Panapti ang Inyo Kaugalingon sing Pagkamapainubuson
1 Isa ka bata nga manugbantay sang karnero ang nagsalig kay Jehova kag nalutos niya ang isa ka isganan nga hangaway. (1 Sam. 17:45-47) Isa ka manggaranon nga tawo ang mapailubon nga nag-antos sang kalamidad. (Job 1:20-22; 2:9, 10) Ang Anak sang Dios nagpatungod sang tanan nga kadayawan sa iya Amay para sa iya panudlo. (Juan 7:15-18; 8:28) Sa tagsa sining mga halimbawa, ang pagkamapainubuson importante gid. Sa karon, ang pagkamapainubuson importante man sa ginaatubang naton nga mga kahimtangan.—Col. 3:12.
2 Kon Nagabantala: Subong Cristianong mga ministro, mapainubuson naton nga ginapaambit ang maayong balita sa tanan nga sahi sang tawo, nga wala nagahusgar sa ila pasad sa ila rasa, kultura, ukon ginhalinan. (1 Cor. 9:22, 23) Kon ang pila di-mainabyanon ukon matinaastaason nga nagasikway sang mensahe sang Ginharian, wala kita nagabalos kundi mapailubon kita nga nagapangita sa mga takus. (Mat. 10:11, 14) Sa baylo nga magpadayaw sa iban sang aton ihibalo ukon edukasyon, ginasentro naton ang igtalupangod sa Pulong sang Dios, kay nakahibalo kita nga mas makapakumbinsi ini sangsa bisan ano nga ihambal naton. (1 Cor. 2:1-5; Heb. 4:12) Bilang pag-ilog kay Jesus, ginahatag naton ang tanan nga kadayawan kay Jehova.—Mar. 10:17, 18.
3 Sa Kongregasyon: Ang mga Cristiano dapat man ‘magpangwagkus sa ila kaugalingon sing mapainubuson nga panghunahuna sa isa kag isa.’ (1 Ped. 5:5) Kon ginakabig naton ang iban subong labaw sa aton, mangita kita sing mga paagi nga maalagdan ang aton mga kauturan sa baylo nga magpaabot nga sila ang magaalagad sa aton. (Juan 13:12-17; Filip. 2:3, 4) Indi kita magbatyag nga indi na kita bagay sa mga hilikuton subong sang pagtinlo sa Kingdom Hall.
4 Ang pagkamapainubuson nagabulig sa aton nga ‘magpinaumuray sa gugma’ kag sa amo nagapasanyog sang paghidait kag paghiusa sa kongregasyon. (Efe. 4:1-3) Nagabulig ini sa aton nga magpasakop sa mga gintangdo nga magpanguna. (Heb. 13:17) Nagapahulag ini sa aton nga batunon ang bisan ano nga laygay ukon disiplina nga mahimo ihatag sa aton. (Sal. 141:5) Kag ang pagkamapainubuson nagapahulag sa aton nga magsandig kay Jehova sa pagtungod naton sa bisan ano nga pribilehiyo nga mabaton naton sa kongregasyon. (1 Ped. 4:11) Kaangay ni David, ginakilala naton nga ang kadalag-an nagadepende indi sa tawhanon nga ikasarang kundi sa pagpakamaayo sang Dios.—1 Sam. 17:37.
5 Sa Atubangan Sang Aton Dios: Labaw sa tanan, kinahanglan ‘magpaubos kita sa idalom sang gamhanan nga kamot sang Dios.’ (1 Ped. 5:6) Kon nagaatubang kita sang mabudlay nga mga kahimtangan, mahimo nga handumon naton ang kaumpawan nga madala sang Ginharian. Apang mapailubon kita nga nagahulat kay Jehova sa pagtuman sang iya mga saad suno sa iya gintalana nga tion. (Sant. 5:7-11) Kaangay sa nagahupot-integridad nga si Job, ang panguna naton nga ginakabalak-an amo nga ang “ngalan ni Jehova padayon nga pakamaayuhon.”—Job 1:21.
6 Si manalagna Daniel ‘nagpaubos sang iya kaugalingon sa atubangan sang iya Dios’ kag ginkahamut-an sia ni Jehova kag ginhatagan sing madamo nga maayong pribilehiyo. (Dan. 10:11, 12) Kabay nga kita man magpanapot sang aton kaugalingon sing pagkamapainubuson, nakahibalo nga “ang resulta sang pagkamapainubuson kag sang kahadlok kay Jehova amo ang manggad kag himaya kag kabuhi.”—Hulu. 22:4.