Bag-o nga Programa sa Adlaw Sang Pinasahi nga Asambleya

Ang mata may makatilingala nga desinyo. (Sal. 139:14) Apang isa lang ka butang sa isa ka tion ang mapokus sini. Matuod gid ina sa literal kag sing malaragwayon. Agod mangin maathag pirme ang aton espirituwal nga panulok, dapat naton isentro ang aton igtalupangod sa paghimo sang kabubut-on sang Dios. Bangod nagabaskog ang mga pagtublag sang kalibutan ni Satanas, nagakaigo gid nga ang programa sa adlaw sang pinasahi nga asambleya para sa 2006 magapaathag sang tema nga “Hupti nga Simple ang Imo Mata”!—⁠Mat. 6:⁠22.

Ano ang himuon naton agod matigayon ang mga pagpakamaayo ni Jehova? (Hulu. 10:22) Ini nga pamangkot binagbinagon sa bahin nga “Mga Pagpakamaayo sa Paghupot Sing Simple nga Mata.” Ang mga interbyu magapadaku kon paano kita makabenepisyo sa pag-aplikar sang Makasulatanhon nga mga prinsipio. Ang una nga pamulongpulong sang nagaduaw nga humalambal nga, “Paghupot Sing Simple nga Mata sa Malauton nga Kalibutan,” magapaandam sa aton sa mga butang nga mahimo magapabudlay sang aton kabuhi kag amat-amat nga magapuot sa aton espirituwalidad. Matun-an man naton kon ano ang nadalahig sa pagpili sing “maayo nga bahin.”—⁠Luc. 10:42.

Paano ang mga ginikanan kag ang iban pa makapalig-on sa mga Cristianong pamatan-on sa pagsentro sang espirituwal nga mga tulumuron? Ang bahin nga “Mga Ginikanan nga Nagapuntariya Sing Husto Sang Ila mga Baslay” kag “Mga Pamatan-on nga Nagatinguha Sang Espirituwal nga mga Tulumuron” magalakip sang mga sabat sang mga ginikanan kag pamatan-on sa sining importante nga mga pamangkot. (Sal. 127:4) Ang nagatakop nga pamulongpulong sang nagaduaw nga humalambal magabinagbinag kon paano kita makapakigdungan sa organisasyon ni Jehova subong indibiduwal, pamilya, kag subong kongregasyon.

Bag-uhan man kita sa kamatuoran ukon dinekada na nga nagaalagad kay Jehova, importante gid nga ‘huptan naton ang aton mata nga simple.’ Ang programa sa adlaw sang pinasahi nga asambleya magabulig sa aton nga mahimo ini.