Makakulunyag nga mga Pagbag-o sa Ang Lalantawan!
1 Sang nagligad, nakabaton ang mga kongregasyon sang isa ka makakulunyag nga pahibalo: Sugod sa Enero 2008, ibalhag ang Lalantawan sa duha ka magkatuhay nga edisyon, ang isa para sa publiko kag ang isa para sa mga kauturan! Ayhan mamangkot ka: ‘Ano ang kinatuhayan sang duha ka magasin? May mga bentaha bala ang magkatuhay nga edisyon? May bag-o bala ini nga mga bahin?’
2 Ang mga Kinatuhayan: Ang petsa uno nga gua sini nga magasin pagatawgon nga Pangpubliko nga Edisyon. Ang tanan nga artikulo sa sini nga gua gintuyo para gid sa publiko. Ang petsa kinse nga gua sini pagatawgon nga Tulun-an nga Edisyon kag indi ini pag-itanyag sa pag-alagad sa latagon. Magaunod ini sang tanan nga artikulo nga tulun-an para sa bug-os nga bulan kag sang iban pa nga mga artikulo nga gintuyo para gid sa dedikado nga mga Cristiano. Ang Pangpubliko nga Edisyon sang Ang Lalantawan indi lamang maluyagan sang mga Saksi kundi pati man sang mga di-Saksi nga mahimo nagapati sa Biblia. Sa pihak nga bahin ang Magmata!, ginatuyo gihapon para sa tanan nga tawo, lakip sa mga maduhaduhaon kag sa mga indi Cristiano.
3 Ang mga Bentaha: Indi na kinahanglan pa nga ipaathag ang tinaga kaangay sang “payunir” sa Tulun-an nga Edisyon agod mahangpan sang mga indi Saksi. Magaunod ini sing direkta nga mga impormasyon para gid sa mga Saksi ni Jehova kag sa mga estudyante sang Biblia nga nagauswag sa ila pagtuon. Kamusta naman ang Pangpubliko nga Edisyon? Bangod ang mga topiko kag ang estilo sang pagsulat gintuyo para sa publiko, mahimo nga maluyagan sang mga di-Saksi ang pagbasa sang tanan nga artikulo sa magasin. Siempre pa, ang tanan nga mga Saksi ni Jehova makapanginpulos man sa pagbasa sa sini nga mga gua. Dugang pa, bangod isa na lang ka Lalantawan kag Magmata! ang aton itanyag sa tagsa ka bulan sa pagbantala sa latagon, ang aton presentasyon magamit naton sa bug-os nga bulan.
4 Mga Bag-o nga Bahin: Magaunod sing makawiwili nga bahin ang Pangpubliko nga Edisyon sang Ang Lalantawan. May artikulo ini nga magabinagbinag tuhoy sa sadsaran nga mga panudlo sa Kasulatan sa pinakasimple nga paagi. Ang isa pa ka artikulo sini magapakita kon paano mabuligan sang Biblia ang mga pamilya. Magaunod man ini sang mga asaynment nga mahimo ipanalawsaw sang mga pamatan-on. Ang tagsa ka gua may artikulo man nga magapatalupangod sang espesipiko nga mga dinalan sa Biblia agod tudluan kita tuhoy kay Jehova subong isa ka persona.
5 Ipangamuyo naton nga pakamaayuhon ni Jehova ining bag-o nga kahimusan tuhoy sa Ang Lalantawan. Kabay pa nga ining magasin, upod ang Magmata!, makalab-ot sa madamo nga tawo nga takus sang maayong balita.—Mat. 10:11.