Regular nga Pagtambong sa Miting—Isa ka Prioridad
1 Ginahatagan sing prioridad sang Cristianong mga pamilya ang regular nga pagtambong sa mga miting. Apang ang kasakuon sa kabuhi karon mahimo makahalangkat. Ang mga hilikuton bala sa balay, sekular nga trabaho, ukon hilikuton sa eskwelahan nagaagaw sang aton tion nga ginpain sa pagsimba kay Jehova? Ang pagtamod sa mga butang suno sa pagtamod ni Jehova makabulig sa aton nga mahuptan ang aton mga prioridad.—1 Sam. 24:6; 26:11.
2 Paagi sa pagpangahoy sa Adlaw nga Inugpahuway, hungod nga ginpasapayanan sang isa ka Israelinhon nga lalaki ang pagtamod ni Jehova. Ayhan nangatarungan sia nga ginahimo niya ini para sa iya pamilya ukon diutay lamang ini nga butang. Apang, paagi sa paghukom nga ginhatag, ginpakita ni Jehova nga ang paghimo sing kinaandan nga mga hilikuton sa mga tion nga para sa pagsimba isa ka serioso nga butang.—Num. 15:32-36.
3 Pag-atubang sa Hangkat: Para sa madamo, nagakinahanglan sing paghimakas agod indi maupangan sang sekular nga trabaho ang pagtambong sa mga miting. Nalandas sang iban ini nga hangkat paagi sa pagpakighambal sa ila mga amo, pagbaylo sang iskedyul sa mga kaupod sa trabaho, pagpangita sing mas nagakaigo nga trabaho, ukon pagpasimple sang ila estilo sang pagkabuhi. Sa pagkamatuod, ini nga mga pagsakripisyo tungod sa matuod nga pagsimba nahamut-an gid sang Dios.—Heb. 13:16.
4 Mahimo man mangin hangkat ang hilikuton sa eskwelahan. “Ginahimo ko ang akon mga asaynment sa eskwelahan antes kag pagkatapos sang mga miting,” siling sang isa ka pamatan-on. Kon indi ini matapos sa mga gab-i sang miting, ginapaathag sang pila ka ginikanan sa mga manunudlo nga ang pagtambong sa Cristianong mga miting isa ka prioridad sang ila pamilya.
5 Ang kooperasyon kag maayo nga pagplano importante agod matapos ang mga hilikuton sa balay kag makahanda sa pagtambong sa mga miting subong pamilya nga indi maulihi. (Hulu. 20:18) Bisan ang magagmay nga kabataan sarang matudluan sa pag-ilis kag paghanda para sa miting. Paagi sa ila halimbawa, sarang mapatudok sang mga ginikanan sa ila kabataan ang importansia sang mga miting.—Hulu. 20:7.
6 Samtang nagadugang ang mga pag-ipit sining sistema sang mga butang karon, importante gid nga regular kita nga magtambong sa mga miting. Kabay nga tamdon naton pirme ang mga butang suno sa pagtamod ni Jehova kag himuon nga prioridad ang pagtambong sa mga miting.—Heb. 10:24, 25.