Importante Gid ang Personal kag Pangpamilya nga Pagtuon sa Biblia!
1. Ngaa nabalaka gid sa aton karon ang Nagadumala nga Hubon?
1 Kaangay sang unang siglo, ang Nagadumala nga Hubon nabalaka gid karon sa kaayuhan sang katawhan ni Jehova. (Binu. 15:6, 28) Samtang nagahilapit na ang dakung kapipit-an, importante gid nga ang tagsa ka manugbantala sang Ginharian maghupot sing di-mationg nga kaangtanan kay Jehova. Paano mo gamiton ang tion nga nakaiskedyul anay para sa Pagtinuon sang Kongregasyon sa Libro? Ginapalig-on ang tanan nga gamiton ining tion para sa ila pagsimba subong pamilya. Ang maalamon nga paggamit sining tion magatugot sa aton nga matun-an sing labi pa ang Pulong sang Dios kag makapanginpulos sa nagaluwas-kabuhi nga mga panudlo sini.—Sal. 1:1-3; Roma 11:33, 34.
2. Paano naton hiwaton ang gab-i sang aton pagsimba subong pamilya?
2 Gab-i sang Pagsimba Subong Pamilya: Ginapalig-on ang mga ulo sang pamilya nga tungdan ang ila responsibilidad kay Jehova sa pagpat-od nga may yara sila mapuslanon kag regular nga pangpamilya nga pagtuon sa Biblia. (Deut. 6:6, 7) Ang di-minyo nga mga utod nga wala sing salabton sa pamilya mahimo maggamit sining tion sa ila personal nga pagtuon kag pagpanalawsaw sa Biblia. Importante gid nga tanan kita ‘magbakal sing nagakaigo nga tion’ sa pagtuon kag sa pagpamalandong agod mahuptan naton ang espirituwal nga kusog sa sining ‘malaut nga mga adlaw.’—Efe. 5:15, 16.
3, 4. Ano nga mga panugda ang ginhatag tuhoy sa materyal nga mahimo naton tun-an, kag sa ano kita dapat magkonsentrar?
3 Kon Ano ang Pagatun-an: Ang Watch Tower Publications Index ukon Watchtower Library sa CD-ROM makabulig sa inyo sa pagpangita sing mga impormasyon nga makahimo sang inyo pagtuon sa Biblia nga makalilipay. Mahimo binagbinagon sang pamilya ang mga artikulo sa Ang Lalantawan, subong sang regular nga bahin nga “Mga Sekreto sang Kalipay sa Pamilya,” “Tudlui ang Inyo Kabataan,” kag “Para sa mga Pamatan-on.” Ang Magmata! nagaunod man sing mga serye sang “Pamangkot sang mga Pamatan-on” kag matahom nga mga artikulo tuhoy sa mga kalatingalahan sang pagpanuga.
4 Ang indi padali nga pagbasa sang Biblia makapatudok sang diosnon nga mga prinsipio kag mga leksion sa hunahuna kag tagipusuon sang tanan nga katapo sang pamilya. (Heb. 4:12) Sa iban nga okasyon, mahimo ninyo tan-awon kag binagbinagon ang isa sa mga video sang organisasyon. May kahigayunan kamo nga mangita sing paagi agod mangin makawiwili ang inyo pagtuon. Puede mo man pamangkuton ang imo pamilya kon ano nga topiko ang luyag nila tun-an.
5. Ngaa importante gid sa aton kabuhi karon ang personal kag pangpamilya nga pagtuon sa Biblia?
5 Kon Ngaa Importante Gid Karon: Ang pagpabakod sang aton kaangtanan kay Jehova magahanda sa aton sa ‘pagtindog sing malig-on kag sa pagtan-aw sa pagluwas ni Jehova.’ (Ex. 14:13, NW) Ang mga ginikanan nagakinahanglan sing panuytoy sang Dios sa pagpadaku sang ila kabataan “sa tunga sang tiko kag balingag nga kaliwatan.” (Fil. 2:15) Ang mga bata nagakinahanglan sing bulig sa pag-atubang sa naganubo nga moralidad sa mga eskwelahan karon. (Hulu. 22:3, 6) Ang mga magtiayon kinahanglan magpabakod sang ila “lubid nga tatlo ka dupli” upod kay Jehova. (Man. 4:12) Kabay nga gamiton naton tanan ang nabilin nga tion sa pagpabakod sang aton “labing balaan nga pagtuo”!—Jud. 20.