Padayon sa ‘Pagpamunga sing Madamo Pa’
1 Nagagamit sing simbuliko nga mga termino, ginpatuhuyan ni Jesus ang iya kaugalingon subong ang matuod nga puno sang ubas, ang iya Amay subong ang Mangunguma, kag ang iya hinaplas sa espiritu nga mga sumulunod subong mabungahon nga mga sanga sang puno sang ubas. Bilang paglaragway sa hilikuton sang simbuliko nga Mangunguma, ginpadaku ni Jesus ang importansia sa pagpabilin nga nagaangot gid sa puno sang ubas. (Juan 15:1-4) Ginapakita sini nga ang bisan sin-o nga may suod kag personal nga kaangtanan kay Jehova dapat mangin kaangay sang mabungahon nga sanga sang “matuod nga puno sang ubas,” si Jesucristo. Dapat kita magpadayon sa pagpatubas sing bugana nga “mga bunga sang espiritu” kag mga bunga sang Ginharian.—Gal. 5:22, 23; Mat. 24:14; 28:19, 20.
2 Mga Bunga sang Espiritu: Sa masami ang aton espirituwal nga pag-uswag halos nagadepende sa pagpadayag naton sang mga bunga sang espiritu. Ginatinguhaan mo bala nga mapalambo ang mga bunga sang espiritu sang Dios paagi sa regular nga pagtuon kag pagpamalandong sa Pulong sang Dios? (Fil. 1:9-11) Indi mangalag-ag sa pagpangamuyo sang balaan nga espiritu, nga nagapatubas sang mga kinaiya nga magahimaya kay Jehova kag magabulig sa imo sa padayon nga pag-uswag sa espirituwal.—Luc. 11:13; Juan 13:35.
3 Ang pagpalambo sang mga bunga sang espiritu magabulig man sa aton nga mangin mas makugi nga mga ministro. Halimbawa, bisan pa masako kita, ang gugma kag pagtuo magapahulag sa aton nga mag-iskedyul sa pagpakigbahin sing regular sa ministeryo. Ang mga kinaiya subong sang paghidait, pagkamapinasensiahon, kaayo, kalulo, kag pagpugong sa kaugalingon magabulig sa aton nga indi makigbais sa mga manugpamatok. Ang kalipay magabulig sa aton nga makabatyag sing kaayawan sa ministeryo bisan pa di-mabinatunon ang mga tawo.
4 Mga Bunga sang Ginharian: Luyag man naton nga magpatubas sang mga bunga sang Ginharian. Lakip sa sini ang pagdulot “sang halad sang pagdayaw, nga amo ang bunga sang mga bibig nga dayag nga nagapahayag sang . . . ngalan [ni Jehova].” (Heb. 13:15) Ginahimo naton ini paagi sa makugi kag determinado nga pagbantala sang maayong balita. Nagapanikasog ka bala nga makapatubas sing kapin pa nga mga bunga sang Ginharian paagi sa pagpauswag sang imo pagministeryo?
5 Ginpakita ni Jesus nga indi alalangay ang bunga nga mapatubas sang iya matutom nga mga sumulunod. (Mat. 13:23) Busa, indi naton dapat ipaanggid ang aton kaugalingon sa iban kundi ihatag kay Jehova ang aton bug-os nga masarangan. (Gal. 6:4) Ang bunayag nga pag-usisa sang aton personal nga mga kahimtangan pasad sa Pulong sang Dios magabulig sa aton nga pirme himayaon si Jehova paagi sa ‘pagpamunga sing madamo pa.’—Juan 15:8.