Pagpanaksi sa mga Himata—Paano?
1. Ngaa kinahanglan ang paghantop kon nagapanaksi sa mga himata?
1 Isa gid ka daku nga kalipay nga makaupod naton ang aton mga hinigugma sa bag-ong kalibutan nga nahiusa sa pagsimba kay Jehova! Mangin tunay ini nga paglaum paagi sa pagpanaksi naton sa aton mga himata. Apang, agod mahimo ina sa makapaumpaw nga paagi, kinahanglan ang paghantop. Nagsiling ang isa ka manugtatap sang sirkito: “Nakatigayon sing maayo gid nga mga resulta ang mga nagpanaksi sa ila mga himata sa pulupanag-on tuhoy sa mga topiko nga nagapukaw sang ila pagkamausisaon.” Paano naton ini mahimo?
2. Paano ang aton tudok nga interes sa aton mga himata magabulig sa aton sa pagpukaw sang ila pagkamausisaon?
2 Pukawa ang Ila Pagkamausisaon: Hunahunaa sing maayo kon paano pukawon ang interes sang imo mga himata. (Hulu. 15:28) Ano ang ila mga ginakabalak-an? Ano ang ila mga problema? Ayhan mapaambit mo ang isa ka artikulo ukon hinambitan ang isa ka makagalanyat nga teksto tuhoy sa topiko nga naluyagan gid nila. Kon malayo sila sa inyo, mahimo mo sila sulatan ukon tawgan sa telepono. Isab-ug ang mga binhi sang kamatuoran sing amat-amat sa ila, kag magsalig kay Jehova sa pagpatubo sadtong mga binhi.—1 Cor. 3:6.
3. Paano ang interes sang aton mga himata sa aton mahimo maghatag sing kahigayunan para sa pagpanaksi?
3 Pagkatapos nga gintabog ni Jesus ang madamo nga demonyo halin sa isa ka tawo, ginsugo sia ni Jesus: “Pauli ka sa imo mga himata, kag sugiri sila sang tanan nga butang nga ginhimo ni Jehova sa imo kag sang iya kaluoy sa imo.” (Mar. 5:19) Hunahunaa kon ano ang epekto sini sa iya mga himata! Bisan pa indi gid man amo sina ang imo kahimtangan, mahimo nga interesado ang imo mga himata sa mga ginahimo mo ukon sang imo mga kabataan. Ang paghinambit sang imo bahin sa Teokratikong Eskwelahan Para sa Ministeryo, isa ka kombension nga imo natambungan, pagbisita sa Bethel, ukon importante nga hitabo sa imo kabuhi mahimo maghatag sa imo sing kahigayunan sa pagpaambit sa ila sing dugang pa nga impormasyon tuhoy kay Jehova kag sa iya organisasyon.
4. Ano nga mga tugalbong ang dapat likawan kon nagapanaksi sa mga himata?
4 Magmahinantupon: Kon nagapanaksi sa mga himata, likawi nga magsugid sa ila sing tuman kadamo nga impormasyon sa isa lang ka tion. Naghinumdom sang sia nagsugod sa pagtuon sa Biblia, ang isa ka utod nagsiling: “Ginpaathagan ko ang akon iloy sang tuman kadamo nga mga butang nga akon natun-an sa Biblia, kag masami ini nga nagdul-ong sa pagbaisay, ilabi na sa akon amay.” Bisan pa interesado ang imo himata sa mensahe sang Biblia, sabta sia sa paagi nga magapukaw pa gid sang iya interes sa pagtuon sing dugang pa. (Hulu. 25:7) Pirme magpakita sing pagtahod, kaayo, kag pagkamainantuson, kaangay sang ginapakita mo kon nagapakig-istorya ka sa mga estranghero sa ministeryo.—Col. 4:6.
5. Ano ang dapat naton himuon kon ang aton mga himata indi interesado sa aton pagpanaksi sa ila?
5 Isa ka bes, naghunahuna ang mga himata ni Jesus nga nagbuang sia. (Mar. 3:21) Apang sang ulihi, ang iban nangin mga tumuluo. (Binu. 1:14) Kon sa primero daw wala ginabaton sang imo mga himata ang kamatuoran, indi magpangampo. Ang mga kahimtangan kag mga panimuot mahimo magbag-o. Magpadayon sa pagpangita sang kahigayunan sa pagpaambit sang isa ka punto nga mahimo magapukaw sang ila interes. Malipay ka gid sa pagbulig sa ila sa paglakat sa dalan padulong sa kabuhi nga walay katapusan.—Mat. 7:13, 14.