Edukasyon nga Nagatuytoy sa Kabuhi

¹ Makapaladya gid nga makita ang kalipay sang mga tawo kon mahangpan nila ang kamatuoran gikan sa Pulong sang Dios! Makaalayaw gid ang pagpaambit sa iban sang ihibalo sang Dios kag sang iya katuyuan sa katawhan. Ina nga edukasyon nagatuytoy sa isa ka tawo sa kabuhi nga walay katapusan.—⁠Juan 17:3.

² Kon Ngaa Superyor: Ginatanyag ang edukasyon karon sa halos tanan nga topiko nga mahunahunaan kag sa halos tanan posible nga paagi. (Man. 12:12) Apang ina nga ihibalo indi makatupong sa balor sang “halangdon nga mga butang sang Dios.” (Binu. 2:11) Ang mga edukasyon bala sa kalibutan nagapasuod sa mga tawo sa Manunuga kag nagapahibalo sang iya katuyuan? Nagabulig bala ini sa mga tawo nga mahangpan kon ano ang nagakatabo sa aton kon mapatay kita ukon kon ngaa tuman ang aton pag-antos? Nagahatag bala ini sing paglaum sa katawhan? Nagabulig bala ini nga mangin maayo ang kahimusan sa pamilya? Wala gid. Masabat lamang naton ining labing importante nga mga pamangkot sa kabuhi paagi sa diosnon nga edukasyon.

³ Ang diosnon nga edukasyon nagahatag sing butang nga wala sa kalibutan karon—⁠ang pag-uswag sa moral. Bug-os nga ginadula sang Pulong sang Dios ang rasismo, tribalismo, kag nasyonalismo sa tagipusuon sang mga nagabaton kag nagaaplikar sang mga panudlo sini. (Heb. 4:12) Nagpahulag ini sa mga tawo nga talikdan ang tanan nga sahi sang kasingki kag sa ‘pagsul-ob sang bag-o nga personalidad.’ (Col. 3:9-11; Miq. 4:1-3) Dugang pa, ang diosnon nga edukasyon nagahatag sa minilyon sing kabakod sa pag-untat sang nakapanggamot sing maayo nga mga buhat kag pamatasan nga di-kalahamut-an sa Dios.—⁠1 Cor. 6:9-11.

⁴ Kon Ngaa Hilingagawon Karon: Ang aton Dakung Manunudlo nagapahibalo sa aton sa kahulugan sang mga tion karon. Ang iya matagnaon nga mga paghukom nagaunod sing suno sa tion nga impormasyon nga dapat ibantala sa bug-os nga duta. (Bug. 14:6, 7) Si Cristo nagagahom na sa langit, ang emperyo sang butig nga relihion pagalaglagon sa dili madugay, kag nagahanda na ang Ginharian sang Dios sa paglaglag sang tanan dutan-on nga paggahom. (Dan. 2:44; Bug. 11:15; 17:16) Busa, hilingagawon karon nga kilalahon sang mga tawo ang nagagahom nga Hari sang Dios, maggua gikan sa Babilonia nga Daku, kag magpanawag sa ngalan ni Jehova nga may pagtuo. (Sal. 2:11, 12; Roma 10:13; Bug. 18:4) Kabay nga bug-os kita nga magpaambit sa iban sang edukasyon nga nagatuytoy sa kabuhi.