Pagpalambo sing Pagkasuod kay Jehova

1. Ano ang narealisar sang isa ka utod nga babayi tuhoy sa iya rutina sa espirituwal?

¹ “Mga 20 ka tuig na ako sa kamatuoran nga nagatambong lamang sa mga miting kag nagapakigbahin sa ministeryo sa latagon,” baton sang isa ka Cristianong utod nga babayi. Apang, sia nagpadayon: “Nakahinakop ako nga bisan importante ining mga butang, indi ini makasakdag sa akon kon magbudlay ang mga kahimtangan. . . . Narealisar ko karon nga kinahanglan bag-uhon ko ang akon panghunahuna kag sugdan ang mapuslanon nga programa sa pagtuon agod makilala ko gid si Jehova kag mahigugma sia kag maapresyar kon ano ang ginhatag sang iya Anak para sa aton.”

2. Ngaa importante nga palambuon ang pagkasuod kay Jehova?

² Ang pagtukod sing isa ka suod kag personal nga kaangtanan kay Jehova nagakinahanglan sing panikasog. Indi lamang ang pagsunod sing isa ka rutina sang Cristianong hilikuton ang kinahanglan. Kon indi kita makapangamuyo sing regular kay Jehova, sa ulihi mangin kaangay na lang sia sang isa anay ka suod nga abyan nga wala na ginapakig-angutan. (Bug. 2:4) Binagbinagon naton kon paano ang personal nga pagtuon sa Biblia kag ang pangamuyo makabulig sa aton sa pagpalambo sing pagkasuod kay Jehova.—Sal. 25:14.

3. Paano naton himuon ang aton personal nga pagtuon agod mangin suod sa Dios?

³ Importante ang Pangamuyo kag Pagpamalandong: Ang personal nga pagtuon nga nagapalig-on sang tagipusuon nagalakip indi lamang sang pagkurit sa yabi nga mga punto sa ginatun-an kag paglantaw sa ginkutlo nga mga kasulatan. Nagakinahanglan ini nga binagbinagon naton kon ano ang ginapakita sang impormasyon tuhoy sa mga dalanon, mga talaksan, kag personalidad ni Jehova. (Ex. 33:13) Ang paghangop sa espirituwal nga mga butang nagatandog sang aton emosyon kag nagapahulag sa aton nga hunahunaon ang aton mismo kabuhi. (Sal. 119:35, 111) Dapat himuon ang personal nga pagtuon upod ang tulumuron nga mangin suod kay Jehova. (Sant. 4:8) Ang serioso nga pagtuon nagakinahanglan sing tion kag subong man sang nagakaigo nga palibot, kag ang regular nga pagtuon nagakinahanglan sing disiplina. (Dan. 6:10) Bisan pa masako ka, nagapain ka bala sing tion kada adlaw nga pamalandungan ang dalayawon nga mga kinaiya ni Jehova?—Sal. 119:147, 148; 143:5.

4. Paano makabulig sa aton ang pangamuyo sa aton personal nga pagtuon agod mangin suod kay Jehova?

⁴ Ang tinagipusuon nga pangamuyo importante nga bahin sang mapuslanon nga personal nga pagtuon. Agod matandog ang aton tagipusuon sang mga kamatuoran sa Biblia kag mapahulag nga “magdulot kita sa Dios sing pagsimba nga kalahamut-an, nga may pagtahod kag kahangawa,” kinahanglan naton ang balaan nga espiritu sang Dios. (Heb. 12:28) Busa, dapat naton buksan ang kada pagtuon paagi sa pagpangabay kay Jehova sang iya espiritu. (Mat. 5:3) Samtang ginapamalandungan naton ang Kasulatan kag ginagamit ang mga publikasyon nga bulig sa pagtuon nga gin-aman sang organisasyon ni Jehova, ginabuksan naton ang aton tagipusuon kay Jehova. (Sal. 62:8) Ang pagtuon sa sining paagi isa ka buhat sang pagsimba diin ginapabutyag naton ang aton debosyon kay Jehova kag ginapalig-on naton ang aton kaangtanan sa iya.—Jud. 20, 21.

5. Ngaa importante nga pamalandungan naton ang Pulong sang Dios kada adlaw?

⁵ Subong sang tanan nga mga kaangtanan, ang aton kaangtanan kay Jehova dapat atipanon sing padayon agod mapalambo naton ini sa aton kabuhi. Busa, kabay nga baklon naton ang tion kada adlaw nga mangin suod sa Dios, nakahibalo nga sia man magasuod sa aton.—Sal. 1:​2, 3; Efe. 5:​15, 16.