Atipanon Naton ang Aton Duog sang Pagsimba
1. Ano ang katuyuan sang Kingdom Hall?
1 Sa bug-os nga kalibutan may kapin sa 94,000 ka kongregasyon sang mga Saksi ni Jehova. Ang kalabanan nga kongregasyon nagatipon agod magtuon sa Biblia kag makig-upod sa mga masigka-Cristiano sa Kingdom Hall, nga amo ang lokal nga sentro sang putli nga pagsimba.
2. Ngaa importante nga huptan nga matinlo kag presentable ang Kingdom Hall?
2 Regular nga Iskedyul sa Pagpaninlo: Ang pagtinlo sang Kingdom Hall isa ka importante nga bahin sang aton sagrado nga pag-alagad. Ang Aton Ministeryo nga libro nagasiling sa pahina 61-2: “Dapat kabigon sang mga kauturan nga pribilehiyo indi lamang ang pagsakdag sa Kingdom Hall sa pinansial kundi ang pagboluntaryo man sang serbisyo agod huptan ini nga matinlo, presentable kag maayo sing kahimtangan. Sa sulod kag sa gua, ang Kingdom Hall dapat nagakabagay nga representasyon sang organisasyon ni Jehova.” Bangod ginagamit ang Kingdom Hall pila ka beses sa isa ka semana, kinahanglan ang regular nga pagtinlo kag pagmentinar. Masami nga ini nga mga butang ginaatipan sang mga boluntaryo gikan sa (mga) kongregasyon nga nagagamit sang Kingdom Hall. Kaangay sadto sa panahon sang Biblia, dapat ang mga alagad ni Jehova karon mangin mapisan man sa “pagkay-o” sang aton duog sang pagsimba.—2 Cron. 34:10.
3. Paano ginaorganisar ang pagpaninlo sa Kingdom Hall, kag sin-o ang sarang makapakigbahin sa sini nga pribilehiyo?
3 Ang isa ka iskedyul sa pagtinlo sang Kingdom Hall kada semana dapat ibutang sa information board. Ang tanan nga mga grupo sang pagtinuon sa libro dapat magbinuslanay sa pagpaninlo kada semana, nga nagasunod sang listahan sang mga dapat himuon. Ang tanan nga makasarang kinahanglan makigbahin sa sining pribilehiyo kada semana sa paghupot sa Kingdom Hall nga matinlo kag presentable. Makabulig man ang mga kabataan basta giyahan sang ginikanan, sa amo ginatudluan sila nga ipakita ang ila apresasyon sa sini nga pribilehiyo. Kon indi lang isa ka kongregasyon ang nagagamit sang Kingdom Hall, ilabi na nga kinahanglan ang maayo nga kooperasyon agod indi pila lamang ang regular nga nagapaninlo sini.
4. Ano ang dapat himuon agod mahibaluan sang tanan sa kongregasyon ang ila himuon kon magtinlo sang Kingdom Hall?
4 Ang listahan sang mga butang nga dapat himuon dapat ipahamtang, kon posible malapit sa ginataguan sang mga gamit sa pagpaninlo. Dapat ginapaathag sini nga listahan ang mga buluhaton nga dapat himuon kada semana, subong sang pagtinlo sa mga bintana, pagtrapo sa mga countertop, pag-ula sing basura, paglampaso sa salog, kag pagtinlo sa mga salaming. Ang iban nga buluhaton mahimo talagsa lang himuon, subong sang pagpahining sa bisan ano nga kasangkapan nga himo sa kahoy kag pagtinlo sa mga pulungkuan, paglaba sa mga kurtina, kag pagtinlo sa mga suga. Ang tanan nga kemikal nga ginagamit sa pagpaninlo indi dapat makuha sang kabataan kag dapat may maathag nga ngalan. Dapat man ilakip ang malip-ot nga pagpaathag kon paano gamiton ini nga kemikal.
5. Daw ano ka importante nga ang Kingdom Hall hilway sa katalagman, kag ano nga mga butang ang dapat usisaon sa pulupanag-on? (Tan-awa ang kahon sa pahina 4.)
