Ministerial Training School—Isa ka Daku nga Ganhaan nga Nagatuytoy Padulong sa Hilikuton
1 Paagi kay manalagna Jeremias, nagtagna si Jehova: “Magabangon ako sa [akon katawhan] sing mga manugbantay nga magabantay gid sa ila; kag indi na sila mahadlok, ukon malisang, kag wala sing bisan isa nga madula.” (Jer. 23:4) Inang pagbantay nga hilikuton ginahimo karon sa tunga sang katawhan sang tanan nga pungsod. Ginahimo ini karon sang linibolibo ka gulang sa kongregasyon. Dugang pa, ang grupo sang mga pamatan-on nga lalaki, nga ang kadamuon kaangay sang tun-og, nagaboluntaryo sing malipayon sa pag-alagad kay Jehova. (Sal. 110:3) Pagpakamaayo gid ining mapainubuson nga mga kauturan nga lalaki sa mga kongregasyon sang katawhan sang Dios! Samtang ang espirituwal nga pagtipon nagapadayon, kinahanglan pa gihapon ang kalipikado nga mga lalaki sa pag-alagad sa ila mga kauturan.
2 Ang maayo nga aman sa paghanas sa di-minyo nga mga gulang kag mga ministeryal nga alagad para sa dugang pa nga katungdanan amo ang Ministerial Training School. Kapin sa 22,000 ka estudyante halin sa 140 ka pungsod ang ginhanas na sa 999 ka klase nga ginhiwat sugod sang 1987. Sugod sang 1994, 40 ka klase ang nahiwat na sa Pilipinas, kag 1,037 ka estudyante ang naggradwar. Bisan pa nga gin-untat sing temporaryo ang klase agod hatagan sing higayon ang Eskwelahan Para sa mga Nagalakbay nga Manugtatap, ginaplano nga ipadayon ini sa Pilipinas sa Enero 2006. Para sa mga nakagradwar na, ini nga eskwelahan napamatud-an gid nga “isa ka daku nga ganhaan nga nagatuytoy padulong sa hilikuton.”—1 Cor. 16:9.
3 Katuyuan Sang Eskwelahan: Ang Ministerial Training School nagahanas kag nagasangkap sa kalipikado nga mga lalaki para sa mga responsibilidad kon diin mahimo kinahanglanon sila sa organisasyon. Ginapauswag sang eskwelahan ang ila mga ikasarang sa pagpanguna sa pagbantala nga hilikuton, pagbantay sa panong, kag pagtudlo sa kongregasyon. Pagkagradwar, ang iban ginhanas subong mga nagalakbay nga manugtatap sa Pilipinas, samtang ang iban gin-asayn subong mga misyonero sa iban nga pungsod. Ang iban gin-asayn sa pag-alagad sa ila kaugalingon nga kongregasyon ukon sa mga duog nga daku ang pagkinahanglan nga sakop sang teritoryo sang sanga.
4 Sa tion sang walo ka semana nga klase, maid-id nga ginatun-an sang mga estudyante ang Biblia. Ginabinagbinag nila sing maid-id ang madamo nga panudlo sang Biblia, subong man ang mga responsabilidad sang mga manugbantay kag ang mga giya sa paglubad sang mga palaligban sa pagkabuhi subong Cristiano. Ginatun-an man nila kon ano ang ginatudlo sang Kasulatan tuhoy sa pagdumala, hudisyal nga mga butang, kag mga kahimusan sa organisasyon. May pinasahi sila nga paghanas sa pagpamulongpulong publiko kag personal nga ginabuligan agod mapauswag ang ila espirituwalidad.
5 Mga Kalipikasyon: Mataas ang mga kalipikasyon sang mga mahimo makaeskwela. Ang mga aplikante kinahanglan nagaalagad subong gulang ukon ministeryal nga alagad sing di-magkubos duha ka alagisod nga tuig. Ang tanan di-minyo kag nagaedad sing 23 tubtob 50 anyos. Sa Pilipinas, ang mga aplikante dapat makabasa, makasulat, kag makahambal sing Ingles, kag may mapagros nga panglawas, nga wala nagakinahanglan sing pinasahi nga pagtatap ukon dieta. Mas ginapakamaayo kon regular payunir ang aplikante.
6 Ang mga aplikante dapat nga handa kag makasarang sa pag-alagad kon sa diin sila ginakinahanglan. Nagakinahanglan ini sang panimuot kaangay ni manalagna Isaias, nga malangkagon nga nagtanyag sang iya kaugalingon sa paghimo sing pinasahi nga hilikuton, nga nagasiling: “Yari ako! Ipadala ako.” (Isa. 6:8) Nagpakita man sia sing pagkamapainubuson sa tanan nga tion. Yadtong mga aplikante sa Ministerial Training School dapat pahulagon sang gugma sa ila mga kauturan kag sang handum sa pag-alagad sa ila sa baylo nga handumon nga mangin prominente. Pagkatapos nga mahanas, ang mga naggradwar ginapaabot nga mag-aplikar sang ila natun-an para sa kaayuhan sang iban.—Luc. 12:48.
7 Mga Kaayuhan: Sa tion sang walo ka semana sang maid-id nga paghanas, ang mga naggradwar “ginasagod sang mga pulong sang pagtuo kag sang maayong mga panudlo.” (1 Tim. 4:6) Magasangkap ini sa ila sa pagbulig kag sa pagpalig-on sa iban sa gin-asayn sa ila nga kongregasyon kag mga sirkito. Sa madamo nga mga duog diin gin-asayn ang mga naggradwar sa Ministerial Training School, nag-uswag ang hilikuton sa latagon; napalig-on ang payunir nga pag-alagad, ilabi na sa mga pamatan-on; kag natatap sing labi pa ang mga bag-uhan nga nagapakig-upod sa katawhan sang Dios.
8 Isa bala ikaw ka di-minyo nga gulang ukon ministeryal nga alagad nga yara sa pangidaron nga 23 tubtob 50 anyos? Ngaa indi mag-aplay sa Ministerial Training School sa inyo masunod nga sirkito nga asambleya? Isa bala ikaw ka pamatan-on nga lalaki nga nagapamalandong tuhoy sa imo mga tulumuron sa pag-alagad kay Jehova sa palaabuton? Ngaa indi pasimplehon ang imo kabuhi kag isikway ang mga tublag agod makasulod ka sa sining “daku nga ganhaan nga nagatuytoy padulong sa hilikuton”? Mangin malipayon ka kag maayawan sa paghimo sa sini. Huo, isa gid ka pagpakamaayo ang Ministerial Training School indi lamang sa mga naggradwar kundi sa mga kongregasyon man sang katawhan sang Dios sa bug-os nga kalibutan.
[Kahon sa pahina 3]
Kon Paano Sila Nakabenepisyo sa Paghanas
“Ang paghanas nagpauswag gid sang akon pagministeryo kag ikasarang sa pagbantay sa panong sing maalamon nga nagagamit sing Kasulatan.”
“Mas may kompiansa na ako sa pag-uyat sang lainlain nga mga katungdanan sa kongregasyon bangod sini nga paghanas.”
“Ginbag-o sini ang halos tanan nga bahin sang akon pagkabuhi, lakip na ang akon pagtamod sa paggahom sang Dios kag sa iya organisasyon.”
“Ginbuligan ako sang paghanas nga apresyahon ang pag-alagad kon sa diin ang may pagkinahanglan.”