magasin mahimo nga mangin kabangdanan agod masugdan ang isa ka pagtuon sa Biblia paagi sa Ginapatuman nga brosyur. Sa masunod nga mga pagduaw, mahimo nga mapadayon ang mga paghambalanay sa Ginapatuman nga brosyur kon nagapahamtang sing mga magasin sa tagbalay.

⁴ Kinahanglan ang Pangamuyo kag Panikasog: Ang pangamuyo upod ang kapisan amo ang magapauswag sang aton pagbantala nga hilikuton. Ang isa ka payunir nga utod nga babayi nga may isa ka ginatun-an sa Biblia nangamuyo nga pakamaayuhon sia sing dugang pa ni Jehova. Naghulag man sia suno sa iya mga pangamuyo. Ginbinagbinag niya ang iya ministeryo kag natalupangdan niya nga wala sia nagatanyag sing mga pagtuon sa Biblia kon nagahimo sing mga pagduaw liwat. Ginhimo niya ini kag sang ulihi may duha pa gid sia ka ginatun-an.

⁵ Pribilehiyo gid naton nga makapakigbahin sa pagbantala sing “maayong balita sang di-bagay nga kaayo sang Dios”! (Binu. 20:24) Kabay nga ang pagpasalamat sa kaluoy sang Dios amo ang magapahulag sa aton nga mangin mapisan sa pagbulig sa iban nga makabenepisyo gikan sa di-bagay nga kaayo ni Jehova.