Kon Ano ang Nahimo sang Aton Ministeryo

1. Paano ginatamod ni Jehova ang aton ministeryo, kag ano ang reaksion sang mga tawo?

¹ Ang Pulong sang Dios nagalaragway sa mga Cristiano nga nagamartsa nga madinalag-on sa pag-alagad kay Jehova, subong sang pagmartsa sang pagdaug. (2 Cor. 2:14-16) Kon ginapahayag naton ang ihibalo sang Dios, ang aton mga halad sang pag-alagad kaangay sang maamyon nga incienso kay Jehova. Ang iban naganyat sa maayong balita; samtang ginasikway ini sang iban. Apang, ang indi pagsapak sang kalabanan wala nagakahulugan nga indi madinalag-on ang aton hilikuton. Binagbinaga kon ano ang nahimo sang aton ministeryo.

2. Ano ang sarang naton mapakita paagi sa aton ministeryo?

² Nagapakadaku kay Jehova: Suno kay Satanas, makagod ang mga rason sang mga tawo sa pag-alagad kay Jehova. (Job 1:9-11) Ang Cristianong ministeryo nagahatag sa aton sing kahigayunan agod mapakita nga matuodtuod ang aton debosyon sa Dios. Padayon nga ginatuman sang madamong manugbantala ang sugo nga magbantala kag maghimo sing mga disipulo walay sapayan sang personal nga mga kabudlayan ukon sang di-pagsapak sang kalabanan nga tawo. Ining mainunungon nga pagbatas nagapahalipay sa tagipusuon ni Jehova!—⁠Hulu. 27:11.

3. Ngaa importante nga magpadayon kita sa pagpahibalo sang ngalan kag katuyuan sang Dios?

³ Dugang pa, may papel ang aton ministeryo sa katumanan sang katuyuan sang Dios. May kaangtanan sa nagapakari nga kalaglagan sang kalibutan ni Satanas, si Jehova nagsiling: “Makilala sang mga pungsod nga ako amo si Jehova.” (Ezeq. 39:7) Agod mahibaluan ini sang mga pungsod, dapat padayon nga ibantala sang mga alagad sang Dios ang Iya ngalan kag Iya katuyuan “sa tagsa ka pungsod kag tribo kag hambal kag katawhan.”—⁠Bug. 14:6, 7.

4. Paano ang pagbantala nangin basihan sang paghukom?

⁴ Basihan Para sa Paghukom: Ang pagbantala sang maayong balita nagahimo man nga basihan sang paghukom. Si apostol Pablo nagsiling nga si Cristo Jesus magatimalos sa ‘mga wala nagakilala sa Dios kag sa mga wala nagatuman sa maayong balita tuhoy sa aton Ginuong Jesus.’ (2 Tes. 1:8, 9) Hukman ang mga tawo suno sa ila reaksion sa maayong balita. Daw ano ka daku nga responsibilidad ang gintugyan sa mga alagad sang Dios! Agod indi makasala sa dugo, indi kita dapat magpangalag-ag sa pagpahayag sang nagaluwas kabuhi nga mensahe sang Ginharian.—⁠Binu. 20:26, 27.

5. Paano ginapabanaag sa aton ministeryo ang kaluoy sang Dios?

⁵ Ang aton pagpanikasog karon agod buligan ang iban nga mahamut-an sang Dios isa ka pagpakita sang kaluoy ni Jehova. (1 Tim. 2:3, 4) Bangod nahibaluan naton nga pirme nagabag-o ang pagkabuhi sang mga tawo, nagabalikbalik kita sa ila agod pangabayon sila nga pangitaon si Jehova samtang may tion pa. Sa paghimo sini, ginapabanaag naton ang “malulot nga kaawa sang aton Dios,” nga ‘indi luyag nga ang bisan sin-o malaglag kundi luyag nga ang tanan makadangat sa paghinulsol.’—⁠Luc. 1:78; 2 Ped. 3:9.

6. Ano ang mabenepisyo naton kon masako kita sa pag-alagad kay Jehova?

⁶ Benepisyo Naton: Pangamlig sa aton kon masako kita sa pag-alagad kay Jehova. Nagabulig ini sa aton nga ‘dumdumon gid pirme ang presensia sang adlaw ni Jehova’ kag makalikaw nga madagtaan sining karon malaut nga sistema sang mga butang. (2 Ped. 3:11-14; Tito 2:11, 12) Gani, kabay nga ‘magpakapag-on kita, nga di-mationg, nga madamo pirme sing ginahimo sa hilikuton sang Ginuo,’ kay nahibaluan naton nga ang aton pagpangabudlay sa Cristianong ministeryo indi walay pulos.—⁠1 Cor. 15:58.