Iluga ang Panimuot ni Jesus

1. Ano nga panimuot ang ginpakita ni Jesus?

¹ Bisan pa wala naton makita ang Anak sang Dios, paagi sa nasulat nga rekord sang kabuhi kag ministeryo ni Jesus, ginhigugma gid naton sia. (1 Ped. 1:8) Bilang pagtuman sa kabubut-on sang iya Amay, ginbiyaan niya ang iya mataas nga posisyon sa langit kag nagkari sa duta. Sang nangin tawo, di-makagod nga nag-alagad sia sa iban kag ginhatag ang iya kabuhi para sa katawhan. (Mat. 20:28) Ginalaygayan kita sang Pulong sang Dios: “Hupti ninyo ini nga hunahuna, nga yara man kay Cristo Jesus.” Paano naton mailog ang iya masinakripisyuhon nga panimuot?​—Fil. 2:​5-8.

2. Ano nga pagtilaw ang ginaatubang sang madamo nga Cristiano, kag ano ang makabulig sa ila nga malandas ini?

² Kon Ginakapoy: Bisan pa himpit si Jesus, nakabatyag man sia sing kakapoy. Sang isa ka bes, bisan pa “nalapyo [sia] sang iya panlakatan,” maid-id sia nga nagpanaksi sa isa ka Samaritana. (Juan 4:6) Amo man sini nga pagtilaw ang ginaatubang sang madamo nga mga Cristiano karon. Pagkatapos sang isa ka semana nga makakalapoy nga trabaho, mabudlay mangita sing kusog agod makigbahin sa pagbantala nga hilikuton. Apang, kon himuon naton ini sing regular, masapwan naton nga makapapagsik sa espirituwal ang Cristianong ministeryo.​—Juan 4:​32-​34.

3. Paano naton mailog ang kahanda ni Jesus sa pagtudlo?

³ Sang isa pa ka bes, nagkadto sanday Jesus kag ang iya mga disipulo sa isa ka malinong nga lugar agod magpahuway sing makadali. Apang, nahibaluan ini sang isa ka dakung kadam-an kag nag-una sila didto agod makigkita sa ila. Sa baylo nga maakig, “naluoy [si Jesus] sa ila . . . kag nagsugod sia sa pagpanudlo sa ila sing madamo nga butang.” (Marcos 6:​30-​34) Amo man sini nga panimuot ang kinahanglanon naton kon nagasugod kag nagadumala sing mga pagtuon sa Biblia. Nagakinahanglan ini sing maukod nga panikasog kag matuodtuod nga gugma sa mga tawo. Kon wala ka pa karon sing ginatun-an sa Biblia, indi mangampo sa pagpangita.

4. Paano ang pag-auxiliary payunir makabulig sa aton sa pag-ilog sa panimuot ni Cristo?

⁴ Unaha ang Espirituwal nga mga Intereses: Ang pag-auxiliary payunir makabulig sa aton sa pagkonsentrar sa espirituwal nga mga hilikuton. Ang isa ka lamharon nga utod nga babayi nagsiling: “Ang iloy sang isa ko ka abyan nagpalig-on sa amon nga duha nga mag-auxiliary payunir upod sa iya sa sulod sang isa ka bulan. Nalipay gid ako nga nag-upod kami sa iya. Nakilala ko pa sing maayo ang mga kauturan, kag wala magdugay nangin kaangay sila sang pamilya sa akon. Nalipay man ako nga madamo ako sing kahigayunan nga makighambal sa iban tuhoy kay Jehova kag tudluan sila sang dalayawon nga mga kamatuoran sang Ginharian. Ining tanan nagpasuod sa akon kay Jehova kag sa iya organisasyon.”​—Sal. 34:8.

5. Ngaa dapat naton padayon nga panikasugan nga ilugon ang panimuot ni Jesus?

⁵ Tanan kita nagaatubang sa pagpakig-away sa ulot sang aton di-himpit nga unod kag sang aton handum nga pahamut-an si Jehova. (Roma 7:​21-​23) Dapat naton batuan ang nagapahapos sa kaugalingon nga panimuot sang kalibutan. (Mat. 16:22, 23) Buligan kita ni Jehova nga magmadinalag-on sa sini paagi sa iya balaan nga espiritu. (Gal. 5:​16, 17) Samtang ginahulat naton ang aton kaluwasan pasulod sa matarong nga bag-ong kalibutan sang Dios, kabay nga ilugon naton ang panimuot ni Jesus paagi sa pag-una sang mga intereses sang Ginharian kag sang mga intereses sang iban sa baylo sang aton kaugalingon nga mga intereses.​—Mat. 6:​33; Roma 15:​1-3.