Malipay Kita nga Ipagamit ang Aton Kaugalingon sa Pag-alagad kay Jehova!
1 Nalipay si apostol Pablo nga ‘magpagamit sing bug-os’ agod matuman ang iya Cristianong ministeryo. (2 Cor. 12:15) Amo man karon, madamo nga Cristiano ang mapisan nga nagaalagad subong mga payunir. Ang iban nga may mabug-at nga mga salabton sa pamilya, bisan pa masako, nagaiskedyul gid agod makapakigbahin sa ministeryo kada semana. Ang pila nga may malubha sing balatian naggamit sang ila limitado nga kusog sa pagpasanyog sang mga intereses sang Ginharian. Makapalig-on gid makita ang katawhan ni Jehova, ano man ang ila pangidaron ukon mga kahimtangan, nga nagagamit sang ila kaugalingon sa pag-alagad sa Iya!
2 Gugma sa Isigkatawo: Mangin matinlo ang aton konsiensia kon himuon naton ang aton bug-os nga masarangan sa pag-alagad kay Jehova kag ipakita ang aton gugma sa Dios kag sa isigkatawo. Bangod ginhinguyang gid ni Pablo ang iya bug-os nga kabuhi sa pagbantala sang maayong balita, malipayon sia nga nakasiling: “Ginpatawag ko kamo agod magsaksi sini gid nga adlaw nga matinlo ako sa dugo sang tanan nga tawo.” (Binu. 20:24, 26; 1 Tes. 2:8) Indi kita mangin makasasala sa dugo kon nagapakigbahin kita sing bug-os sa ministeryo.—Ezeq. 3:18-21.
3 Ang pagpanikasog gid sa pagbulig sa iban nagahatag sa aton sing kalipay. (Binu. 20:35) Nagsiling ang isa ka utod nga lalaki: “Matuod, kapoy ako, kon magpauli ako sa gab-i sa tapos sang isa ka adlaw nga pag-alagad kay Jehova. Apang malipayon ako, kag nagapasalamat ako kay Jehova nga ginhatagan niya ako sing kalipay nga indi maagaw sang bisan sin-o.”
4 Gugma sa Dios: Ang pinakaimportante nga rason sa pagpagamit sang aton kaugalingon sa pag-alagad kay Jehova amo nga ginakahamut-an ini sang aton langitnon nga Amay. Ang gugma sa Dios magapahulag sa aton nga sundon ang iya mga sugo, nga nagalakip sa pagbantala kag paghimo sing mga disipulo. (1 Juan 5:3) Bisan pa indi magsapak ukon magpamatok ang mga tawo sa aton, malipayon kita nga nagapadayon sa pagpangabudlay sing lakas para kay Jehova.
5 Indi karon ang tion sa pag-untat. Nagakabuhi kita sa tion sang tig-alani. (Mat. 9:37) Kinaandan na nga masako gid ang mga mangunguma sa tion sang tig-alani bangod limitado lamang ang ila tion sa pagtipon sang alanyon antes ini maluntay. Ang tion para sa espirituwal nga pagpangani limitado man. Ginadumdom pirme ang tion nga aton ginakabuhian, kabay nga magpadayon kita tanan sa pagpanikasog sing lakas sa ministeryo.—Luc. 13:24; 1 Cor. 7:29-31.