Buligi ang Imo Ginatun-an nga Apresyahon ang Wala Tupong nga mga Kinaiya ni Jehova
1 Sa aton ministeryo, wala lamang naton ginatudluan ang iban tuhoy sa sadsaran nga mga kamatuoran sa Biblia. Ginabuligan naton ang mga tawo nga makilala si Jehova subong isa ka persona kag maapresyar ang iya wala tupong nga mga kinaiya. Kon matun-an sang bunayag nga mga tawo ang kamatuoran tuhoy sa Dios, may daku gid ini nga epekto sa ila, kag magapahulag sa ila nga bag-uhon ang ila kabuhi “agod nga maglakat sing takus kay Jehova sa tuyo nga pahamut-an sia sing bug-os.”—Col. 1:9, 10; 3:9, 10.
2 Ang Aton Bag-ong Bulig sa Pagtuon: Sa umpisa sang Ginatudlo Sang Biblia nga libro, ginapatalupangod na sa sini ang mga kinaiya ni Jehova. Ginsabat na sa una pa lang nga kapitulo ang mga pamangkot nga: Nagaulikid gid bala ang Dios sa imo?, Ano nga sahi sang persona ang Dios?, kag Posible bala nga mangin suod sa Dios? Ini nga kapitulo nagapadaku man sang pagkabalaan ni Jehova (par. 10), sang iya hustisya kag kaawa (par. 11), sang iya gugma (par. 13), sang iya gahom (par. 16), kag sang iya kaluoy, kaayo, kag sang iya pagkamapinatawaron, pagkamapailubon, kag pagkamainunungon (par. 19). Ginsumaryo sang parapo 20 ini tanan paagi sa pagsiling: “Samtang nagadugang ang imo nahibaluan tuhoy kay Jehova, dugang pa nga mangin matuod sia sa imo kag makakita ka sing dugang pa nga rason nga higugmaon sia kag magbatyag nga suod sa iya.”
3 Paano naton magamit ang Ginatudlo Sang Biblia nga libro sa pagbulig sa mga estudyante sa Biblia nga mangin suod kay Jehova? Pagkatapos mabinagbinag ang isa ka parapo nga nagapadaku sang mga kinaiya sang Dios, mahimo naton pamangkuton ang estudyante, “Ano gid ang ginasugid sini sa imo tuhoy kay Jehova?” ukon “Paano ini nagapakita nga interesado gid ang Dios sa imo?” Paagi sa pagpamangkot sini kon kaisa sa tion sang pagtuon, ginatudluan naton ang aton estudyante nga magpamalandong sa ila natun-an kag mabuligan sila nga mapabaskog ang ila apresasyon sa wala tupong nga mga kinaiya ni Jehova.
4 Gamita ang Kahon sa Repaso: Sa katapusan sang kada kapitulo, pakomentuha sing kinaugalingon ang estudyante sa tagsa ka punto sa kahon nga “Ang Ginatudlo Sang Biblia.” Ipatalupangod sa iya ang mga teksto. Agod matungkad ang tagipusuon sang estudyante, mahimo mo sia pamangkuton, “Ano ang imo masiling tuhoy sa ginatudlo sang Biblia sa sini nga butang?” Sa paghimo sini, wala mo lamang ginapadaku ang pangunang mga punto sang kapitulo kundi mahibaluan mo man kon ano gid ang ginapatihan sang estudyante. Makabulig ini sa estudyante nga mapalambo ang iya kaangtanan kay Jehova.