Iluga ang Pagkaayo ni Jehova
1 Pagkatapos makita ang matahom nga pagtunod sang adlaw kag makakaon sing manamit nga pagkaon, wala bala kita mapahulag nga pasalamatan si Jehova, ang Tuburan sang tanan nga pagkaayo? Ang iya pagkaayo nagapahulag sa aton nga ilugon sia. (Sal. 119:66, 68; Efe. 5:1) Paano naton mapadayag ini nga kinaiya?
2 Sa mga Di-tumuluo: Ang isa ka paagi nga mailog naton ang pagkaayo ni Jehova amo ang pagpakita sing sinsero nga kabalaka sa mga di-tumuluo. (Gal. 6:10) Ang pagpakita sing kaayo sa praktikal nga mga paagi mahimo may positibo nga epekto sa kon paano nila ginatamod ang mga Saksi ni Jehova kag ang mensahe nga aton ginadala.
3 Halimbawa, samtang nagahulat sa isa ka klinika, ang isa ka pamatan-on nga lalaki nga payunir nakatupad sa pulungkuan sa isa ka medyo tigulang na nga babayi nga daw mas masakiton sangsa iban. Sang turno na sang payunir nga magkadto sa doktor, ginpauna niya ang babayi. Sang ulihi, nagkitaay sila liwat sang babayi sa tiendahan, kag nalipay gid ining babayi nga makita sia. Bisan pa nga indi mabinatunon anay sa maayong balita ang babayi, nagsiling sia nga nahibaluan na niya karon nga ginahigugma gid sang mga Saksi ni Jehova ang ila mga isigkatawo. Nasugdan ang isa ka regular nga pagtuon sa Biblia upod sa iya.
4 Sa Aton mga Kauturan: Ginailog man naton ang pagkaayo ni Jehova kon ginabuligan naton ang mga masigkatumuluo. Sa tion sang mga kalamidad, lakip kita sa mga nauna nga nagabulig sa aton mga kauturan. Ginapakita man naton ini nga panimuot kon ginapasakay naton yadtong wala sing salakyan pakadto sa mga miting, nagaduaw sa mga may sablag sa lawas, kag nagapakig-abyan sa sadtong wala naton makilala sing maayo sa kongregasyon.—2 Cor. 6:11-13; Heb. 13:16.
5 Ang isa pa ka paagi nga nagapakita sing pagkaayo si Jehova amo ang iya “kahanda sa pagpatawad.” (Sal. 86:5) Bilang pag-ilog sa iya, sarang naton mapasundayag ang aton gugma sa pagkaayo paagi sa pagpatawad sa iban. (Efe. 4:32) Nagabulig ini nga mangin ‘maayo kag makalilipay’ ang aton pagpakig-upod sa mga masigkatumuluo.—Sal. 133:1-3.
6 Kabay nga ang bugana nga pagkaayo ni Jehova magapahulag sa aton nga dayawon sia kag mangin malipayon. Kag kabay nga magapahulag ini sa aton nga ilugon ang iya pagkaayo sa tanan naton nga ginahimo.—Sal. 145:7; Jer. 31:12.