“Malipayon ang Tawo nga Padayon nga Nagabatas sang Pagtilaw”
1 Ang tanan nga Cristiano pagatilawan. (2 Tim. 3:12) Mahimo kita matilawan paagi sa balatian, kapigaduhon, pagsulay, paghingabot ukon iban pa. Ginatilawan kita ni Satanas agod magluya kita sa aton pag-alagad, mangin uyaya sa aton Cristianong ministeryo, ukon mag-untat pa gani sa pag-alagad sa Dios. (Job 1:9-11) Apang, paano ang pagbatas sa mga pagtilaw nagaresulta sa kalipay?—2 Ped. 2:9.
2 Maghanda sa mga Pagtilaw: Gin-aman ni Jehova ang iya Pulong sang kamatuoran, lakip ang rekord sang kabuhi kag mga panudlo ni Jesus. Kon aton tun-an kag iaplikar ang mga pulong ni Jesus, makapasad kita sing mabakod nga sadsaran kag sa amo mangin handa sa pagtilaw. (Luc. 6:47-49) Mapabakod man kita sang aton Cristianong mga utod, sang mga miting sa kongregasyon kag sang pasad sa Biblia nga mga publikasyon gikan sa matutom kag mainandamon nga ulipon. Ang isa pa gid ka aman sang Dios amo ang pangamuyo, busa pirme kita makapangamuyo sa iya.—Mat. 6:13.
3 Ginhatagan man kita ni Jehova sing paglaum. Kon nagatuo gid kita sa mga saad ni Jehova, ang aton paglaum mangin kaangay sang “angkla para sa kalag, pat-od kag masaligan.” (Heb. 6:19) Sadto nga tion, ang mga sakayan wala nagabiya sa pantalan nga wala sing dala nga angkla, bisan pa maayo ang tiempo. Kon hinali nga mag-unos, ang paghulog sang angkla makabulig agod indi ilampos sang mamadlos nga hangin ang sakayan sa kabatuhan. Sing kaanggid, kon nagatuo gid kita sa mga saad sang Dios, indi kita malingkang kon makaatubang kita sing tulad-unos nga mga problema. Ang mga kabudlayan mahimo nga hinali nga matabo. Bisan pa nga sa primero ginbaton ang pagbantala nanday Pablo kag Bernabe sa Listra, hinali nga nagbag-o ang kahimtangan sang nag-abot ang mga manughingabot nga mga Judiyo.—Binu. 14:8-19.
4 Ang Pagbatas Nagaresulta sa Kalipay: Mangin malinong ang aton hunahuna kon nagapadayon kita sa pagbantala bisan pa ginapamatukan kita. Mangin malipayon kita kon kabigon kita nga takus pakahuy-an tungod sa ngalan ni Cristo. (Binu. 5:40, 41) Ang pagbatas sa mga pagtilaw makabulig sa aton nga mangin mas mapainubuson, mas matinumanon kag mas mabinatason. (Deut. 8:16; Heb. 5:8; Sant. 1:2, 3) Sa sini nga paagi, makatuon man kita sa pagsandig kay Jehova, sa pagsalig sa iya mga saad kag sa pagdangop sa iya.—Hulu. 18:10.
5 Nahibaluan naton nga umalagi lamang ang mga pagtilaw. (2 Cor. 4:17, 18) Nagahatag ini sa aton sing mga kahigayunan nga mapadayag kon daw ano ka daku ang aton gugma kay Jehova. Paagi sa pagbatas, masabat naton ang mga panumbungon ni Satanas. Busa, wala kita nagapangampo! “Malipayon ang tawo nga padayon nga nagabatas sang pagtilaw, kay bangod nahamut-an sia batunon niya ang purongpurong sang kabuhi.”—Sant. 1:12.