Iluga si Jehova, ang Aton “Malipayon nga Dios”
1 Luyag gid ni Jehova nga magmalipayon ang mga tawo. Ang iya Pulong nagaunod sang paglaum tuhoy sa makahalawhaw nga mga pagpakamaayo nga iya gintuyo para sa katawhan. (Isa. 65:21-25) Dapat makita sang iban nga malipayon kita sa pagpaambit sang “mahimayaon nga maayong balita sang malipayon nga Dios” sa ila. (1 Tim. 1:11) Dapat makita sa pagpaambit naton sang mensahe sang Ginharian ang aton gugma sa kamatuoran kag ang aton tunay nga interes sa mga tawo nga aton ginasugilanon.—Roma 1:14-16.
2 Matuod, kon kaisa mabudlay mahuptan ang malipayon nga panimuot. Sa iban nga teritoryo, talagsa lang ang nagabaton sang mensahe sang Ginharian. May mga tion nga nagaatubang kita sang mga kabudlayan. Agod mahuptan ang malipayon nga panimuot, dapat hunahunaon naton kon daw ano ka importante nga mabatian kag mahangpan sang mga tawo sa aton teritoryo ang aton ginabantala nga mensahe sang Ginharian. (Roma 10:13, 14, 17) Ang pagpamalandong sa sini makabulig sa aton nga mahuptan ang kalipay sa pagpahayag sang maluluy-on nga mga aman ni Jehova para sa kaluwasan.
3 Magpokus sa Positibo: Dapat man naton talupangdon ang aton ginahambal. Bisan pa nga nagasugod kita paagi sa pagsambit sang isa ka problema ukon balita nga pamilyar sa mga tawo, dapat naton likawan ang padayon nga paghinun-anon sing negatibo nga mga butang. Ang sugo sa aton amo ang pagsugid sang “maayong balita tuhoy sa butang nga maayo pa.” (Isa. 52:7; Roma 10:15) Ining maayong balita napasad sa mga saad sang Dios nga isa ka masanag nga palaabuton. (2 Ped. 3:13) Ginahunahuna ini, gamita ang Kasulatan sa “pagbugkos sa mga buong sing tagipusuon.” (Isa. 61:1, 2) Magabulig ini sa aton tanan nga mahuptan ang malipayon kag positibo nga panimuot.
4 Pat-od gid nga matalupangdan sang mga tawo ang aton malipayon nga panimuot samtang nagabantala kita. Busa, padayon naton nga ipakita ang panimuot sang aton “malipayon nga Dios,” si Jehova, samtang ginapaambit naton ang maayong balita sang Ginharian sa mga tawo sa aton teritoryo.