Iskedyul Sang Pamilya—Mga Miting sa Kongregasyon
1 Kon isa ikaw ka Cristianong ginikanan, luyag mo nga ang imo kabataan magdaku nga nagahigugma kag nagaalagad kay Jehova, kag sa ulihi, makatigayon sing dayon nga kabuhi sa ginsaad sang Dios nga bag-ong kalibutan. Paano mo sila mabuligan agod unahon nila ang pagsimba kay Jehova? Ang isa gid ka paagi amo ang imo halimbawa. (Hulu. 20:7) Nagahinumdom sang halimbawa sang iya iloy, ang isa ka utod nga babayi nagsiling: “Wala gid sing pagpangduhaduha kon matambong kami ukon indi sa miting.” Nagtudok gid ini sa iya.
2 Nahangpan bala sang imo pamilya ang katuyuan sang mga miting sa kongregasyon? Ang instruksion nga nabaton naton sa sining mga pagtinipon nagapapagsik sa aton nga padayon nga himuon ang kabubut-on sang Dios, kag ang pagpakig-upod naton sa mga kauturan nangin hamili nga tuburan sang pagpalig-on. (Isa. 54:13; Roma 1:11, 12) Apang, ang panguna nga katuyuan sining mga miting amo ang pagdayaw kay Jehova “sa tunga sang nagtipon nga katilingban.” (Sal. 26:12) May kahigayunan kita sa Cristianong mga miting nga ipasundayag ang aton gugma kay Jehova kag simbahon sia.
3 ‘Magpadayon sa Pagbantay Sing Maayo’: Ang pag-apresyar sa sagrado nga katuyuan sang aton mga miting magapahulag sa aton nga ‘magpadayon sa pagbantay sing maayo’ agod indi kita maanad nga indi magtambong sa mga miting bangod sang indi tanto ka importante nga mga butang. (Efe. 5:15, 16; Heb. 10:24, 25) Kon nagahimo sang iskedyul sang pamilya, unaha nga sulatan ang tion sang mga miting sa kongregasyon. Nian siguraduha nga indi ini maupangan sang iban nga hilikuton. Pat-ura nga prioridad sang imo pamilya ang pagtambong sa miting.
4 Wala bala kita mapahulag kon mabasahan naton nga nalandas sang aton mga kauturan ang mga balagbag sa pagtambong sa mga miting kag mga asambleya? Bisan pa nga ang imo mga sirkunstansia indi tanto kabudlay, may mga hangkat man sa imo. Ginapabudlayan pa gid ni Satanas ang katawhan sang Dios sa pagsimba kay Jehova. Apang, pat-od nga matalupangdan sang imo kabataan ang determinado nga mga panikasog sang imo pamilya nga magtambong sa mga miting sa kongregasyon. Sa pagkamatuod, kon himuon mo ini, ginapaambit mo sa ila ang isa ka espirituwal nga dulot nga indi gid malimtan.