“Ano ang Imo Sabat?”
1. Ano nga mga hangkat ang ginaatubang sang madamo sa aton?
1 Nalipay ka gid bala sa Pulong sang Dios apang nabudlayan ka sa pagdumdom sa mga detalye sang mga kasaysayan sa Biblia ukon sa espesipiko nga mga pinamulong nga narekord sa Kasulatan? Luyag mo bala nga mahangpan sing sibu sang imo kabataan ang sadsaran nga mga katunayan kag mga panudlo sang Biblia? Ang bahin nga “Ano ang Imo Sabat?” nga ginabalhag kada bulan sa pahina 31 sang Magmata! makabulig lunsay sa bata kag tigulang nga matun-an sing mas maayo ang Pulong sang Dios.—Binu. 17:11.
2. Paano mahimo gamiton ang nanuhaytuhay nga bahin sang “Ano ang Imo Sabat?”
2 Paano ninyo magamit sing maayo ini nga bahin sang magasin? Ang Enero 2006 nga gua sang Magmata! naghatag sing masunod nga mga panugda: “Tan-awa sing makadali ang pahina 31 . . . Ang pila ka seksion sini nga pahina maluyagan sang lamharon nga mga bumalasa; ang iban naman nga bahin magatilaw sa memorya sang mga may madalom nga ihibalo sa Biblia. Ang bahin nga ‘San-o Ini Natabo?’ magabulig sa imo nga mangin pamilyar sa kon san-o nagkabuhi ang mga tawo nga ginasambit sa Biblia kag kon san-o natabo ang importante nga mga hitabo. Bisan pa nga ang mga sabat sa ‘Sa Sini nga Gua’ masapwan sa bug-os nga magasin, ang sabat sa kalabanan sini nga mga pamangkot masapwan sa isa ka espesipiko nga pahina sa sini man nga gua, diin ipahamtang ini sing pabaliskad. Ngaa indi magpanalawsaw anay antes mo basahon ang mga sabat kag nian ipaambit sa iban ang imo mga natun-an? Mahimo mo man gamiton ining bag-o nga bahin, ‘Ano ang Imo Sabat?’ subong basehan para sa pangpamilya ukon grupo nga paghinun-anon sa Biblia.”
3. Paano nakapanginpulos ang pila ka pamilya sa sini nga bahin sang magasin, kag ano nga bahin sini ang naluyagan mo gid?
3 Sa pagkamatuod, madamo nga pamilya ang nanamian sa paggamit sini nga bahin sa ila pangpamilya nga pagtuon. Ang isa ka iloy nagsulat: “Naghunahuna kami sang akon bana nga maayo siguro nga ilakip ang ‘Mga Laragway nga Pangitaon Sang mga Kabataan’ sa amon pangpamilya nga pagtuon sang Biblia agod mas mapagsik kag makawiwili ini para sa amon tatlo ka tuig nga bata nga babayi. Nalipay gid kami sa pagtan-aw sa iya nga nagadalidali kuha sang iya personal nga kopya sang Magmata! kag ginabukad ang kada pahina sini tubtob makita niya ang iya ginapangita.” Ang isa ka amay sa Brazil nagsiling: “Kami sang akon pito ka tuig nga bata nga lalaki nanamian gid sa sining bahin sang Magmata! Nabuligan sini si Moises nga magpahimunong, mangita sing mga teksto, maapresyar ang mga laragway, kag mahangpan ang mga petsa.” Ang otso anyos nga si Ashley nagsulat: “Salamat sa ‘Ano ang Imo Sabat?’ sa likod sang Magmata! Madamo ako sing natun-an tuhoy sa Biblia gikan sa sini.”
4. Paano magamit sang pamilya ining bahin sang magasin sa ila pangpamilya nga pagtuon sang Biblia?
4 Ngaa indi mo gamiton ang “Ano ang Imo Sabat?” sing pulupanag-on sa inyo pangpamilya nga pagtuon? Puede mo gamiton ang Index ukon ang Watchtower Library sa CD-ROM sa pagpangita sa mga sabat sa pila ka mabudlay nga mga pamangkot. Sa paghimo sini, matudluan mo pa ang imo kabataan kon paano magpanalawsaw. Kon may mas hamtong ka na nga kabataan, ngaa indi pag-iasayn sa ila ang pagpanalawsaw sa mga sabat sa “Sin-o Ako?” ukon “San-o Ini Natabo?” antes sang inyo pangpamilya nga pagtuon? Nian, mapaambit nila ang resulta sang ila panalawsaw sa tion sang pagtuon. Ang epektibo nga paggamit sining pahina amo ang isa ka paagi nga mapatudok sang mga ginikanan ang Pulong sang Dios sa ila kabataan, nga nagabulig sa ila nga makilala “ang balaan nga mga sinulatan” gikan sa pagkalapsag.—2 Tim. 3:15; Deut. 6:7.