Mahimo Mo Matigayon ang Kamanggaran!
1. Ngaa dapat mo binagbinagon ang pagregular payunir?
1 Luyag mo bala nga mangin mas malipayon kag makaalayaw ang imo kabuhi? Nalipay ka bala sa pagbulig sa iban? Handum mo bala nga dugangan ang imo pag-alagad kay Jehova? Kon huo ang imo sabat sa bisan diin sa sini nga mga pamangkot, dapat mo binagbinagon ang pagregular payunir. Siempre, may mga butang nga dapat binagbinagon, subong sang pangpamilya kag iban pa nga Makasulatanhon nga mga salabton kag pisikal nga mga limitasyon.
2. Sambita ang pila ka espirituwal nga kamanggaran nga ginaagom sang mga regular payunir.
2 Ang mga sinulatan ni Solomon nga gintuytuyan sang Dios nag-angot sang pagpakamaayo ni Jehova sa materyal nga manggad. (Hulu. 10:22) Sa karon, ang pagpakamaayo ni Jehova nagaresulta ilabi na sing espirituwal nga kamanggaran. Ang mga regular payunir manggaranon gid sa espirituwal. Halimbawa, nakaagom sila sing mas daku nga kalipay sa paghatag sa iban samtang ‘nagabakal sila sing nagakaigo nga tion’ gikan sa ila personal nga mga buluhaton. (Col. 4:5; Binu. 20:35) Ang ila mga pagpangabudlay bangod sa gugma ginatalupangod kag ginaapresyar gid ni Jehova. Ang balor sinang “mga bahandi sa langit” wala gid nagabuhin. (Mat. 6:20; Heb. 6:10) Dugang pa, samtang ginahuptan sang mga payunir ang ‘simple nga mata’ kag nagasalig kay Jehova nga amanan sila sang ila mga kinahanglanon, labi pa nga nagabakod ang ila kaangtanan sa iya.—Mat. 6:22, 25, 32; Heb. 13:5, 6.
3. Ano ang kinatuhayan sang pagtinguha sang espirituwal nga kamanggaran sa paghingamo sing materyal nga manggad?
3 Ang paghingamo sing materyal nga manggad masami nagadul-ong sa “madamo nga binuang kag makahalalit nga kailigbon.” (1 Tim. 6:9, 10; Sant. 5:1-3) Indi amo sini ang nagakatabo sa pagpakamaayo ni Jehova. Bangod ang mga regular payunir madamo sing ginahinguyang nga tion sa ministeryo, nakabulig ini sa ila nga mahuptan ang espirituwal nga pagkabalanse kag maathag nga pagtamod sa kon ano ang mas importante nga mga butang. (Fil. 1:10) Isa ka utod nga lalaki ang naghalin sa iya nagaubos-tion nga trabaho subong isa ka enhinyero agod magpayunir. Nagsiling sia: “Nasapwan ko nga makapahuol ang akon anay sekular nga trabaho. Apang indi amo sini ang akon nabatyagan sa pagpayunir. May tion na ako karon nga mabuligan ang mga tawo nga mahibaluan ang kamatuoran. Nasapwan ko nga mas makaalayaw ini kag makawiwili.”
4. Paano ginapakamaayo ang mga regular payunir samtang nagahatag man sila sing pagpakamaayo sa iban?
4 Pagpakamaayo Para sa Iban: Sa karon, tanan kita nagaatubang sa “makahalanguyos nga mga tion nga mabudlay atubangon.” (2 Tim. 3:1) Ang mga tawo sa aton palibot nagakinahanglan gid sing paglaum. Ang mga manugbantala sang Ginharian nagakalipay sa tion nga makita nila nga ang masubo nga pangguyahon sang mga tawo nagasanag bangod sa paglaum samtang nagabaton sila sing maayong balita. Daku gid nga kalipay ang ginaagom sang mga regular payunir nga nagahinguyang sing kapin sa 800 ka oras kada tuig sa sining nagaluwas-kabuhi nga hilikuton!—1 Tim. 4:16.
5, 6. Ano ang makabulig sa imo nga mangin regular payunir?
5 Nahunahuna mo na bala sing serioso nga mag-alagad subong isa ka regular payunir? Mahimo nagadalahig ini sang ‘pagbakal sing nagakaigo nga tion’ gikan sa di-tanto ka importante nga mga hilikuton. (Efe. 5:15, 16) Madamo ang naghimo sini kag nagpasimple sang ila kabuhi, sa amo nabuhinan nila ang tion nga ginahinguyang sa sekular nga trabaho agod makahinguyang sing kapin pa nga tion sa mga intereses sang Ginharian. Mapasibu mo bala ang imo mga hilikuton agod makaupod sa ila?
6 Mangayo sing kaalam kay Jehova agod makahimo ka sing isa ka praktikal nga iskedyul. (Sant. 1:5) Ano nga mga pagpakamaayo ang mapaabot mo subong resulta? Bugana nga espirituwal nga mga pagpakamaayo! Pakamaayuhon ka man ni Jehova sing materyal nga mga butang nga ginakinahanglan mo. (Mat. 6:33) Yadtong nagatilaw kay Jehova sa sining bahin magabaton sing “pagpakamaayo sa bagay nga wala na sing masudlan.”—Mal. 3:10.