Paano Kita Makabulig?
1 Ang pamangkot nga “Paano kita makabulig?” masami nga ginapautwas sang mga Saksi ni Jehova kon mabatian nila nga may kalamidad sa iban nga bahin sang kalibutan. Subong sang ginpakita sa Binuhatan 11:27-30, ang mga Cristiano sang unang siglo naghatag sing bulig sa mga utod nga nagapuyo sa Judea bangod sang tiggulutom.
2 Sa moderno nga tion, ang aton legal nga organisasyon nagtugot nga gamiton ang kuarta agod ibulig sa mga tawo nga nagaantos bangod sang kinaugali ukon himo-tawo nga mga kalamidad kag sa iban nga tion sang panginahanglan.
3 Halimbawa, sa nagligad nga duha ka tuig madamo nga mga utod ang nag-amot agod ibulig sa mga naapektuhan sang tsunami sa Bagatnan nga Asia, subong man sang bagyo nga Katrina sa nabagatnan sang Estados Unidos. Ining tinagipusuon nga bulig paagi sa pag-amot para sa pundo sang organisasyon nga ibulig sa mga biktima sang kalamidad ginapasalamatan gid sing daku. Apang, kon ang mga donasyon napartiniser lamang sa isa ka espesipiko nga kalamidad, ginapatuman sa pila ka pungsod nga gamiton ini nga pundo sa katuyuan lamang nga luyag sang nagdonar kag sa sulod lamang sang pila ka tion, nabuligan man ang lokal nga mga utod ukon wala.
4 Bangod sini, ginarekomendar nga ang mga donasyon para sa mga biktima sang kalamidad ihulog para sa bug-os kalibutan nga hilikuton. Ini nga pundo ginagamit sa pagbulig sa mga biktima subong man sa pagpasangkad sang espirituwal nga mga kinahanglanon sang Cristianong paghiliutod. Kon, sa pila ka rason, luyag sang isa ka tawo nga magdonar magluwas sa mga amot para sa bug-os kalibutan nga hilikuton, batunon kag gamiton gihapon ini kon sa diin nga duog ang bululigan gid. Apang, ginaapresyar gid kon ini nga donasyon iamot nga wala sing espesipiko nga katuyuan kon paano kag sa diin mahimo gamiton ang mga pundo.
5 Ang rason kon ngaa luyag namon nga sa bug-os kalibutan nga hilikuton iamot ang donasyon, amo nga agod madugangan ang pundo nga mahimo magamit may kaangtanan sa tanan nga bahin sang hilikuton sa Ginharian sa baylo nga ireserba ini para sa palaabuton nga mga biktima sang kalamidad. Nahisanto ini sa katuyuan sang Efeso 4:16, nga nagapanghikot kita agod maamanan ang kinahanglanon sa ‘pagpatubo sa lawas agod magbakod sa gugma.’