‘Magpasangkad’
1. Ano ang responsabilidad sang tagsatagsa sa aton?
1 Sa Cristianong paghiliutod, ang tagsatagsa sa aton may responsabilidad nga magpaambit sing kapagsik sa kongregasyon. (1 Ped. 1:22; 2:17) Ini nga kapagsik ginapatubas kon ‘magpasangkad’ kita sa aton mapinalanggaon nga gugma sa isa kag isa. (2 Cor. 6:12, 13, NW) Ngaa importante nga makilala naton sing maayo ang aton mga kauturan?
2. Ngaa importante nga magpalambo sing mga pagpakig-abyan sa mga masigkatumuluo?
2 Nagabakod Pa ang mga Pag-abyanay: Samtang labi naton nga makilala ang aton mga masigkatumuluo, labi pa gid naton nga maapresyar ang ila pagtuo, pagbatas, kag iban pa nga mga kinaiya. Ang ila mga kakulangan daw wala na lang sing kaso para sa aton, kag ang pag-abyanay nagatubo. Bangod nagakilalahay sing maayo, labi naton nga mapabakod kag malugpayan ang isa ka isa. (1 Tes. 5:11) Mangin “nagapalig-on nga bulig” kita sa isa kag isa agod mapakigbatuan ang mga impluwensia sang kalibutan ni Satanas. (Col. 4:11, NW) Bangod sining puno sing pag-ipit nga katapusan nga mga adlaw, malipayon gid kita nga may maayong mga abyan sa tunga sang katawhan ni Jehova!—Hulu. 18:24.
3. Paano kita mangin makapalig-on nga bulig sa iban?
3 Ang suod nga mga abyan mangin isa ka pinasahi nga tuburan sang kalig-on kag lugpay kon nagaatubang kita sang mabug-at nga mga pagtilaw. (Hulu. 17:17) Ang isa ka Cristiano nga nakigbato sa balatyagon nga pagkawalay pulos naghinumdom: “May mga abyan nga nagahambal sing positibo nga mga butang tuhoy sa akon agod mabuligan ako nga masikway ang negatibo nga mga panghunahuna.” Ini nga mga abyan pagpakamaayo halin kay Jehova.—Hulu. 27:9.
4. Paano naton makilala sing maayo pa ang iban sa kongregasyon?
4 Magpakita Sing Interes sa Iban: Paano naton mapasangkad ang aton mapinalanggaon nga gugma sa aton mga masigkatumuluo? Magluwas sa pagtamyaw sa iban sa Cristianong mga miting, panikasugi nga makapakighambal sa ila sing mapuslanon. Magpakita sing personal nga interes sa ila apang wala nagapaningadtingad sa ila pribado nga pagkabuhi. (Fil. 2:4; 1 Ped. 4:15) Ang isa pa ka paagi nga malab-ot ang iban amo ang pag-agda sa ila sa pagkaon. (Luc. 14:12-14) Ukon sarang mo sila makaupod sa ministeryo sa latagon. (Luc. 10:1) Samtang nagapangita kita sing paagi nga kilalahon pa gid ang aton mga kauturan, mapalig-on naton ang paghiusa sa kongregasyon.—Col. 3:14.
5. Ano ang isa ka paagi nga mapasangkad naton ang aton pagpakig-abyan?
5 May huyog bala kita nga yadtong katubotubo lamang naton ang aton nangin suod nga kaupdanan ukon yadtong pareho lang naton sing interes? Indi naton dapat pagtugutan nga punggan sining mga butang ang pagpalambo naton sing pagpakig-abyan sa kongregasyon. Sanday David kag Jonatan subong man sanday Rut kag Naomi may mabakod nga pag-abyanay bisan tuhay sila sing edad kag ginhalinan. (Rut 4:15; 1 Sam. 18:1) Sarang mo bala mapasangkad ang imo pagpakig-abyan? Ang paghimo sini magadala sing wala ginapaabot nga mga pagpakamaayo.
6. Ano ang pila ka benepisyo sa pagpasangkad sang aton mapinalanggaon nga gugma sa aton mga kauturan?
6 Paagi sa pagpasangkad sang aton mapinalanggaon nga gugma sa iban, nagapalig-unanay kita sa isa kag isa kag nagapalambo sang paghidait sa kongregasyon. Dugang pa, si Jehova mismo magapakamaayo sa aton bangod sang gugma nga ginpakita naton sa aton mga kauturan. (Sal. 41:1, 2; Heb. 6:10) Ngaa indi mo paghimuon nga tulumuron ang pagpakigsuod pa gid sa madamo?