Lugpay Para sa Buong sing Tagipusuon
1 Sa kasaysayan sang katawhan, ginakinahanglan gid karon nga tion ang paglugpay. Bilang pag-ilog sa aton Hari, nga si Cristo Jesus, nagatinguha man kita sa “pagbugkus sang boong sing tagipusuon.”—Isa. 61:1.
2 Pamaagi: Agod malugpayan ang mga tawo, dapat nga mangin balanse kag positibo ang aton presentasyon sa aton ministeryo. Agod mangibabaw sa aton pagsugilanon ang mga kamatuoran sa Kasulatan kag ang masanag nga paglaum tuhoy sa makapalugpay nga saad sang Dios dapat indi kita magdugay sa paghinun-anon sa malain nga nagakatabo sa kalibutan kag sa butig nga mga panudlo. Apang, indi buot silingon nga indi na lang naton pag-istoryahan ang tuhoy sa Armagedon. Ang sugo sa aton amo ang pagbantala sang “tuig sang kahamuut sang GINOO, kag sang adlaw sang pagtimalus sang Dios naton,” kag sa “pagpaandam sang malauton gikan sa iya malaut nga dalanon.” Apang, ang paandam tuhoy sa Armagedon kag ang paglaragway sang kalaglagan sini indi dapat mangibabaw sa maayong balita sang ginharian sang Dios.—Isa. 61:2; Ezeq. 3:18; Mat. 24:14.
3 Sa Balay kag Balay: Kinaandan na nga makasugilanon kita sing mga tawo nga naluyahan sing buot bangod sang balatian, kamatayon sang hinigugma, inhustisya, ukon kapurauton. Subong manug-ilog ni Cristo, “nalooy” kita kag nagasimpatiya sa mga masugilanon naton sa ministeryo. (Luc. 7:13; Roma 12:15) Bisan pa ginapaambitan naton sila sing isa ukon duha ka teksto may kaangtanan sa problema, dapat kita “magmadagmit sa pagpamati,” sa amo matugutan naton sila nga ipabutyag ang ila mga balatyagon. (Sant. 1:19) Kon mapamatian na naton sila, mas masangkapan kita sa paglugpay sa ila.
4 Sa nagakaigo nga tion sang aton pagsugilanon, mahimo kita magsiling, “Luyag ko ipaambit sa imo ang pila ka makapalig-on nga mga pinamulong sang Biblia.” Dapat nga mangin makatarunganon kita agod malikawan naton ang pagbali sa tagsa ka sayop nga pagtamod nga ipabutyag sang aton masugilanon. Sa baylo, dapat ang aton tulumuron amo ang pagpalig-on kag paglugpay paagi sa Kasulatan agod nga pabakuron sila. Sa sini nga bahin, mahimo mo usisaon ang Reasoning From the Scriptures pahina 117-121 sa idalom sang subtitulo nga “Encouragement.” Ukon, mahimo mo hatagan ang tagbalay sing tract nga Paglipay Para sa Napung-awan kag repasuhon ang makapalig-on nga impormasyon sa sini.
5 Mangita sing mga Kahigayunan sa Paglugpay sa Iban: May kilala ka bala nga kasilingan, katrabaho, kaeskwela, ukon paryente nga nagakinahanglan sing lugpay? Ngaa indi mo panikasugan nga maduaw sila sa ila mga balay agod ipaambit ang paglugpay sang Kasulatan? Kon mahibaluan mo kon ngaa kinahanglan nila ang lugpay, mahimo mo mahandaan ang iya partikular nga kahimtangan. Ang iban nagasulat ukon nagatawag sa telepono agod lugpayan ang iban. Ang matuod nga gugma sa isigkatawo amo ang magapahulag sa aton sa pagpakita sing kahanuklog kag paghatag sing lugpay gikan sa Kasulatan.—Luc. 10:25-37.
6 Huo, ginsugo kita nga lugpayan ang mga nagalalaw, palig-unon ang nagapangasubo, kag ipaambit ang masanag nga palaabuton. Amo gid ini nga lugpay ang ginakinahanglan sang mga tawo sa bug-os nga kalibutan. Ang malipayon nga pagsugid tuhoy sa maayong mga butang nga ginsaad sang Dios magahatag sing lugpay kag paglaum sa mga bunayag sing tagipusuon. Kabay pa nga pirme naton dumdumon nga kinahanglan naton bugkusan ang buong sing tagipusuon.