Sang ang Dios ang nagagahom sadto, may paghiusa kag paghidait ang tanan niya nga tinuga

Ngaa Kinahanglan Naton ang Ginharian sang Dios?

Sang gintuga ang una nga tawo, ang aton Manunuga, nga ang ngalan amo si Jehova, amo lamang ang Manuggahom. Naggahom sia sing mahigugmaon. Naghimo sia sing isa ka matahom nga puluy-an—ang hardin sang Eden—para istaran sang mga tawo. Kag ginhatagan niya sila sang bugana nga pagkaon. Ginhatagan man niya sila sing makalilipay nga hilikuton. (Genesis 1:28, 29; 2:8, 15) Mangin malinong kuntani ang ila pagkabuhi kon padayon sila nga nagpasakop sa mahigugmaon nga paggahom sang Dios.

Si Adan nga nagauyat sang ginadumilian nga prutas nga ginhatag sa iya ni Eva. — Ang una nga mga tawo nagrebelde sa Dios bilang ila Manuggahom

Ginasugid sang Biblia nga ginhangkat sang isa ka rebelyuso nga anghel ang kinamatarong sang Dios sa paggahom. Ini nga anghel gintawag sang ulihi nga Satanas nga Yawa. Ginpahangop niya nga mangin mas malipayon ang mga tawo kon wala sila ginagamhan kag ginatuytuyan sang Dios. Ang masubo kay ang aton una nga mga ginikanan, si Adan kag si Eva, nagsunod kay Satanas kag nagrebelde sa Dios.—Genesis 3:1-6; Bugna 12:9.

Bangod nagrebelde si Adan kag si Eva sa Dios bilang ila Manuggahom, ginpahalin sila sa Paraiso. Indi na sila perpekto kag indi na sila mabuhi sing wala katapusan. (Genesis 3:17-19) Bangod sang ila desisyon, naapektuhan man ang ila mga anak. Ang Biblia nagasiling nga bangod nakasala si Adan, “nagsulod ang sala sa kalibutan kag ang kamatayon paagi sa sala.” (Roma 5:12) May isa pa ka malain nga resulta ang sala. “Ginagamhan sang tawo ang iya isigkatawo sa iya kahalitan.” (Manugwali 8:9) Buot silingon, kon gamhan sang tawo ang ila kaugalingon, magaresulta gid ini sa problema.

NAGSUGOD ANG PAGGAHOM SANG TAWO

Ang bugalon nga si Nimrod nga nagatindog. Sa likod niya, may mga tawo nga nagapatindog sang isa ka bilding. — Si Nimrod nagrebelde kay Jehova

Ang una nga tawo nga naggahom sa duta nga ginsambit sa Biblia amo si Nimrod. Nagrebelde sia sa paggahom ni Jehova. Sugod sadto, madamo ang naggamit sang ila gahom para abusuhan ang iban. Mga 3,000 ka tuig ang nagligad, si Hari Solomon nagsulat: “Nakita ko ang mga luha sang mga ginpigos kag wala gid sing nagalugpay sa ila. Kag gamhanan ang mga nagapigos sa ila.”—Manugwali 4:1.

Amo sini gihapon ang sitwasyon subong. Sang 2009, ang isa ka publikasyon sang United Nations nagsiling nga ang indi maayo nga paggahom sang gobierno amo ang “isa sa mga rason sang pag-antos sang mga tawo.”

TION SANG PAGBAG-O!

Kinahanglan sang kalibutan ang mas maayo nga mga gumalahom kag mas maayo nga porma sang gobierno. Kag amo sina ang ginpromisa sang aton Manunuga!

Mga piktyur: Ang mga resulta sang paggahom sang tawo. 1. Isa ka babayi nga taga-Asia ang nagapungko sa mahigko nga dalan samtang ginakugos ang iya bata nga nagahibi. 2. Isa ka nagabalatian nga tigulang nga nagahigda sa ospital. 3. Mga soldado nga nagapakig-away. 4. Akig nga mga tawo nga nagaprotesta kag nagauyat sang mga plakard. 5. Pag-abot sang isa ka babayi upod ang iya bata sa ila balay, nadiskobrehan nila nga buka na ang kristal sang ila puertahan. 6. Isa ka siudad nga grabe ang polusyon kag may mga simburyo kag mga kable sang kuryente. — Bisan ang pinakamaayo nga gobierno sang tawo wala gid makasolbar sa malala nga mga problema

Nagtukod ang Dios sang isa ka Ginharian, ukon gobierno, nga magabulos sa paggahom sang tawo, kag “ini lamang ang magapabilin sing dayon.” (Daniel 2:44) Amo ini ang Ginharian nga ginapangamuyo sang minilyon ka tawo. (Mateo 6:9, 10) Pero indi ang Dios mismo ang magagahom sa sini nga gobierno. Gintangdo Niya bilang Manuggahom ang isa nga nangin tawo. Sin-o ang ginpili sang Dios?