Pagtanyag sing Literatura sa Teritoryo nga Madamo sing Lenguahe
1. Ngaa madamo nga kongregasyon ang nagakinahanglan sing literatura sa iban nga lenguahe?
1 Sa madamo nga duog, nagsugod sa pagpuyo sa teritoryo ang mga tawo gikan sa iban nga mga lugar ukon pungsod. Madamo sa ila ang madali makatuon kag makahangop sing maayo kon tudluan sila sa ila mismo lenguahe. Ano ang mga kahimusan agod mahatagan ining mga interesado sang mga publikasyon nga pasad sa Biblia sa lenguahe nga ila gid mahangpan?
2. Ano nga kooperasyon ang kinahanglanon kon ang duha ukon kapin pa ka kongregasyon nga nagahambal sing magkatuhay nga lenguahe nagapangabudlay sa isa lang ka teritoryo?
2 Kon San-o Magtanyag sing Literatura: Kon ang duha ukon kapin pa ka kongregasyon nga nagahambal sing magkatuhay nga lenguahe nagapangabudlay sa isa lang ka teritoryo, ang hubon sang mga gulang nga nadalahig magakooperar sa manugtatap sa pag-alagad sa paghimo sing kahimusan nga ginaugyunan sang tagsa ka kongregasyon agod nga ang tagsa ka grupo sang lenguahe mapanaksihan sing maid-id. Kon nagabantala sa mga pamalay, ang mga manugbantala kinaandan na nga indi magtanyag sing literatura sa lenguahe sang iban nga (mga) kongregasyon. Apang, kon ang mga manugbantala nagapanaksi sing di-pormal ukon sa publiko nga mga duog, sarang nila matanyag ang literatura sa mga lenguahe sang komunidad.
3. San-o dapat may suplay ang kongregasyon nga literatura sa iban nga lenguahe?
3 Kon San-o Magtigayon sing Suplay nga Literatura: Ano ang sarang mahimo kon may madamodamo nga mga tawo nga nagahambal sing iban nga lenguahe sa isa ka duog apang wala sing kongregasyon para sa sina nga lenguahe? Sa amo sini nga mga kahimtangan, dapat may suplay ang mga kongregasyon sing diutay nga kadamuon sang mga sadsaran nga literatura nga sarang matigayon sa sina nga lenguahe, subong sang mga tract, Ginapatuman kag Abyan Sang Dios nga mga brosyur, kag ang Ihibalo nga libro. Sarang ini matanyag sang mga manugbantala kon may masugilanon sila nga mga tawo nga makabasa sini nga lenguahe.
4. Paano matigayon ang literatura sa isa ka lenguahe nga wala sing suplay ang kongregasyon?
4 Kon Paano Mag-order sing Literatura: Kon wala sing suplay nga literatura ang kongregasyon sa lenguahe nga sarang mabasa sang interesado nga mga tawo, paano matigayon ang literatura sa sina nga lenguahe? Dapat hibaluon sang manugbantala sa literature servant kon ano nga publikasyon ang sarang matigayon sa sina nga lenguahe agod sarang maorder ang kinahanglanon nga mga publikasyon sa masunod nga pag-order sang kongregasyon sing mga literatura. Kon ang order Arabe, Intsik, Hapones, Koreano, ukon Espanyol, posible nga sarang ini maghalin sa aton suplay sa sanga sang Pilipinas. Apang para sa iban nga mga lenguahe kinahanglan orderon ini sa iban nga mga sanga, kag mahimo nga magadugay ini sing pila ka bulan.
5. Ano ang aton tulumuron sa pagtigayon sing suplay sang Cristianong mga publikasyon?
5 Kabay nga gamiton naton sing maayo ang Cristianong mga publikasyon agod buligan ang “tanan nga sahi sang mga tawo,” bisan ano man ang ila lenguahe, ‘nga makadangat sa sibu nga ihibalo sang kamatuoran kag maluwas.’—1 Tim. 2:3, 4.