Bag-o nga Programa sa Sirkito nga Asambleya

Sa sining “makahalanguyos nga mga tion nga mabudlay pakigbagayan,” kinahanglan naton ang diosnon nga kaalam agod matigayon kag mahuptan ang kahamuot ni Jehova. (2 Tim. 3:1) Ang programa sa sirkito nga asambleya para sa 2005, magaaman sa aton sing praktikal nga laygay kag pagpalig-on nga may tema nga “Magpatuytoy sa ‘Kaalam nga Gikan sa Hitaas.’”​—⁠Sant. 3:17.

Ang una nga simposium, “Pagpadayag Sang ‘Kaalam nga Gikan sa Hitaas’ sa Aton Kabuhi,” magabulig sa aton nga mahangpan kon ano ang nalakip sa mangin putli, mahidaiton, makatarunganon kag handa sa pagtuman. Nian ipatalupangod sang manugtatap sang sirkito ang tatlo pa ka bahin sang kaalam gikan sa Dios. Hinakpan sang manugtatap sang distrito ang una nga adlaw paagi sa pagpakita kon paano ang Cristianong mga ministro, bisan pa ginatamod sang iban subong “wala sing tinun-an kag kinaandan lamang,” nasangkapan sa pagpamulong sang kaalam sang Dios.​—⁠Binu. 4:13.

Sa ikaduha nga adlaw, ang simposium nga natig-uluhan “Panikasugi ang Makapalig-on nga mga Butang” magabulig sa aton sa pagkilala kag paglikaw sa mga butang nga mahimo makapaluya sa aton espirituwalidad. Ginapakita man sini kon paano naton mapalig-on ang iban sa mga miting sa kongregasyon, sa ministeryo sa latagon, kag sa sulod sang pamilya. Ang pamulongpulong publiko nga “Kon Paano Kita Makabenepisyo sa Kaalam Sang Dios,” magapatudok sang aton apresasyon para sa mga kaayuhan nga matigayon naton sa pag-aplikar sang kaalam sang Dios sa aton kabuhi. Ang nagahinakop nga pamulongpulong nga “Ang Pagpanghikot Nahisuno sa Kaalam Sang Dios Nagaamlig sa Aton” nagapalig-on sa aton pamat-od nga magtigayon sang kaalam ni Jehova sa sining katapusan nga mga adlaw.

Ang talalupangdon sa tagsa ka asambleya amo ang pagbawtismo sa bag-o nga mga disipulo. Ipresentar man sa programa ang Teokratikong Eskwelahan Para sa Ministeryo kag ang Pagtinuon sa Ang Lalantawan para sa amo nga semana. Luyag gid ni Jehova nga makabenepisyo kita tanan gikan sa kaalam nga iya ginaaman. Magabakod gid kita sa espirituwal paagi sa mga laygay kag pagpalig-on nga ginapaabot naton sa aton sirkito nga asambleya.​—⁠Hulu. 3:13-18.