5 Importante gid nga ang Kingdom Hall isa ka duog nga hilway sa katalagman. (Deut. 22:8) Tuhoy sa sini, ang kahon sa pahina 4 may listahan sang pila ka butang nga dapat usisaon sa pulupanag-on agod malikawan ang mga aksidente.
6. Paano ginapahituhog ang hilikuton sa pagmentinar sang Kingdom Hall?
6 Pagmentinar sa Kingdom Hall: Ang hubon sang mga gulang amo ang may responsabilidad sa pagdumala sang pagmentinar sa Kingdom Hall. Ginatangdo sa masami ang isa ka gulang ukon isa ka ministeryal nga alagad agod magpahituhog sang hilikuton. Ginaorganisar niya ang pagpalakat adlaw-adlaw sang Kingdom Hall, ginapat-od nga matinlo ini kag wala sing guba kag nga may bastante nga mga suplay nga magamit. Importante nga wala sing makatalagam nga mga kahimtangan sa tinukod ukon sa palibot sini. Kon duha ka kongregasyon ukon kapin pa ang nagagamit sang tinukod, ang hubon sang mga gulang nagatangdo sang operating committee agod mag-organisar sang mga kahimusan sa pag-atipan sang tinukod kag sang propiedad. Ini nga komite nagapanghikot sa idalom sang panuytoy sang mga hubon sang mga gulang.
7. (a) Ano ang ginahimo kada tuig agod mapat-od nga wala sing guba ang Kingdom Hall? (b) Ano nga mga butang ang dapat talupangdon sa pulupanag-on? (Tan-awa ang kahon sa pahina 5.)
7 Ang maid-id nga pag-inspeksion sa Kingdom Hall ginahimo kada tuig. Ang mga gulang amo ang responsable sa paghimo sing mga kahimusan agod maatipan sing maid-id ang mga butang nga dapat kay-uhon. Ang mga manugbantala mahimo pangabayon nga magbulig sa mga kalay-uhon. Ang tanan dapat manikasog nga makay-o ang bisan gamay lang nga kalay-uhon kag mangin maabtik sa pag-atipan sang mga butang nga dapat hatagan sing igtalupangod.
8. San-o sarang makontak sang mga gulang ang Kingdom Hall Construction Desk may kaangtanan sa pagmentinar?
8 Kon kinahanglan sang mga gulang ang panugda ukon bulig sa pag-atipan sang kalay-uhon sa Kingdom Hall, sarang nila makontak ang Kingdom Hall Construction Desk sa sanga talatapan. Mahimo magalakip ini sang mga butang subong sang pagkay-o sa mga bahin sang tinukod kag sa mga nagatulo ukon nagahulas sa sulod sang tinukod.
9. Ano nga kahimusan ang dapat sundon kon kinahanglanon ang manugpakyaw?
9 Maalamon nga Paggamit sa Pundo Sang Kongregasyon: Ang kalabanan nga trabaho sa Kingdom Hall kag sa ugsaran sini ginahimo sang mga boluntaryo. Ang ila masinakripisyuhon nga mga panikasog isa ka maayo nga pagpakita sang gugma kag nagabulig gid sa pagpanubo sang gasto. Kon kinahanglan gid nga ipapakyaw sa tagagua ang pila ka trabaho, subong sang pagtapna sang mga peste ukon daku nga kalay-uhon, dapat pilion sang mga gulang ang pinakabarato sing sukot. Sarang ini mahimo paagi sa paghanda sing detalyado kag nasulat nga buluhaton kag ang bisan ano nga mga materyales nga dapat gamiton. Ang kopya sini nga listahan ihatag sa mga interesado magpakyaw agod ang tanan may ihibalo sa mga nadalahig. Pagkatapos mabaton ang nasulat nga mga presyo gikan sa interesado nga mga manugpakyaw, ang mga gulang sarang makapili sang labing maayo. Ini nga kahimusan dapat sundon bisan pa nga may utod nga nagtanyag nga amo ang maobra ukon amo ang magasuplay sang kinahanglanon nga mga materyal sa espesipiko nga presyo.
