Pagpakita Sing Personal nga Interes—Paagi sa Walay Pinilian nga Pagbantala
1 Sa isa ka palanan-awon, nakita ni apostol Juan ang isa ka anghel nga nagalupad sa kalangitan nga nagabantala sang walay katapusan nga maayong balita sa “tagsa ka pungsod kag tribo kag hambal kag katawhan.” (Bug. 14:6) Ginasunod bala naton ang halimbawa sang mga anghel paagi sa walay pinilian nga pagbantala? Lipod sa aton ihibalo, mahimo nga mangin madampigon ukon may pinasulabi kita. Maapektuhan sang aton panimuot sa mga tawo ang aton pagpresentar sang maayong balita sa ila. Busa, dapat naton ipakita ang aton tunay kag mahigugmaon nga pag-ulikid kon nagabantala sa mga tawo nga may nanuhaytuhay nga ginhalinan.
2 Binagbinaga ang Inyo Teritoryo: May mga imigrante ukon mga refugee bala sa inyo teritoryo? Mahimo nga wala sila mahatagan sing daku nga igtalupangod. Maghimo sing pamaagi sa pagpangita sa ila kag tinguhai nga makilala pa gid sila sing maayo. Ano ang ila mga ginakinahanglan kag ginakabalak-an, ang ila naluyagan kag di-naluyagan, ang ila mga kahadlok kag ila mga ginahunahuna? Tinguhai nga ipahisuno ang imo presentasyon sang mensahe sang Ginharian sa ila. (1 Cor. 9:19-23) Kaangay ni apostol Pablo, dapat naton batyagon nga obligasyon gid naton nga ipaambit ang maayong balita sa tanan sa aton teritoryo, lakip na yadtong gikan sa iban nga pungsod, may tuhay nga kultura, mga nagahambal sing tuhay nga lenguahe, kag yadtong mga manggaranon katama.—Roma 1:14.
3 Apang, paano ka makapanaksi sa mga tawo nga nagapamulong sing iban nga lenguahe? Gamita ang Good News for People of All Nations nga bukleta. Sarang mo man dal-on ang pila ka tract ukon brosyur sa lenguahe nga lapnag nga ginapamulong sa inyo teritoryo. (Tan-awa ang Hulyo 2003 nga Ang Aton Ministeryo sa Ginharian, p. 4, par. 2-3.) Dugang pa, ang iban nga manugbantala nagatinguha sa pagtuon sing isa ka pagtamyaw kag simple nga presentasyon sa iban nga lenguahe. Masami nga malipay ang mga tawo nga mabatian ang iban nga nagatinguha sa paghambal sang ila lenguahe, bisan pa nga limitado lamang ini, kag mahimo ini makaganyat sa ila sa maayong balita.
4 Iluga si Jehova: Paagi sa pagbantala sa mga tawo nga may nanuhaytuhay nga ginhalinan, ginailog naton ang aton walay pinilian nga Dios, si Jehova, ‘nga ang kabubut-on amo nga ang tanan nga sahi sang tawo maluwas kag makadangat sa sibu nga ihibalo sang kamatuoran.’—1 Tim. 2:3, 4.