Ginapukan Naton ang mga Butang nga Natukod sing Malig-on
1 Ginabulag ni Satanas ang tagipusuon kag hunahuna sang madamo nga tawo sing siniglo na, paagi sa butig nga mga panudlo kag paglimbong. Ginapalapnag niya ang mga doktrina subong sang Trinidad, pagkadimamalatyon sang kalag, kag kalayuhon nga impierno. Ginapalapnag man niya ang pangduhaduha sa pagluntad sang Manunuga kag sa pagkamasaligan sang Biblia. Ginabulag niya ang mga tawo nga magpati nga ang ila rasa ukon pungsod amo ang pinakamaayo, busa, naupangan sila nga makita ang kapawa sang kamatuoran. (2 Cor. 4:4) Paano naton mapukan ining mga pagpati nga natukod sing malig-on?—2 Cor. 10:4, 5.
2 Nadalahig ang Emosyon: Sa masami, ang relihiosong mga pagpati nga namat-an sang mga tawo nanggamot na gid sa ila. Ang pila natudluan sing sayop nga mga pagpati halin pa sa pagkabata. Agod mabuligan ining mga tawo, dapat magpakita kita sing pagtahod kon nagapakighambal tuhoy sa ila pagtamod.—1 Ped. 3:15.
3 Mapakita naton ang pagtahod sa sining mga tawo paagi sa pagtugot sa ila nga ipaathag kon ano ang ila ginapatihan kag ngaa nagapati sila sa sini. (Sant. 1:19) Ayhan nagapati sila nga ang kalag di-mamalatyon bangod namatyan sila sing hinigugma kag luyag nila ini makita liwat. Ukon ayhan nagaselebrar sila sing mga kapiestahan bangod nagahatag ini sa ila sing kahigayunan nga makaupod ang ila pamilya. Ang pagpamati sa ila opinyon makabulig sa aton nga mahangpan ang ila balatyagon kag makapaathag sa ila sa epektibo nga paagi.—Hulu. 16:23.
4 Iluga si Jesus: Si Jesus naghatag sing isa gid ka maayo nga halimbawa sa aton sang ginsabat niya ang mga pamangkot sang tawo nga batid sa Kasuguan. Wala naghatag sing direkta nga mga sabat si Jesus, kay mahimo nga sikwayon gid ini sang tawo bangod supak ini sa ginapakabahandi niya nga mga pagpati. Sa baylo, ginpatalupangod ni Jesus ang Kasulatan, ginkuha ang opinyon sang tawo, kag ginbuligan sia nga mangatarungan paagi sa isa ka ilustrasyon.—Luc. 10:25-37.
5 Ang nanggamot na nga butig nga mga pagpati indi makatupong sa kamatuoran sang Pulong sang Dios. (Heb. 4:12) Paagi sa mapailubon nga paglab-ot sa ila tagipusuon, mahimo naton mabuligan ang mga tawo nga sikwayon ang kabutigan kag batunon ang kamatuoran nga amo ang makahatag sa ila sing kahilwayan.—Juan 8:32.