10. Ano ang ginahimo agod mapat-od nga ginagamit sing maayo ang mga pundo sang kongregasyon?
10 Kon kapin sa isa ka kongregasyon ang nagagamit sang Kingdom Hall, ang operating committee nagahupot sing tuhay nga kuenta sa bangko kag nagahatag sing nasulat nga report kada bulan sa tagsa ka hubon sang mga gulang, sa amo mahibaluan sang mga gulang kon diin ginagasto ang pundo. Ang mga gulang amo ang responsable sa nagakaigo nga paggamit sang mga pundo sang kongregasyon.
11. Ano ang dapat himuon kon kinahanglan ang daku nga pagmentinar ukon pagkay-o?
11 Daku nga Pagmentinar kag Pagkay-o: Kon makita sang operating committee nga daku ang kinahanglan tuhoy sa pagpalakat ukon sa pagmentinar sang Kingdom Hall, ginakonsulta sang komite sa mga hubon sang mga gulang kon ano ang himuon. Kon mapat-od nga may daku nga kalay-uhon ukon kinahanglan ang bulig sang iban nga wala nagagamit sini nga Kingdom Hall, dapat kontakon sang mga gulang ang Kingdom Hall Construction Desk. Ini nga departamento makahatag sing mabuligon nga mga panugda kon paano ini himuon. Kon daku ang gasto, kinahanglan nga kuhaon ang makatarunganon nga pagbanabana kag ihanda ang isa ka resolusyon agod ugyunan sang kongregasyon.—Tan-awa ang Pebrero 1994 nga Ang Aton Ministeryo sa Ginharian sa “Pamangkot.”
12. Paano naton mapakita ang aton apresasyon sa pribilehiyo nga makatambong sa mga miting sa Kingdom Hall?
12 Ginapabaloran gid naton ang aton pribilehiyo nga makatipon sing tingob sa Kingdom Hall! Indi gid naton luyag nga patumbayaan ang aton mga miting ukon pasapayanan ini. Ang tanan sarang makapakigbahin sa kadalag-an sining aman agod palig-unon kita paagi sa pagpakigbahin sing bug-os sa pag-atipan sang aton Kingdom Hall. Nagapasanyog ini sang putli nga pagsimba kag nagapadungog sa ngalan ni Jehova. Dapat mangin determinado kita nga atipanon ang aton duog sang pagsimba.
[Kahon sa pahina 4]
Mga Listahan sa Pangamlig
◻ Ang mga fire extinguisher dapat mahapos kuhaon kag ginausisa kada tuig.
◻ Ang mga guluwaan kag mga hagdanan dapat may maathag nga karatula, masanag, kag madali maagyan, kag ang mga barandilya dapat mapag-on.
◻ Ang bodega kag mga kasilyas dapat matinlo kag wala sing madali masunog nga mga butang, personal nga mga butang kag basura.
◻ Ang atop kag sanipa dapat usisaon kag tinluan sing regular.
◻ Ang mga alagyan kag palarkingan dapat masanag kag wala sing mga butang nga mahimo makapadalin-as ukon makapatumba.
◻ Ang mga sistema sa elektrisidad kag bentilasyon dapat usisaon kag mentinahon sing maayo.
◻ Ang bisan ano nga nagatulo dapat kay-uhon dayon agod indi maglala ang problema.
◻ Dapat kandaduhan ang tinukod kon wala sing tawo.
[Kahon sa pahina 5]
Pag-atipan sa Bilding kag Propiedad
◻ Sa gua: Maayo bala ang atop, dingding, pintura, mga bintana, kag karatula sang Kingdom Hall?
◻ Ugsaran sa palibot: Naatipan bala sing maayo ang ugsaran sa palibot? Maayo bala ang mga alagyan, mga kudal, kag palarkingan?
◻ Sa sulod: Presentable bala ang salog, kurtina, pulungkuan, linya sang koryente kag mga tubo sang tubig, dingding kag mga kabinet sang literatura?
◻ Kagamitan: Maayo bala ang kahimtangan sang suga, sistema sang tunog, bentilasyon, kag air-conditioning?
◻ Mga kasilyas: Matinlo bala ini kag indi guba?
◻ Mga dokumento sang kongregasyon: Bag-o bala kag sibu ang mga dokumento sa korporasyon ukon ang mga titulo sang duta? Nasumiter bala ang tax-exemption sang propiedad?