Nagapapagsik ang Komendasyon
1 “Indi bala ako mabuot karon nga adlaw?” pisngo sang bata nga babayi antes sia magtulog. Nakibot ang iya iloy bangod sining pamangkot. Bisan pa natalupangdan niya nga nagtinguha gid ang iya bata nga babayi nga magpakabuot sa amo nga adlaw, nalipatan niya nga dayawon sia bisan kis-a lang. Ang paghibi sining magamay nga bata dapat magpahanumdom sa aton nga tanan kita—bata kag tigulang—nagakinahanglan sing komendasyon. Ginapapagsik bala naton yadtong sa palibot naton paagi sa pagpabutyag sing apresasyon sa ila maayo nga hinimuan?—Hulu. 25:11.
2 Madamo sing rason agod hatagan naton sing komendasyon ang mga masigka-Cristiano. Ang mga gulang, mga ministeryal nga alagad, kag mga payunir nagapangabudlay sing lakas agod matuman ang ila mga responsabilidad. (1 Tim. 4:10; 5:17) Ang mahinadlukon sa Dios nga mga ginikanan nagahimo sang ila labing masarangan agod padakuon ang ila kabataan sa mga dalanon ni Jehova. (Efe. 6:4) Ang Cristianong mga pamatan-on nagapanikasog gid nga mabatuan ang “espiritu sang kalibutan.” (1 Cor. 2:12; Efe. 2:1-3) Ang iban matutom nga nagaalagad kay Jehova walay sapayan sang katigulangon, mga balatian, kag iban pa nga mga pagtilaw. (2 Cor. 12:7) Sila tanan nagakadapat hatagan sing komendasyon. Ginatalupangod bala naton ang ila dalayawon nga mga panikasog?
3 Sing Personal kag Espesipiko: Nalipay gid kita kon makabati sing komendasyon gikan sa plataporma. Apang, mas makapapagsik ang komendasyon kon ginahambal ini sa aton sing personal. Halimbawa, sa kapitulo 16 sang iya sulat sa mga taga-Roma, si Pablo naghatag sing espesipiko nga komendasyon kanday Febe, Priscila kag Aquila, Trifena kag Trifosa, kag Persida, lakip sa iban pa. (Roma 16:1-4, 12) Daw ano ka makapalig-on ang iya mga pinamulong para sa sadtong mga matutom! Ini nga pagdayaw nagapasalig sa aton mga kauturan nga ginakinahanglan sila kag nagapasuod pa gid ini sa aton. May personal ka bala nga nahatagan sing komendasyon sining karon lang?—Efe. 4:29.
4 Sing Tinagipusuon: Agod makapapagsik gid, dapat mangin sinsero ang komendasyon. Mahibaluan sang mga tawo kon bala tinagipusuon gid ang aton ginahambal ukon nagapanginto lamang kita. (Hulu. 28:23) Samtang ginatun-an naton nga talupangdon ang maayo nga mga kinaiya sang iban, mapahulag ang aton tagipusuon nga maghatag sing komendasyon. Kabay nga pirme kita maghatag sing sinsero nga komendasyon, nakahibalo nga “ang pulong sa nagakaigo nga dag-on, daw ano kaayo!”—Hulu. 15:23.