Gintugyanan sang Isa ka Bahandi
1 Ginpabaloran gid ni apostol Pablo ang sugo sang Dios sa iya nga magbantala kag ginpatuhuyan niya ini nga isa ka “bahandi.” (2 Cor. 4:7) Ginbatas niya ang mga kabudlayan kag paghingabot sa pagtuman sini nga sugo. Makugi nga ginbantalaan niya ang tanan nga iya masugilanon. Nagbiyahe sia sing madamong mabudlay kag delikado nga mga paglakbay kag pagpanakayon. Paano naton mailog si Pablo kag mapakita nga ginapabilihan naton ang aton ministeryo? (Roma 11:13) Ngaa wala gid sing makatupong nga bahandi sa aton ministeryo?
2 Isa ka Superyor nga Bahandi: Ang mga bahandi sa duta masami nga nagadala sing daku nga kasakit kag limitado lamang ukon temporaryo ang mga benepisyo sini. Sa pihak nga bahin, ang aton ministeryo nagadala sing mapinadayunon nga mga benepisyo sa aton kag sa iban. (1 Tim. 4:16) Nagabulig ini sa sinsero nga mga tawo nga makilala si Jehova, maghimo sing kinahanglanon nga mga pagbag-o sa ila kabuhi, kag matigayon ang matuod nga paglaum nga kabuhi nga wala sing katapusan. (Roma 10:13-15) Paagi sa pagpabalor naton sa aton ministeryo, matigayon naton ang isa ka makaalayaw nga katuyuan sa kabuhi, isa ka mapinadayunon nga pagbatyag nga may nahimuan, kag isa ka makalilipay nga paglaum sa palaabuton.—1 Cor. 15:58.
3 Ipakita nga Ginapabaloran Mo ang Imo Bahandi: Ang pagpabalor naton sa isa ka butang masami nga napadayag sa kon ano ang handa naton nga isakripisyo tungod sini. Isa gid ka pribilehiyo nga ihugod naton ang aton tion kag kusog sa pagdayaw kay Jehova! (Efe. 5:16, 17) Ang pamaagi naton sa paghinguyang sang aton tion dapat magpakita nga mas ginapabaloran naton ang espirituwal nga mga butang sangsa materyal nga mga butang. Bangod may butang kita nga bilidhon katama nga dapat ipaambit, luyag naton magbantala sing mapagsik kag mangin handa sa pagsugid sang maayong balita sa tanan nga kahigayunan.
4 Kinaandan na nga wala ginatago ang tuman ka mahal nga mga bahandi kundi ginadispley ini agod makita sang iban. Kon ginatamod naton ang aton ministeryo subong sang isa ka bahandi, mangin panguna ini nga bahin sang aton kabuhi. (Mat. 5:14-16) Upod ang mapinasalamaton nga tagipusuon, kabay nga ilugon naton pirme si apostol Pablo kag kalitan ang tanan nga kahigayunan agod ipakita nga ginapabaloran gid naton ang aton ministeryo, nga nagakabig sini subong isa ka bahandi.