Ang Hilikuton nga Makapaumpaw
1 Ang mensahe sang Biblia nagapaumpaw sa tanan nga nagabaton kag nagaaplikar sini sa ila kabuhi. (Sal. 19:7, 8) Nagabulig ini sa ila nga mahilway sa butig nga mga panudlo kag sa makahalalit nga mga buhat kag nagahatag sing isa ka masaligan nga paglaum sa palaabuton. Apang, indi lamang yadtong nagabaton sang maayong balita ang makabenepisyo. Ang mga nagapaambit sing makapaumpaw nga mga kamatuoran sa Biblia sa iban nagaagom man sing kaumpawan.—Hulu. 11:25.
2 Ginpapagsik Sang Ministeryo: Si Jesus nagsiling nga yadtong handa nga magdala sang malaragwayon nga lulan sang pagkadisipulo ni Cristo, nga nagalakip sang hilikuton nga pagbantala kag paghimo sing mga disipulo, ‘makakita sing kaumpawan sa [ila] mga kalag.’ (Mat. 11:29) Nasapwan niya mismo nga makapapagsik ang pagpanaksi sa iban. Nangin kaangay ini sang pagkaon para sa iya. (Juan 4:34) Sang ginpadala niya ang 70 ka disipulo agod magbantala, nalipay sila sang makita nila nga ginasakdag ni Jehova ang ila mga panikasog.—Luc. 10:17.
3 Madamo nga mga Cristiano karon ang napapagsik man bangod sang ila pagpakigbahin sa pagbantala nga hilikuton. Ang isa ka utod nga babayi nagsiling: “Ang ministeryo makapaumpaw bangod naghatag ini sing direksion kag katuyuan sa akon kabuhi. Ang personal nga mga problema kag ang matag-adlaw nga mga kahuol nagahaganhagan kon magbantala ako.” Ang isa pa ka makugi nga ministro nagsiling: “Ang ministeryo . . . nagapahanumdom sa akon adlaw-adlaw nga matuod si Jehova kag nagahatag sa akon sing paghidait kag kalipay nga indi matigayon sa bisan anong iban pa nga paagi.” Daw ano nga pribilehiyo nga mangin “mga masigkamanugpangabudlay sang Dios”!—1 Cor. 3:9.
4 Ang Gota ni Cristo Mahulas: Samtang ginapalig-on ang mga Cristiano nga ‘manikasog sing lakas,’ wala magpangabay si Jesus sang indi naton masarangan. (Luc. 13:24) Sa pagkamatuod, mahigugmaon nga gin-agda niya kita nga ‘itakod ang iya gota kaupod niya.’ (Mat. 11:29) Yadtong nagaatubang sang mabudlay nga mga kahimtangan makasalig nga ang ila bug-os kalag nga pag-alagad, bisan limitado lamang, nahamut-an gid sang Dios.—Mar. 14:6-8; Col. 3:23.
5 Daw ano ka makapaumpaw nga alagaron ang isa ka Dios nga nagaapresyar sang bisan ano nga ginahimo naton tungod sa iya ngalan! (Heb. 6:10) Kabay nga tinguhaan naton pirme nga ihatag sa iya ang aton bug-os nga masarangan.